ഐ.പി.എല്ലില് കഴിഞ്ഞ ദിവസം നടന്ന മത്സരത്തില് ലഖ്നൗ സൂപ്പര് ജയന്റ്സിനെതിരെ തകര്പ്പന് വിജയമാണ് റോയല് ചലഞ്ചേഴ്സ് ബെംഗളൂരു സ്വന്തമാക്കിയത്. സ്വന്തം തട്ടകത്തില് നടന്ന മത്സരത്തില് ആറ് വിക്കറ്റിന്റെ തോല്വിയാണ് ലഖ്നൗ വഴങ്ങിയത്.
മത്സരത്തില് ആദ്യം ബാറ്റ് ചെയ്ത ലഖ്നൗ നായകന് റിഷബ് പന്തിന്റെ സെഞ്ച്വറി കരുത്തില് നിശ്ചിത ഓവറില് 227 റണ്സെടുത്തിരുന്നു. എന്നാല് എട്ട് പന്ത് ബാക്കി നില്ക്കെ ബെംഗളൂരു വിജയം സ്വന്തമാക്കുകയായിരുന്നു. അതോടെ അവസാന അങ്കത്തില് തോല്വിയോടെ പന്തിനും സംഘത്തിനും മടങ്ങേണ്ടി വന്നു.
മത്സരത്തില് ബെംഗളൂരുവിനായി മിന്നും പ്രകടനം നടത്തിയത് ക്യാപ്റ്റന് ജിതേഷ് ശര്മയാണ്. 33 പന്തില് ആറ് സിക്സും എട്ട് ഫോറും അടക്കം 85 റണ്സാണ് താരം നേടിയത്. ക്യാപ്റ്റന് പുറമെ വിരാട് കോഹ്ലി 30 പന്തില് 54 റണ്സും മായങ്ക് അഗര്വാള് 23 പന്തില് പുറത്താവാതെ 41 റണ്സുമെടുത്ത് വിജയത്തില് നിര്ണായകമായി.
വിജയത്തിന് പുറമെ ഒരു തകര്പ്പന് റെക്കോഡാണ് ബെംഗളൂരു മത്സരത്തില് സ്വന്തമാക്കിയത്. ഐ.പി.എല് ചരിത്രത്തില് ബെംഗളൂരു ഏറ്റവും കൂടുതല് ഫോര് നേടുന്ന മത്സരമാണിത്. ഇതിന് മുമ്പ് 2015ല് മുംബൈ ഇന്ത്യന്സിനെതിരെയാണ് ബെംഗളൂരു ഒരു ഇന്നിങ്സില് നിന്ന് ഏറ്റവും കൂടുതല് ഫോര് നേടുന്നത്.
30 ഫോര് – ലഖ്നൗ – 2025
26 ഫോര് – മുംബൈ – 2015
25 ഫോര് – ഗുജറാത്ത് – 2023
25 ഫോര് – രാജസ്ഥാന് – 2015
മത്സരത്തില് ലഖ്നൗ നായകന് റിഷബ് പന്തിന്റെ തിരിച്ച് വരവിനുകൂടെയാണ് ആരാധകര് സാക്ഷ്യം വഹിച്ചത്. 61 പന്തില് 118 റണ്സെടുത്തതാണ് താരം താന് കളി മറന്നിട്ടില്ലെന്ന് തെളിയിച്ചത്. എട്ട് സിക്സും 11 ഫോറും അടക്കം 193.44 സ്ട്രൈക്ക് റേറ്റിലാണ് പന്ത് ബെംഗളൂരുവിനെതിരെ ബാറ്റ് ചെയ്തത്. പന്തിന് പുറമെ മിച്ചല് മാര്ഷ് 37 പന്തില് 67 റണ്സും നേടി മികവ് പുലര്ത്തി.
Content Highlight: IPL 2025: RCB In Great Record Achievement In IPL History
