ഐ.പി.എല്ലില് സൂപ്പര് സണ്ഡേ ഡബിള് ഹെഡ്ഡിലെ രണ്ടാം മത്സരത്തില് ദല്ഹി ക്യാപ്പിറ്റല്സിനെതിരെ വമ്പന് വിജയവുമായി ഗുജറാത്ത് ടൈറ്റന്സ്. ക്യാപ്പിറ്റല്സിന്റെ ഹോം ഗ്രൗണ്ടായ ദല്ഹി അരുണ് ജെയ്റ്റ്ലി സ്റ്റേഡിയത്തില് നടന്ന മത്സരത്തില് പത്ത് വിക്കറ്റിന്റെ വിജയമാണ് ടീം സ്വന്തമാക്കിയത്.
ക്യാപ്പിറ്റല്സ് മൂന്ന് വിക്കറ്റ് നഷ്ടത്തില് ഉയര്ത്തിയ 200 റണ്സിന്റെ വിജയലക്ഷ്യം ഒറ്റ വിക്കറ്റ് പോലും നഷ്ടപ്പെടാതെ ടൈറ്റന്സ് മറികടന്നു. സൂപ്പര് താരം കെ.എല്. രാഹുലിന്റെ സെഞ്ച്വറി കരുത്തിലായിരുന്നു ക്യാപ്പിറ്റല്സ് മികച്ച സ്കോറിലെത്തിയത്.
65 പന്ത് നേരിട്ട് പുറത്താകാതെ 112 റണ്സാണ് രാഹുല് നേടിയത്. 14 ഫോറും നാല് സിക്സറും അടക്കം 172.31 സ്ട്രൈക്ക് റേറ്റിലാണ് രാഹുല് ബാറ്റ് വീശിയത്. മാത്രമല്ല ഐ.പി.എല് കരിയറില് രാഹുലിന്റെ അഞ്ചാം സെഞ്ച്വറിയാണിത്. ഇതോടെ ഐ.പി.എല്ലിലെ സെഞ്ച്വറി വേട്ടക്കാരില് നാലാം സ്ഥാനത്തേക്ക് ഉയരാനും രാഹുലിന് സാധിച്ചു. തകര്പ്പന് പ്രകടനത്തിന് പിന്നാലെ മറ്റൊരു താരത്തിനുമില്ലാത്ത ചരിത്ര നേട്ടമാണ് ഐ.പി.എല്ലില് രാഹുല് സ്വന്തമാക്കിയത്.
തകര്പ്പന് പ്രകടനത്തിന് പിന്നാലെ ഒരു മിന്നും നേട്ടമാണ് ഐ.പി.എല്ലില് രാഹുല് സ്വന്തമാക്കിയത്. ഐ.പി.എല് ചരിത്രത്തില് ഒരു വിക്കറ്റ് കീപ്പര് എന്ന നിലയില് ഏറ്റവും കൂടുതല് സിക്സര് നേടുന്ന രണ്ടാമത്തെ താരമെന്ന നേട്ടമാണ് രാഹുല് തന്റെ പേരില് കുറിച്ചത്.
ഐ.പി.എല് ചരിത്രത്തില് ഏറ്റവും കൂടുതല് സെഞ്ച്വറി നേടുന്ന വിക്കറ്റ് കീപ്പര്
ജോസ് ബട്ലര് – 7
കെ.എല്. രാഹുല് – 5
സഞ്ജു സാംസണ് – 3
ജോണി ബെയര്സ്റ്റോ – 2
ആദം ഗില്ക്രിസ്റ്റ് – 2
ബ്രെണ്ടന് മക്കെല്ലം – 2
ക്വിന്റണ് ഡികോക്ക് – 2
മത്സരത്തില് മറുപടി ബാറ്റിങ്ങിനിറങ്ങിയ ഗുജറാത്ത് ടൈറ്റന്സിനായി ഓപ്പണര്മാര് തകര്ത്തടിച്ചു. തൊട്ടതെല്ലാം പൊന്നാക്കിയ സായ് സുദര്ശന് സെഞ്ച്വറിയുമായി തിളങ്ങിയപ്പോള് സെഞ്ച്വറിയോളം പോന്ന ഇന്നിങ്സുമായി ക്യാപ്റ്റന് ശുഭ്മന് ഗില്ലും തിളങ്ങി.
61 പന്തില് നിന്നും പുറത്താകാതെ 108 റണ്സാണ് സായ് സുദശന് സ്വന്തമാക്കിയത്. 12 ഫോറും നാല് സിക്സറും അടക്കം 177.05 സ്ട്രൈക്ക് റേറ്റിലായിരുന്നു താരത്തിന്റെ പ്രകടനം. അതേസമയം ക്യാപ്റ്റനാകട്ടെ 53 പന്ത് നേരിട്ട് 93 റണ്സ് നേടിയാണ് ക്രീസില് തുടര്ന്നത്. ഏഴ് സിക്സറും മൂന്ന് ഫോറുമാണ് ഗില് സ്വന്തമാക്കിയത്.
ടൈറ്റന്സിനായി അര്ഷദ് ഖാന്, പ്രസിദ്ധ് കൃഷ്ണ, സായ് കിഷോര് എന്നിവര് ഓരോ വിക്കറ്റുകള് സ്വന്തമാക്കി.
Content Highlight: IPL 2025: K.L Rahul In Great Record Achievement In IPL
