ഓസ്ട്രേലിയക്കെതിരായ പരമ്പരയിലെ ആദ്യത്തെ രണ്ട് മത്സരത്തിലും സൂപ്പര്‍ താരം വിരാട് കോഹ്ലി പൂജ്യം റണ്‍സിന് മടങ്ങിയിരുന്നു. ഇതോടെ പലരും താരം വിരമിക്കലിന്റെ വക്കിലാണെന്ന് പറഞ്ഞ് രംഗത്ത് വന്നിരുന്നു. ഇപ്പോള്‍ വിരാട് കോഹ്ലിയെ പിന്തുണച്ച് സംസാരിക്കുകയാണ് മുന്‍ ഇന്ത്യന്‍ താരം ആര്‍. അശ്വിന്‍.

സിഡ്‌നിയില്‍ ഓസട്രേലിയക്കെതിരായ അവസാനത്തെ മത്സരത്തില്‍ വിരാട് മികച്ച പ്രകടനം നടത്തുമെന്നാണ് അശ്വിന്‍ വിശ്വസിക്കുന്നത്. മാത്രമല്ല ഓസ്‌ട്രേലിയക്കെതിരെയുള്ള തോല്‍വിയില്‍ ആളുകള്‍ വിരാടിനെതിരെ വിരള്‍ ചൂണ്ടുന്നതിന് മുമ്പ് താരം റണ്‍സ് സ്‌കോര്‍ ചെയ്യണമെന്നും അശ്വിന്‍ പറഞ്ഞു. പരാജയങ്ങളില്‍ നിന്ന് വിരാട് തിരിച്ചുവരുമെന്ന് മുന്‍ സ്പിന്നര്‍ സൂചിപ്പിച്ചു.

‘സിഡ്‌നിയില്‍ വിരാട് മികച്ച രീതിയില്‍ റണ്‍സ് നേടും. ഇന്ത്യയിലാണെങ്കില്‍ തോല്‍വിക്ക് പിന്നിലെ കാരണങ്ങള്‍ ചര്‍ച്ച ചെയ്യുന്നില്ല. എന്നാല്‍ ആര്‍ക്കെതിരെയാണ് നമ്മള്‍ മത്സരം തോറ്റതെന്ന് ചര്‍ച്ച ചെയ്യും. ആളുകള്‍ വിരല്‍ ചൂണ്ടാന്‍ തുടങ്ങുന്നതിനുമുമ്പ് വിരാട് റണ്‍സ് നേടുമെന്ന് ഞാന്‍ പ്രതീക്ഷിക്കുന്നു.

മുന്‍കാലങ്ങളില്‍ രോഹിത് പുറത്തായതുപോലെയാണ് വിരാടിന്റെ പുറത്താകല്‍. എന്നിരുന്നാലും, ഭാഗ്യം കൊണ്ട് രോഹിത് വെല്ലുവിളി നിറഞ്ഞ ഘട്ടത്തെ അതിജീവിച്ചു. ആദ്യ ഘട്ടത്തിന് ശേഷം അദ്ദേഹം പൂര്‍ണ നിയന്ത്രണത്തിലാണെന്ന് തോന്നി.

ആദ്യ മത്സരത്തില്‍ ഓഫ് സ്റ്റമ്പിന് പുറത്ത് പിച്ച് ചെയ്ത പന്തില്‍ മിച്ചല്‍ സ്റ്റാര്‍ക്ക് വിരാടിനെ പുറത്താക്കി. രണ്ടാം ഏകദിനത്തില്‍, അകത്തേക്ക് വന്ന പന്ത് കൈകാര്യം ചെയ്യാന്‍ അദ്ദേഹത്തിന് കഴിഞ്ഞില്ല. അത് അദ്ദേഹത്തിന്റെ മനസില്‍ പ്രതിഫലിക്കുമെന്ന് തോന്നുന്നു,’ ആര്‍. അശ്വിന്‍ പറഞ്ഞു.

അതേസമയം ചാമ്പ്യന്‍സ് ട്രോഫിക്ക് ശേഷമാണ് വിരാട് കോഹ്ലിയും രോഹിത് ശര്‍മയും ഏകദിന മത്സരങ്ങള്‍ക്കായി കളത്തിലിറങ്ങുന്നത്. എന്നാല്‍ ആദ്യ രണ്ട് മത്സരങ്ങളിലും വിരാട് സംപൂജ്യനായി മടങ്ങിയപ്പോള്‍ രോഹിത്ത് ആദ്യ മത്സരത്തില്‍ എട്ട് റണ്‍സും രണ്ടാ മത്സരത്തില്‍ 73 റണ്‍സും നേടിയിരുന്നു.

മൂന്ന് മത്സരങ്ങള്‍ അടങ്ങുന്ന പരമ്പരയിലെ അവസാന മത്സരം നാളെ (ഒക്ടോബര്‍ 25) സിഡ്നിയിലാണ്. പരമ്പര പരാജയപ്പെട്ടെങ്കിലും അവസാന മത്സരത്തില്‍ ആശ്വാസ വിജയം തേടിയാണ് ഗില്ലും കൂട്ടരും കളത്തിലിറങ്ങുന്നത്.

Content Highlight: R. Ashwin Talking About Virat Kohli And Rohit Sharma