ഐ.പി.എല്ലില് സണ്റൈസേഴ്സ് ഹൈദരാബാദ് – ദല്ഹി ക്യാപ്പിറ്റല്സ് മത്സരം മഴമൂലം ഉപേക്ഷിച്ചിരുന്നു. ആദ്യം ബാറ്റ് ചെയ്ത ദല്ഹി ക്യാപ്പിറ്റല്സിന്റെ ഇന്നിങ്സിന് പിന്നാലെ മഴയെത്തുകയും സാഹചര്യം പ്രതികൂലമായതോടെ മത്സരം ഉപേക്ഷിക്കുകയുമായിരുന്നു. ഇതോടെ ഇരു ടീമുകള്ക്കും ഓരോ പോയിന്റ് വീതം ലഭിച്ചു. മാത്രമല്ല ഹൈദരാബാദിന്റെ പ്ലേ ഓഫ് പ്രതീക്ഷകളും ഇതോടെ അവസാനിച്ചിരിക്കുകയാണ്.
മത്സരത്തില് ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ദല്ഹി നിശ്ചിത ഓവറില് ഏഴ് വിക്കറ്റ നഷ്ടത്തില് നേടിയത് 133 റണ്സായിരുന്നു. മത്സരത്തില് മിന്നും പ്രകടനം കാഴ്ചവെച്ചാണ് ഹൈദരാബാദ് ക്യാപ്റ്റന് പാറ്റ് കമ്മിന്സ് കളം വിട്ടത്. നാല് ഓവറില് 19 റണ്സ് വഴങ്ങി മൂന്ന് വിക്കറ്റുകളാണ് താരം നേടിയത്. 4.75 എന്ന എക്കോണമിയിലാണ് താരം ബാറ്റ് ചെയ്തത്.
ആദ്യ ഓവറിലെയും മൂന്നാം ഓവറിലെയും അഞ്ചാം ഓവറിലെയും ആദ്യ പന്തുകളില് വിക്കറ്റ് നേടിയാണ് കമ്മിന്സ് തിളങ്ങിയത്. പവര്പ്ലേയില് മൂന്ന് ഓവര് പന്തെറിഞ്ഞ് 12 റണ്സ് മാത്രം വഴങ്ങിയാണ് കമ്മിന്സ് മൂന്ന് വിക്കറ്റ് നേടിയത്. കരുണ് നായര് (ഗോള്ഡന് ഡക്ക്), ഫാഫ് ഡു പ്ലെസി (എട്ട് പന്തില് മൂന്ന്), അഭിഷേക് പോരല് (പത്ത് പന്തില് എട്ട്) എന്നിവരെയാണ് താരം മടക്കിയത്.
ഇതോടെ ഒരു വെടിച്ചില്ല് റെക്കോഡ് സ്വന്തമാക്കാനും പാറ്റ് കമ്മിന്സിന് സാധിച്ചിരിക്കുകയാണ്. ഐ.പി.എല് ചരിത്രത്തില് പവര് പ്ലേയില് മൂന്ന് വിക്കറ്റ് നേടുന്ന ക്യാപ്റ്റന് എന്ന നേട്ടമാണ് താരം സ്വന്തമാക്കിയത്. മറ്റൊരു ക്യാപ്റ്റനും നേടാന് സാധിക്കാത്ത കിടിലന് റെക്കോഡാണ് ഹൈദരാബാദ് ക്യാപ്റ്റന് സ്വന്തമാക്കിയത്.
മത്സരത്തില് ദല്ഹിക്ക് വേണ്ടി സ്കോര് ഉയര്ത്തിയത് ആറാമനായി ഇറങ്ങിയ ട്രിസ്റ്റന് സ്റ്റബ്സാണ്. 36 പന്തില് നാല് ഫോര് അടക്കം 41 റണ്സ് നേടി പുറത്താകാതെയാണ് താരം ബാറ്റ് വീശിയത്. ഇംപാക്ട് ആയി ഇറങ്ങിയ അശുതോഷ് ശര്മ 26 പന്തില് മൂന്ന് സിക്സും രണ്ട് ഫോറും ഉള്പ്പെടെ 41 റണ്സ് നേടി മിന്നും പ്രകടനം കാഴ്ചവെച്ചാണ് മടങ്ങിയത്.
Content Highlight: IPL 2025: Pat Cummins Is The First Captain To Achieve Three Wickets In IPL Power Play
