നാലരപ്പതിറ്റാണ്ടായി മലയാളികളുടെ സ്വകാര്യ അഹങ്കാരമായി നിറഞ്ഞുനില്ക്കുന്ന നടനാണ് മോഹന്ലാല്. വില്ലനായി അരങ്ങേറിയ മോഹന്ലാല് പിന്നീട് മലയാളസിനിമയുടെ താരസിംഹാസനം അലങ്കരിക്കുന്ന കാഴ്ചയാണ് കാണാന് സാധിച്ചത്.
തമിഴ്, തെലുങ്ക്, കന്നഡ, ഹിന്ദി ഭാഷകളിലായി മോഹന്ലാല് ശ്രദ്ധേയ കഥാപാത്രങ്ങളെ അവതരിപ്പിച്ചിട്ടുണ്ട്. കമൽ ഹാസനൊപ്പം ഉന്നൈപ്പോൽ ഒരുവൻ എന്ന സിനിമയിലാണ് മോഹൻലാൽ അഭിനയിച്ചിട്ടുള്ളത്. മലയാളത്തിൽ വലിയ വിജയമായ ദൃശ്യത്തിന്റെ തമിഴ് പതിപ്പിൽ കമൽ ഹാസനായിരുന്നു നായകൻ.
പാപനാസത്തിന്റെ സെറ്റിൽ വെച്ച് പ്രണവ് മോഹൻലാലിനെ കണ്ട അനുഭവം പങ്കുവെക്കുകയാണ് കമൽ. ഒരു സൂപ്പർതാരത്തിന്റെ മകനാണെന്ന ഒരു ഭാവവും പ്രണവിന് ഇല്ലായിരുന്നുവെന്നും സിനിമയിൽ ക്ലാപ്പ് അടിക്കുന്ന പ്രണവിനെ കണ്ടപ്പോൾ തന്റെ കുട്ടികാലമാണ് ഓര്മ വന്നതെന്നും കമൽ ഹാസൻ പറഞ്ഞു. തന്റെ പ്രൊഫഷനോട് അത്രമാത്രം ഡെഡിക്കേറ്റഡായ ആളാണ് പ്രണവെന്നും കമൽ കൂട്ടിച്ചേർത്തു.
‘മോഹൻലാൽ എന്ന നടൻ എങ്ങനെയാണോ എന്നെ അത്ഭുതപ്പെടുത്തിയത് അതിൽ നിന്ന് വളരെ വ്യത്യസ്തമായ ഒരനുഭവമാണ് അദ്ദേഹത്തിന്റെ മകൻ പ്രണവ് എന്നിലുണ്ടാക്കിയത്. ലാൽസാർ അഭിനയിച്ച ‘ദൃശ്യം’ എന്ന വളരെ പ്രശസ്തമായ സിനിമയുടെ തമിഴ് പതിപ്പായ ‘പാപനാസ’ത്തിൽ ഞാൻ അഭിനയിക്കുമ്പോഴാണ് പ്രണവ് എന്നിൽ വിസ്മയങ്ങൾ സൃഷ്ടിച്ചത്.
പാപനാസത്തിന്റെ അസിസ്റ്റന്റ് ഡയറക്ടറാണ് പ്രണവ്. ഒരു സൂപ്പർ താരത്തിൻ്റെ മകനാണെന്ന ഭാവം ആ മുഖത്തുണ്ടായിരുന്നില്ല. സിനിമ പഠിക്കാൻ വരുന്ന ഒരു കുട്ടി എങ്ങനെയായിരിക്കും. അതുപോലെയായിരുന്നു പ്രണവും. സെറ്റിൽ ക്ലാപ്പടിച്ച് തുടങ്ങുന്ന അവനെ കാണുമ്പോൾ പലപ്പോഴും ഞാൻ എൻ്റെ കുട്ടിക്കാലം ഓർത്തിട്ടുണ്ട്.
ഇങ്ങനെയൊക്കെയായിരുന്നല്ലോ ഞാനും സിനിമയിൽ തുടക്കം കുറിച്ചത്. അച്ഛനെപ്പോലെ മകനും സിനിമയിൽ ഉയർന്നുവരുമെന്ന കാര്യത്തിൽ എനിക്ക് ഒട്ടും സംശയമില്ല. തന്റെ പ്രൊഫഷനോട് അത്രമാത്രം ഡെഡിക്കേറ്റഡാണ് പ്രണവ്. ലാൽ സാറിൻ്റെ ഭാര്യാ പിതാവ് ബാലാജി സാറും കുടുംബവുമായി വ്യക്തിപരമായി വളരെ അടുപ്പമുണ്ട് എനിക്ക്. ബാലാജി സാറിന്റെ പല ചിത്രങ്ങളിലും എനിക്ക് അഭിനയിക്കാൻ കഴിഞ്ഞിട്ടുമുണ്ട്. അതും എന്നിലെ നടന്റെ ഭാഗ്യമാണ്,’കമൽ ഹാസൻ പറയുന്നു.
Content Highlight: Kamal Hassan About Pranav Mohanlal