മലയാളികള്ക്ക് ഏറെ പ്രിയപ്പെട്ട തമിഴ് നടിമാരില് ഒരാളാണ് ഖുഷ്ബു. ഇപ്പോള് താന് കണ്ട മലയാള സിനിമകളെ കുറിച്ച് പറയുകയാണ് നടി. താന് നിലത്ത് വീണ് കിടന്ന് ചിരിച്ച അവസാന മലയാള ചിത്രം ഫഹദ് ഫാസില് നായകനായ ആവേശം എന്ന സിനിമയാണ് എന്നാണ് ഖുഷ്ബു പറയുന്നത്.
ബേസില് ജോസഫ് നായകനായ ഫാലിമി, സൂക്ഷ്മദര്ശിനി എന്നീ സിനിമകളെ കുറിച്ചും നടി പറയുന്നു. എത്ര നല്ല ആക്ടേഴ്സാണ് ഇപ്പോള് മലയാള സിനിമയില് ഉള്ളതെന്നും ഖുഷ്ബു പറഞ്ഞു. രേഖ മേനോന് നല്കിയ അഭിമുഖത്തില് സംസാരിക്കുകയായിരുന്നു നടി.
‘ഞാന് നിലത്ത് വീണ് കിടന്ന് ചിരിച്ച അവസാന മലയാള ചിത്രം ഏതാണെന്ന് ചോദിച്ചാല് അത് ആവേശമാണ്. അത് ഒരു മികച്ച ചിത്രമാണ്. പിന്നെ ഫാലിമിയും. ഈയിടെ ഞാന് ഒരു മലയാള സിനിമ കൂടെ കണ്ടിരുന്നു. ബേസില് ജോസഫിന്റേത് തന്നെയായിരുന്നു അത്.
സൂക്ഷ്മദര്ശിനി, എന്തൊരു സിനിമയാണ് അത്. എന്തൊരു മേക്കിങ്ങായിരുന്നു അതിന്റേത്. എത്ര നല്ല ആക്ടേഴ്സാണ് ഇപ്പോള് നിങ്ങള്ക്ക് മലയാളത്തില് ഉള്ളത്. എനിക്ക് മലയാള സിനിമകള് ചെയ്യേണമെന്നുണ്ട്. പക്ഷെ നല്ല റോളുകളൊന്നും കിട്ടാത്തത് കൊണ്ടാണ്.
ഞാന് രാഷ്ട്രീയ പ്രവര്ത്തനം നടത്തുന്നത് കാരണം ഇപ്പോള് സിനിമകളൊന്നും ചെയ്യില്ലെന്നാണ് ആളുകള് കരുതുന്നത്. പക്ഷെ എനിക്ക് സിനിമകള് ചെയ്യാന് ആഗ്രഹമുണ്ട്. നല്ല സിനിമകള് വേണമെന്നേ എനിക്കുള്ളൂ. നല്ല വേഷങ്ങള് കിട്ടിയാല് ഞാന് അത് ചെയ്യാന് തയ്യാറാകും,’ ഖുഷ്ബു പറയുന്നു.
കഴിഞ്ഞ വര്ഷമിറങ്ങിയ ഹലോ മമ്മി എന്ന സിനിമയെ കുറിച്ചും നടി അഭിമുഖത്തില് പറയുന്നു. അതിന്റെ കോണ്സെപ്റ്റിനെ കുറിച്ച് പറയാതിരിക്കാനാവില്ലെന്നും നിങ്ങള് മലയാളികള് എങ്ങനെയാണ് ഇങ്ങനെ ചിന്തിക്കുന്നതെന്നും ഖുഷ്ബു ചോദിക്കുന്നു.
‘ഇപ്പോള് മലയാള സിനിമയെ കുറിച്ച് പറയാതിരിക്കാന് ആവില്ല. എത്ര മികച്ച സിനിമകളാണ് ഇവിടെ മലയാളത്തില് വരുന്നത്. വ്യത്യസ്തമായ ഴോണറിലുള്ള നിരവധി സിനിമകള് മലയാളത്തില് ഇപ്പോള് വരുന്നുണ്ട്. ചിന്തിക്കാന് പറ്റാത്ത തരത്തിലുള്ള കുറേ സിനിമകള് ഈയിടെ മലയാളത്തില് വന്നു.
ഇപ്പോഴുള്ള ആളുകളുടെ ക്രിയേറ്റീവ് മൈന്ഡ് പറയാതിരിക്കാന് ആവില്ല. വളരെ മികച്ചതാണ്. ഞാന് ഈയിടെ ഒരു മലയാള സിനിമ കണ്ടിരുന്നു. അതിന്റെ കോണ്സെപ്റ്റിനെ കുറിച്ച് പറയാതിരിക്കാനാവില്ല. ഹലോ മമ്മി എന്ന സിനിമയാണ് ഞാന് ഈയിടെ കണ്ടത്. എന്റെ ദൈവമേ, എന്താണ് ആ സിനിമ. നിങ്ങള് എങ്ങനെയാണ് ഇങ്ങനെ ചിന്തിക്കുന്നത്,’ ഖുഷ്ബു പറഞ്ഞു.
Content Highlight: Kushboo Talks About Fahadh Faasil’s Aavesham Movie