സൂര്യയുടെ സിനിമയാണെന്ന് പറഞ്ഞില്ല; ഇതൊരു ചെറിയ പടമാണെന്ന് മാത്രം പറഞ്ഞു: ലിജോമോള്‍ ജോസ്

മലയാളികള്‍ക്ക് ഏറെ പരിചിതയായ നടിയാണ് ലിജോമോള്‍ ജോസ്. തമിഴ് ചിത്രമായ ജയ് ഭീമില്‍ അഭിനയിക്കുന്നതിന് മുമ്പ് തനിക്കൊരു ബ്രേക്ക് വന്നിരുന്നുവെന്ന് പറയുകയാണ് ലിജോമോള്‍. മലയാളത്തിലും തമിഴിലും താന്‍ ഏകദേശം ഒരു വര്‍ഷത്തിന് മേലെ സിനിമകളൊന്നും ചെയ്തിട്ടില്ലെന്നും ആ സമയത്ത് സിനിമ വേണ്ടെന്ന് തീരുമാനിച്ച് നെറ്റിന് തയ്യാറെടുക്കുകയായിരുന്നെന്നും നടി പറയുന്നു.

സിവപ്പ് മഞ്ചള്‍ പച്ചൈ എന്ന സിനിമ കണ്ടാണ് തന്നെ ജയ് ഭീമിലേക്ക് വിളിച്ചതെന്നും ലിജോമോള്‍ പറയുന്നു. വണ്ടര്‍വാള്‍ മീഡിയക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു നടി. തന്നോട് ഇത് സൂര്യയുടെ സിനിമയാണെന്ന് ആദ്യ പറഞ്ഞിരുന്നില്ലെന്നും പകരം റ്റു.ഡി എന്റര്‍ടൈമെന്റ്‌സ് പ്രൊഡ്യൂസ് ചെയ്യുന്ന ചെറിയ സിനിമയാണെന്നാണ് പറഞ്ഞതെന്നും ലിജോമോള്‍ ജോസ് പറയുന്നു.

‘സത്യത്തില്‍ ജയ് ഭീം എന്ന സിനിമക്ക് മുമ്പ് എനിക്ക് ഒരു ബ്രേക്ക് വന്നിരുന്നു. ആ സമയത്ത് ഞാന്‍ ഏകദേശം ഒരു വര്‍ഷത്തിന് മേലെ മലയാളത്തിലും തമിഴിലും സിനിമകളൊന്നും ചെയ്തിരുന്നില്ല. ഞാന്‍ അപ്പോള്‍ സിനിമ വേണ്ടെന്ന് തീരുമാനിച്ച സമയമായിരുന്നു. സിനിമ നിര്‍ത്തി നെറ്റിന് തയ്യാറെടുക്കുകയായിരുന്നു.

വീണ്ടും പി.എച്ച്.ഡിക്ക് ഒന്നുകൂടെ ട്രൈ ചെയ്യാമെന്ന് കരുതി. പിന്നെ ജെ.ആര്‍.എഫ് എടുക്കാന്‍ പറ്റിയാല്‍ അങ്ങനെ പോകാമെന്നും കരുതി. അങ്ങനെ നില്‍ക്കുമ്പോഴാണ് എന്നെ ജയ് ഭീം സിനിമയുടെ ഓഡീഷന് വിളിക്കുന്നത്. ആ സിനിമക്ക് മുമ്പ് ഞാന്‍ തമിഴില്‍ ഒരു സിനിമ ചെയ്തിരുന്നു. സിവപ്പ് മഞ്ചള്‍ പച്ചൈ എന്നായിരുന്നു ആ പടത്തിന്റെ പേര്.

സത്യത്തില്‍ ആ സിനിമ കണ്ടിട്ടാണ് ജയ് ഭീമിലേക്ക് എന്നെ വിളിക്കുന്നത്. എന്നാല്‍ സിവപ്പ് മഞ്ചള്‍ പച്ചൈ ഇറങ്ങിയിട്ട് കുറച്ച് നാളുകളായിരുന്നു. പക്ഷെ അപ്പോഴാണ് ജയ് ഭീമിന്റെ സംവിധായകന്‍ ആ സിനിമ കാണുന്നത്. ആദ്യത്തെ ഓഡീഷന് വിളിക്കുമ്പോള്‍ ഞാന്‍ പോകുന്നതിനെ കുറിച്ച് ആലോചിച്ചിരുന്നില്ല. ഞാന്‍ അവരോട് വരാമെന്നൊന്നും പറഞ്ഞിരുന്നുമില്ല.

അത് കഴിഞ്ഞ് പിന്നെയും അവിടുന്ന് കോള്‍ വരികയായിരുന്നു. അവര് എനിക്ക് സീനൊക്കെ അയച്ച് തന്നു. ആ സമയത്ത് എന്നോട് ഇത് സൂര്യയുടെ സിനിമയാണെന്നൊന്നും പറഞ്ഞിരുന്നില്ല എന്നതാണ് സത്യം. സൂര്യയുടെ റ്റു.ഡി എന്റര്‍ടൈമെന്റ്‌സ് പ്രൊഡ്യൂസ് ചെയ്യുന്നുവെന്ന് മാത്രമേ പറഞ്ഞിരുന്നുള്ളൂ. പിന്നെ ഇതൊരു ചെറിയ സിനിമയാണെന്നും പറഞ്ഞിരുന്നു,’ ലിജോമോള്‍ ജോസ് പറഞ്ഞു.

ജയ് ഭീം:

റ്റുഡി എന്റര്‍ടൈന്‍മെന്റിന് കീഴില്‍ സൂര്യയും ജ്യോതികയും സൂര്യയും ചേര്‍ന്ന് നിര്‍മിച്ച ചിത്രമാണ് ജയ് ഭീം. ടി.ജെ. ജ്ഞാനവേല്‍ സംവിധാനം ചെയ്ത ചിത്രം ആമസോണ്‍ പ്രൈമിലൂടെയാണ് റിലീസ് ചെയ്യപ്പെട്ടത്. സൂര്യ അഭിഭാഷകനായ കെ. ചന്ദ്രുവായി എത്തിയ ജയ് ഭീമില്‍ ലിജോമോള്‍ ജോസും ഒരു പ്രധാനവേഷത്തില്‍ എത്തിയിരുന്നു. ചിത്രം റിലീസായതിന് പിന്നാലെ ഈ സിനിമയിലെ ലിജോമോളുടെ കഥാപാത്രം ഏറെ പ്രശംസ നേടിയിരുന്നു.

Content Highlight: Lijomol Jose Says How She Get Chance In Suriya’s Jai Bhim Movie