ഐ.പി.എല്ലില് ബെംഗളൂരുവും ഹൈദരാബാദും തമ്മിലുള്ള മത്സരം ഏകാന ക്രിക്കറ്റ് സ്റ്റേഡിയത്തില് നടക്കുകയാണ്. മത്സരത്തില് ടോസ് നേടിയ ബെംഗളൂരു ബോള് ചെയ്യാനാണ് തീരുമാനിച്ചത്. ഇതോടെ ബാറ്റിങ് അവസാനിച്ച ഹൈദരാബാദ് ആറ് വിക്കറ്റ് നഷ്ടത്തില് 231 റണ്സാണ് നേടിയത്. ഇതോടെ ഒരു തകര്പ്പന് നേട്ടമാണ് ഹൈദരാബാദ് ബെംഗളൂരുവിനെതിരെ സ്വന്തമാക്കിയത്.
ഐ.പി.എല് ചരിത്രത്തില് ഹൈദരാബാദ് ബെംഗളൂരുവിനെതിരെ നേടുന്ന ഏറ്റവും ഉയര്ന്ന സ്കോറാണിത്. മാത്രമല്ല ടൂര്ണമെന്റില് ഹൈദരാബാദിന്റെ ഏറ്റവും ഉയര്ന്ന മൂന്നാമത്തെ സ്കോറും രേഖപ്പെടുത്തിയിരിക്കുകയാണ്. ഹൈദരാബാദിന്റെ ഓപ്പണര് ഇഷാന് കിഷന്റെ കരുത്തിലാണ് വമ്പന് സ്കോറിലേക്ക് ടീമിനെ എത്തിക്കാന് സാധിച്ചത്. ടീമിന് വേണ്ടി 48 പന്തില് നിന്ന് അഞ്ച് സിക്സും ഏഴ് ഫോറും ഉള്പ്പെടെ 94 റണ്സാണ് താരം നേടിയത്. 195.83 എന്ന സ്ട്രൈക്ക് റേറ്റിലാണ് താരം ബാറ്റ് വീശിയത്.
ഓപ്പണര് അഭിഷേക് ശര്മയെ ലുംഗി എങ്കിടി സാള്ട്ടിന്റെ കയ്യിലെത്തിച്ചാണ് ബെംഗളൂരു ആദ്യ വിക്കറ്റ് നേടിയത്. 17 പന്തില് മൂന്ന് സിക്സും മൂന്ന് ഫോറും ഉള്പ്പെടെ 34 റണ്സിനാണ് താരം പുറത്തായത്. അധികം വൈകാതെ നാലാം ഓവറിലെ രണ്ടാം പന്തില് ഭുവനേശ്വര് കുമാര് ട്രാവിസ് ഹെഡ്ഡിനെയും പറഞ്ഞയച്ചു. 10 പന്തില് മൂന്ന് ഫോര് ഉള്പ്പെടെ 17 റണ്സാണ് താരം നേടിയത്. ഹെഡ്ഡിനെ റൊമാരിയോ ഷെപ്പേര്ഡിന്റെ കയ്യിലെത്തിച്ചാണ് ഭുവി വിക്കറ്റ് നേടിയത്.
ഹൈദരാബാദിന് വേണ്ടി ഹെന്റിച്ച് ക്ലാസന് (24), അനികേത് വര്മ (26) എന്നിവര് സ്കോര് ഉയര്ത്താന് സഹായിച്ചു. അതേസമയം ഭുവിക്ക് പുറമെ റൊമാരിയോ ഷെപ്പേര്ഡ് രണ്ട് വിക്കറ്റുകള് നേടിയപ്പോള് ക്രുണാല് പാണ്ഡ്യ, സുയാഷ് ശര്മ, ലുംഗി എങ്കിടി എന്നിവര് ഓരോ വിക്കറ്റും വീഴ്ത്തി.
നിലവില് ബാറ്റിങ്ങിനിറങ്ങിയ ബെംഗളൂരു നാല് ഓവര് പൂര്ത്തിയായപ്പോള് വിക്കറ്റൊന്നും നഷ്ടപ്പെടാതെ 42 റണ്സാണ് നേടിയത്. വിരാട് കോഹ്ലി 17 പന്തില് ആറ് ഫോര് ഉള്പ്പെടെ 29 റണ്സ് നേടിയപ്പോള് ഫില് സാള്ട്ട് നാല് റണ്സും നേടിയാണ് ക്രീസിലുള്ളത്.
