2009ല് മമ്മൂട്ടിയെ നായകനാക്കി നടന് ജഗദീഷ് ഒരു സിനിമ സംവിധാനം ചെയ്യുന്നുവെന്ന വാര്ത്ത വന്നിരുന്നു. എന്നാല് ആ സിനിമ പിന്നീട് ഉപേക്ഷിക്കുകയായിരുന്നു. പ്രേക്ഷകരോടുള്ള തന്റെ സ്നേഹം കാരണമാണ് ആ സിനിമ ഉപേക്ഷിച്ചതെന്ന് പറയുകയാണ് ജഗദീഷ്.
ഇന്ന് ചിന്തിക്കുമ്പോള് അതൊരു ഗംഭീര ഫ്ളോപ്പാകാന് സാധ്യതയുള്ള സിനിമ ആയേനെയെന്നും ബോളിവുഡിലെ സിനിമകളോടുള്ള തന്റെ ക്രേസ് വെച്ചായിരുന്നു അത് ചെയ്യാന് തീരുമാനിച്ചതെന്നും നടന് പറയുന്നു.
മമ്മൂട്ടിയോട് കഥ പറഞ്ഞപ്പോള് കഷ്ടകാലത്തിന് അദ്ദേഹം അതിന് സമ്മതിച്ചെന്നും ജഗദീഷ് കൂട്ടിച്ചേര്ത്തു. ക്ലബ് എഫ്.എം മലയാളത്തിന് നല്കിയ അഭിമുഖത്തില് സംസാരിക്കുകയായിരുന്നു നടന്.
‘ആ സിനിമ പ്രേക്ഷകരോടുള്ള എന്റെ സ്നേഹം കാരണമാണ് ഞാന് ഉപേക്ഷിച്ചത്. ഇന്ന് ചിന്തിച്ചു നോക്കുമ്പോള് അതൊരു ഗംഭീര ഫ്ളോപ്പാകാന് ചാന്സുള്ള സിനിമയായേനെ എന്നാണ് എനിക്ക് തോന്നിയിട്ടുള്ളത്. ബോളിവുഡിലെ ഹിന്ദി സിനിമകളോടുള്ള എന്റെ ക്രേസ് വെച്ചായിരുന്നു ഞാന് ആ സിനിമ ചെയ്യാന് തീരുമാനിച്ചത്.
മമ്മൂക്കയോട് ഞാന് അതിന്റെ കഥയും പറഞ്ഞിരുന്നു. കഷ്ടകാലത്തിന് മമ്മൂക്ക ആ സിനിമക്ക് സമ്മതിക്കുകയും ചെയ്തു. പക്ഷെ ബജറ്റ് കൂടിയത് കാരണം ആ സിനിമ ഞങ്ങള് ഉപേക്ഷിച്ചു. എന്നാല് ഞാന് ഇപ്പോഴും വിശ്വസിക്കുന്ന ഒരു കാര്യമുണ്ട്. ആ സിനിമ മെറ്റീരിയലൈസ് ചെയ്തിരുന്നെങ്കില് അതൊരു വലിയ പരാജയമായി തീര്ന്നേനെ.
അതിന് രണ്ട് കാരണങ്ങളുണ്ട്. ഒന്നാമത്തെ കാര്യം സംവിധാനം എന്റെ പാഷനല്ല എന്നതാണ്. നമുക്ക് പാഷനല്ലാത്ത ഒരു കാര്യം ചെയ്യുമ്പോള് അതിന്റെ റിസള്ട്ട് കുറവായിരിക്കും. അഭിനയം എന്റെ പാഷനാണ്, സ്വപ്നമാണ്. അഭിനയത്തില് അടുത്ത വേഷത്തിന് വേണ്ടി ഞാന് കാത്തിരിക്കുകയാണ്.
ഇനിയും ഇനിയും വേഷങ്ങള് ചെയ്യാന് ഞാന് ആഗ്രഹത്തോടെയും താത്പര്യത്തോടെയും കാത്തിരിക്കുകയാണ്. പക്ഷെ, സംവിധാനത്തെ കുറിച്ച് ചോദിക്കുമ്പോള് ‘അയ്യോ ഇല്ല’ എന്നേ പറയാന് പറ്റുള്ളൂ. കാരണം സംവിധാനം അത്ര ഈസിയായ കാര്യമല്ല. അതൊരു വലിയ ടാസ്ക്കാണ്. എല്ലാ മേഖലയുടെയും നേതൃത്വം ഏറ്റെടുക്കുകയാണ്,’ ജഗദീഷ് പറഞ്ഞു.
Content Highlight: Jagadish Talks About His Movie With Mammootty