ഐ.പി.എല്ലില് എത്ര മത്സരങ്ങള് നഷ്ടപ്പെടുമെന്ന് അറിയില്ല, സൂപ്പര് താരത്തിന് വമ്പന് തിരിച്ചടി; റിപ്പോര്ട്ട്
സ്പോര്ട്സ് ഡെസ്ക്
Friday, 14th March 2025, 5:54 pm
ഐ.പി.എല് മത്സരങ്ങള്ക്കാണ് ലോകമെമ്പാടുമുള്ള ആരാധകര് ആവേശത്തോടെ കാത്തിരിക്കുന്നത്. ക്രിക്കറ്റ് മാമാങ്കത്തിന്റെ പതിനെട്ടാം പതിപ്പിന് മാര്ച്ച് 22നാണ് തുടക്കം. ഡിഫന്ഡിങ് ചാമ്പ്യന്മാരായ കൊല്ക്കത്ത നൈറ്റ് റൈഡേഴ്സും റോയല് ചലഞ്ചേഴ്സ് ബെംഗളൂരുവുമാണ് ആദ്യ മത്സരത്തില് കളത്തിലിറങ്ങുന്നത്. കൊല്ക്കത്തയുടെ ഹോം ഗ്രൗണ്ടായ ഈഡന് ഗാര്ഡന്സാണ് ഉദ്ഘാടന മത്സരത്തിന് വേദിയാവുക.
മുംബൈ ഇന്ത്യന്സിന്റെ സ്റ്റാര് പേസര് ജസ്പ്രീത് ബുംറക്ക് പരിക്ക് കാരണം ഐ.പി.എല്ലിലെ ആദ്യ മത്സരങ്ങള് നഷ്ടമാകുമെന്നാണ് ഇപ്പോള് പുറത്ത് വരുന്ന റിപ്പോര്ട്ടുകള്. ഇന്ത്യന് ക്രിക്കറ്റ് ടീം മെഡിക്കല് ടീമിന്റെ അനുമതി ലഭിച്ചാല് താരം ഏപ്രില് മാസം ആദ്യം മുംബൈ ടീമിനൊപ്പം ചേരുമെന്നാണ് റിപ്പോര്ട്ട്. ഇ.എസ്.പി.എന് ക്രിക് ഇന്ഫോയാണ് ഇക്കാര്യം റിപ്പോര്ട്ട് ചെയ്തത്.
