ഷില്ലോങ്: മേഘാലയയിലെ ഈസ്റ്റ് ജയന്തിയയിലെ അനധികൃത ഖനിയില് കുടുങ്ങിയ ഒരു തൊഴിലാളിയുടെ മൃതദേഹം കൂടി പുറത്തെടുത്തു. നാവിക സേനയിലെ രക്ഷാപ്രവര്ത്തകരാണ് 335 അടി താഴ്ച്ചയില് നിന്ന് മൃതദേഹം പുറത്തെടുത്തത്. രക്ഷാപ്രവര്ത്തകര് പുറത്തെടുക്കുന്ന രണ്ടാമത്തെ മൃതദേഹമാണിത്. ഒരു മാസം മുമ്പാണ് ഖനിയപകടം ഉണ്ടായത്.
മൃതദേഹം അസം സ്വദേശി ഹുസൈനിന്റേതാണെന്ന് ഈസ്റ്റ് ജയന്തിയ ഡെപ്യൂട്ടി കമ്മീഷണര് ഫെഡറിക് പറഞ്ഞു. ശരീരം ഹുസൈനിന്റെ ഭാര്യയും അമ്മയും തിരിച്ചറിഞ്ഞെന്നും മൃതശരീരം കുടുംബത്തിന് കൈമാറുമെന്നും കമ്മീഷണര് കൂട്ടിച്ചേര്ത്തു.
പതിമൂന്ന് തൊഴിലാളികളാണ് ഖനിയില് കുടുങ്ങിയിരിക്കുന്നത്. ഇവരെ കുറിച്ച് യാതൊരു വിവരവും ഇതുവരെ ലഭ്യമല്ല. ഡിസംബര് 13ന് ആയിരുന്നു അപകടം നടന്നത്. 2014 ഏപ്രിലില് ദേശീയ ഹരിത ട്രിബ്യൂണല് മേഘാലയയിലെ അനധികൃത ഖനികളുട പ്രവര്ത്തനം നിരോധിച്ചിരുന്നു. ഇതിന് ശേഷവും പ്രവര്ത്തിച്ച ഏറ്റവും വലിയ ഖനികളിലൊന്നിലാണ് അപകടം ഉണ്ടായത്.