കോഴിക്കോട്: ടി.പി ചന്ദ്രശേഖരന് വധക്കേസ് പ്രതികള്ക്ക് പരോള് ലഭിച്ചതില് ഉന്നത രാഷ്ട്രീയ സ്വാധീനവും ഇടപെടലുകളും ഉണ്ടായിട്ടുണ്ടെന്ന ഹൈക്കോടതി നിരീക്ഷണത്തില് അന്വേഷണം ആവശ്യപ്പെട്ട് ആര്.എം.പി.ഐ. പരോളിലെ ചട്ടവിരുദ്ധ നടപടികള് സ്വതന്ത്ര ഏജന്സികള് അന്വേഷിക്കണമെന്നാണ് ആര്.എം.പി.ഐ ആവശ്യപ്പെട്ടിരിക്കുന്നത്.
പരോള് അടക്കം പ്രതികളുടെ കാര്യത്തില് ഉന്നത രാഷ്ട്രീയ ഇടപെലുകളുണ്ടായിട്ടുണ്ട്. ഇവരുടെ ശിക്ഷാ കാലവധി കുറയ്ക്കാനുള്ള ഇടപെടലുകളും ഉണ്ടായിട്ടുള്ളതായി ആരോപണമുണ്ട്.
ടി.പി. വധക്കേസിലെ പ്രതികള്ക്ക് തുടര്ച്ചയായ പരോളും അടിയന്തര അവധികളും നല്കിയത് വിശദമായി അന്വേഷിക്കണമെന്ന് ഹൈക്കോടതി അഭിപ്രായപ്പെട്ടിരുന്നു.
പ്രതികള്ക്ക് ഇങ്ങനെയുള്ള പരിഗണന ലഭിക്കാന് എന്താണ് പ്രത്യേകതയാണുള്ളതെന്ന് ജസ്റ്റിസ് ജോബിന് സെബാസ്റ്റ്യന് അധ്യക്ഷനായ ബെഞ്ച് വാക്കാല് ചോദിച്ചിരുന്നു.
കേസിലെ പ്രതിയായ ജ്യോതി ബാബുവിന്റെ പങ്കാളി പി.ജി. സ്മിത നല്കിയ ഹരജി തള്ളിക്കൊണ്ടായിരുന്നു കോടതിയുടെ നിരീക്ഷണം. ബന്ധുവിന്റെ മരണത്തെത്തുടര്ന്നുള്ള ചടങ്ങുകള്ക്കായി ജ്യോതി ബാബുവിന് പത്ത് ദിവസത്തെ പരോള് അനുവദിക്കണമെന്നായിരുന്നു ഹരജിക്കാരിയുടെ ആവശ്യം.
മരണാനന്തര ചടങ്ങുകള് നടത്തേണ്ട കുടുംബത്തിലെ ഏക മുതിര്ന്ന പുരുഷ അംഗം ജ്യോതി ബാബുവാണെന്നും അവരുടെ സാന്നിധ്യം ഒഴിച്ചുകൂടാനാവാത്തതാണെന്നും സ്മിത ഹരജിയില് വാദമുന്നയിച്ചിരുന്നു.
എന്നാല്, അടുത്ത ബന്ധുക്കളുടെ മരണാനന്തര ചടങ്ങുകളില് പങ്കെടുക്കാന് മാത്രമാണ് അടിയന്തര അവധിയോ പരോളോ അനുവദിക്കുന്നതെന്നും, എന്നാല് ഇപ്പോള് മരിച്ചത് പ്രതിയുടെ നേരിട്ടുള്ള ബന്ധുവല്ലെന്നും കോടതി നിരീക്ഷിച്ചു.
നേരത്തെ, ഡയറക്ടര് ജനറല് ഓഫ് പ്രിസണ്സിനും കണ്ണൂര് സെന്ട്രല് ജയില് സൂപ്രണ്ടിനും പരോള് ആവശ്യപ്പെട്ട് ജ്യോതി ബാബു നിവേദനം നല്കിയിരുന്നു. എന്നാല്, നടപടിയൊന്നും ഉണ്ടാകാത്തതിനെത്തുടര്ന്നാണ് ഹൈക്കോടതിയെ സമീപിച്ചത്.
Content Highlight: Parole of TP Chandrasekharan murder case accused; RMPI demands independent agency to investigate