മലയാള സിനിമയിൽ നാല് പതിറ്റാണ്ടിലേറെയായി സജീവ സാന്നിധ്യമായി തുടരുന്ന നടിയാണ് കലാരഞ്ജിനി. ബാലതാരമായി അഭിനയരംഗത്തേക്ക് എത്തിയ താരം നിരവധി ശ്രദ്ധേയ കഥാപാത്രങ്ങളിലൂടെ പ്രേക്ഷകമനസിൽ സ്ഥിരമായ ഇടം നേടിയിട്ടുണ്ട്.
ഇപ്പോഴിതാ ജീവിതത്തിലെ ഏറ്റവും വെല്ലുവിളി നിറഞ്ഞ ഒരു ഘട്ടത്തെക്കുറിച്ച് തുറന്നുപറയുകയാണ് താരം. ഒരു സമയത്ത് തനിക്ക് അഭിമുഖം നൽകാനോ ആൾക്കൂട്ടത്തിൽ സംസാരിക്കാനോ പോലും അപകർഷബോധം തോന്നിയിരുന്നുവെന്നാണ് കലാരഞ്ജിനി വെളിപ്പെടുത്തിയത്. ഗൃഹലക്ഷ്മിക്ക് നൽകിയ അഭിമുഖത്തിലാണ് താരം മനസ് തുറന്നത്.
കലാരഞ്ജിനി, Photo: X.com
തന്റെ ജീവിതത്തെയും കരിയറിനെയും വലിയ രീതിയിൽ സ്വാധീനിച്ച സംഭവമാണ് ശബ്ദത്തിനുണ്ടായ മാറ്റമെന്ന് കലാരഞ്ജിനി പറയുന്നു. ശബ്ദം നഷ്ടപ്പെട്ട സംഭവം അന്നത്തെ മാധ്യമങ്ങളിൽ വലിയ വാർത്തയായിരുന്നുവെന്നും താരം ഓർമിച്ചു. ഇന്നത്തെ പോലെ സോഷ്യൽ മീഡിയയോ യൂട്യൂബോ ഇല്ലാത്ത കാലമായതിനാൽ പത്രങ്ങളിലൂടെയാണ് ആ വാർത്ത വ്യാപകമായി പ്രചരിച്ചതെന്നും അവർ പറഞ്ഞു.
‘കലാരഞ്ജിനിക്ക് ശബ്ദം നഷ്ടപ്പെട്ടു എന്ന വാർത്ത അന്ന് എല്ലാ പത്രങ്ങളിലും വലിയ പ്രാധാന്യത്തോടെയാണ് വന്നത്. ഇന്നത്തെ പോലെ സോഷ്യൽ മീഡിയയോ യൂട്യൂബോ ഇല്ലായിരുന്നു. അതുകൊണ്ട് പത്രങ്ങളിലൂടെയാണ് ആളുകൾ ആ വിവരം അറിഞ്ഞത്,’ എന്നാണ് താരം പറയുന്നത്.
ശബ്ദം നഷ്ടപ്പെട്ടതിന് പിന്നാലെ വെറും 41 ദിവസം മാത്രമാണ് വിശ്രമം എടുത്തതെന്നും പിന്നീട് അഭിനയരംഗത്തേക്ക് മടങ്ങിയെത്തിയെന്നും കലാരഞ്ജിനി വ്യക്തമാക്കി. ആ സമയത്ത് സിനിമാ സെറ്റുകളിൽ സഹപ്രവർത്തകരിൽ നിന്ന് ലഭിച്ച പിന്തുണ വളരെ വലുതായിരുന്നുവെന്നും അവർ പറഞ്ഞു.
‘കൂടെ അഭിനയിച്ചിരുന്നവരെല്ലാം വലിയ പിന്തുണ തന്നു. അഭിനയിക്കുമ്പോൾ ഡയലോഗുകൾ പതുക്കെ പറഞ്ഞാൽ മതി, ഞങ്ങൾ ശ്രദ്ധിച്ചോളാമെന്ന് അവർ പറഞ്ഞു. സെറ്റുകളിൽ ലഭിച്ച ആ പിന്തുണ എനിക്ക് വലിയ ആശ്വാസമായിരുന്നു,’ കലാരഞ്ജിനി പറഞ്ഞു.
എന്നാൽ സിനിമാ സെറ്റുകളിൽ ആത്മവിശ്വാസം ലഭിച്ചെങ്കിലും പൊതുവേദികളിൽ സംസാരിക്കുകയോ അഭിമുഖങ്ങൾ നൽകുകയോ ചെയ്യുന്നത് തനിക്ക് വലിയ ബുദ്ധിമുട്ടായി മാറിയിരുന്നുവെന്നാണ് താരം വെളിപ്പെടുത്തിയത്. ശബ്ദത്തിലെ മാറ്റം കാരണം ആളുകൾ എങ്ങനെ പ്രതികരിക്കുമെന്ന ആശങ്കയും അപകർഷബോധവും തന്നെ അലട്ടിയിരുന്നുവെന്നും അവർ കൂട്ടിച്ചേർത്തു.
‘പുറത്തൊരു അഭിമുഖം നൽകാനോ ആൾക്കൂട്ടത്തിൽ സംസാരിക്കാനോ എനിക്ക് അപകർഷബോധം തോന്നിത്തുടങ്ങി. അതോടെ ഞാൻ എന്നിലേക്കുതന്നെ ഒതുങ്ങാൻ തുടങ്ങി. കഴിയുന്നത്ര അഭിമുഖങ്ങൾ ഒഴിവാക്കുകയും ചെയ്തു,’ എന്നാണ് താരം പറയുന്നത്.
എന്നാൽ ആ മാനസികാവസ്ഥയിൽ നിന്ന് പുറത്തുകടക്കാൻ സഹായിച്ച പ്രധാന ഘടകങ്ങളിൽ ഒന്നായി ‘ഹൗ ഓൾഡ് ആർ യൂ’ സിനിമയെ കലാരഞ്ജിനി ചൂണ്ടിക്കാട്ടി. ആ ചിത്രത്തിലൂടെ ലഭിച്ച അനുഭവങ്ങളും ആത്മവിശ്വാസവുമാണ് വീണ്ടും മുന്നോട്ടുപോകാനുള്ള ധൈര്യം നൽകിയതെന്ന് താരം വ്യക്തമാക്കി.
Content Highlight: Kalaranjini says she felt inferior after losing her voice
ഡൂള്ന്യൂസില് സബ് എഡിറ്റര് ട്രെയ്നി.
ചേളന്നൂര് ശ്രീനാരായണ ഗുരു കോളേജില് ബി.എ ഇംഗ്ലീഷില് ബിരുദം, കാലിക്കറ്റ് സര്വകലാശാലയില് ജേണലിസത്തില് ബിരുദാനന്തര ബിരുദം.
