വേള്ഡ് റെസ്ലിങ് എന്റര്ടെയ്ന്മെന്റിനോടും ഡബ്ല്യൂ.ഡബ്ല്യൂ.ഇയുടെ സ്ക്വയേര്ഡ് സര്ക്കിളിനോടും വിടപറയും മുമ്പ് കരിയര് സമ്പൂര്ണമാക്കി ഡബ്ല്യൂ.ഡബ്ല്യൂ.ഇ ഇതിഹാസ താരം ജോണ് സീന. കരിയറിലാദ്യമായി ഇന്റര്കോണ്ടിനെന്റല് ചാമ്പ്യന്ഷിപ്പ് സ്വന്തമാക്കിയാണ് താരം കരിയറിന്റെ അവസാന ഘട്ടത്തില് പുതിയ ചരിത്രമെഴുതിയത്.
2002ല് പ്രോ റെസ്ലിങ് അരങ്ങേറ്റം കുറിച്ച ശേഷം ഇതാദ്യമായാണ് ജോണ് സീന ഇന്റര്കോണ്ടിനെന്റല് ചാമ്പ്യന്ഷിപ്പ് സ്വന്തമാക്കുന്നത്. വേള്ഡ് ചാമ്പ്യന്ഷിപ്പും യു.എസ്. ടൈറ്റിലുമടക്കം നിരവധി തവണ സീന ചാമ്പ്യന്ഷിപ്പ് ടൈറ്റില് മധുരം നുണഞ്ഞെങ്കിലും ഐ.സി ടൈറ്റില് താരത്തിന് ഇക്കാലമത്രയും അകലെയായിരുന്നു.
തന്റെ ഹോം സ്റ്റേറ്റായ മാസച്യൂസറ്റ്സില് വെച്ചുകൊണ്ട് തന്നെ വിജയം സ്വന്തമാക്കാന് സാധിച്ചതും ഹോം ടൗണ് ഹീറോയുടെ ടൈറ്റില് വിന് കൂടുതല് മധരുമേറിയതാക്കി.
ബോസ്റ്റണില് നടന്ന റോയിലാണ് ഇന്റര്കോണ്ടിനെന്റല് ചാമ്പ്യന് ഡൊമനിക് മിസ്റ്റീരിയോയെ പരാജയപ്പെടുത്തി വിജയം സ്വന്തമാക്കിയത്. തന്റെ ഐക്കോണിക് ഫിനിഷറായ ആറ്റിറ്റിയൂഡ് അഡ്ജ്സറ്റ്മെന്റിലൂടെയാണ് താരം ഡോമനിക് മിസ്റ്റീരിയോയെ പിന് ചെയ്ത് വിജയം നേടിയത്.
ഈ ടൈറ്റില് വിജയത്തോടെ ഗ്രാന്ഡ് സ്ലാം വിജയം പൂര്ത്തിയാക്കാനും സീനയ്ക്ക് സാധിച്ചു. കരിയറില് വേള്ഡ് ചാമ്പ്യന്ഷിപ്പ്, ടാഗ് ടീം ചാമ്പ്യന്ഷിപ്പ്, യുണൈറ്റഡ് സ്റ്റേറ്റ്സ് ചാമ്പ്യന്ഷിപ്പ്, ഇന്റര്കോണ്ടിനെന്റല് ചാമ്പ്യന്ഷിപ്പ് എന്നിവ നേടുന്ന താരമാണ് ഡബ്ല്യൂ.ഡബ്ല്യൂ.ഇ ഗ്രാന്ഡ് സ്ലാം ചാമ്പ്യന്. ഡബ്ല്യൂ.ഡബ്ല്യൂ. ചരിത്രത്തിലെ 31ാം ഗ്രാന്ഡ് സ്ലാം ചാമ്പ്യനാണ് സീന.
17 തവണയാണ് ജോണ് സീന പ്രൊമോഷന്റെ വേള്ഡ് ടൈറ്റില് സ്വന്തമാക്കിയത്. ഏറ്റവുമധികം തവണ ഈ നേട്ടത്തിലെത്തിയ താരവും സീനയാണ്. റെസില്മാനിയ 41ല് കോഡി റൂഡ്സിനെ പരാജയപ്പെടുത്തിയ സീന, റിക് ഫ്ളെയറിന്റെ 16 വേള്ഡ് ടൈറ്റിലിന്റെ റെക്കോഡും പഴങ്കഥയാക്കിയിരുന്നു. ഈ 17ല് 14 തവണ സീന ഡബ്ല്യൂ.ഡബ്ല്യൂ.ഇ ചാമ്പ്യന്ഷിപ്പും മൂന്ന് തവണ വേള്ഡ് ഹെവിവെയ്റ്റ് ചാമ്പ്യന്ഷിപ്പും സ്വന്തമാക്കി.
അഞ്ച് തവണയാണ് കരിയറിന്റെ വിവിധ ഘട്ടങ്ങളില് സീന യു.എസ് ചാമ്പ്യന്ഷിപ്പ് സ്വന്തമാക്കിയത്. ഡബ്ല്യൂ.ഡബ്ല്യൂ.ഇയില് സീന ആദ്യ സ്വന്തമാക്കിയ ടൈറ്റിലും യു.എസ്. ചാമ്പ്യന്ഷിപ്പാണ്.
ഷോണ് മൈക്കിള്സിനും ബറ്റീസ്റ്റയ്ക്കുമൊപ്പം വേള്ഡ് ടാഗ് ടീം ചാമ്പ്യന്ഷിപ്പ് സ്വന്തമാക്കിയ സീന, ദി മിസ്സിനും ഡേവിഡ് ഒട്ടങ്കയ്ക്കുമൊപ്പം ഡബ്ല്യൂ.ഡബ്ല്യൂ.ഇ ടാഗ് ടീം ചാമ്പ്യന്ഷിപ്പും സ്വന്തമാക്കിയിരുന്നു.
ഇപ്പോള് ഡൊമനിക് മിസീറ്റീരിയോയെ തോല്പിച്ച് ഐ.സി ടൈറ്റിലും താരം തന്റെ പോര്ട്ഫോളിയോയില് ചേര്ത്തുവെച്ചു.
ഡിസംബര് 13ന് വാഷിങ്ടണ് ഡി.സിയില് നടക്കുന്ന സാറ്റര്ഡേ നൈറ്റ് മെയ്ന് ഇവന്റിലാണ് സീന തന്റെ അവസാന മാച്ച് കളിക്കുക. ‘ദി ലാസ്റ്റ് ടൈം ഈസ് നൗ’ ടൂര്ണമെന്റിലെ ജേതാവിനെയാണ് സീന ഈ മാച്ചില് നേരിടുക.
Content Highlight: John Cena wins Intercontinental Championship
