ഐ.പി.എല് 2025ലെ സതേണ് ഡെര്ബിയില് ചെന്നൈ സൂപ്പര് കിങ്സിനെതിരെ 213 റണ്സിന്റെ ടോട്ടലുമായി റോയല് ചലഞ്ചേഴ്സ് ബെംഗളൂരു. സ്വന്തം തട്ടകമായ ചിന്നസ്വാമി സ്റ്റേഡിയയത്തില് നടന്ന മത്സരത്തിലാണ് അഞ്ച് വിക്കറ്റ് മാത്രം നഷ്ടപ്പെടുത്തി ആര്.സി.ബി മികച്ച സ്കോറിലെത്തിയത്.
വിരാട് കോഹ്ലി, ജേകബ് ബേഥല്, റൊമാരിയോ ഷെപ്പേര്ഡ് എന്നിവരുടെ അര്ധ സെഞ്ച്വറികളുടെ ബലത്തിലാണ് ഹോം ടീം മികച്ച സ്കോറിലെത്തിയത്. വിരാട് 33 പന്തില് 62 റണ്സും ബേഥല് 33 പന്തില് 55 റണ്സും സ്വന്തമാക്കി.
വെറും 14 പന്ത് നേരിട്ട് പുറത്താകാതെ 53 റണ്സ് നേടിയ റൊമാരിയോ ഷെപ്പേര്ഡിന്റെ വെടിക്കെട്ടാണ് ആര്.സി.ബിക്ക് മികച്ച സ്കോര് സമ്മാനിച്ചത്. ആറ് സിക്സറും നാല് ഫോറും അടക്കം 378.57 സ്ട്രൈക്ക് റേറ്റിലാണ് താരം സ്കോര് ചെയ്തത്.
19ാം ഓവറില് ഖലീല് അഹമ്മദും 20ാം ഓവറില് മതീശ പതിരാനയും ഷെപ്പേര്ഡിന്റെ ബാറ്റിന്റെ ചൂടറിഞ്ഞു. 19ാം ഓവറില് 33 റണ്സ് നേടിയ താരം അവസാന ഓവറില് 21 റണ്സും അടിച്ചെടുത്തു.
ഇന്നിങ്സിലെ അവസാന പന്തില്, വ്യക്തിഗത സ്കോര് 47ല് നില്ക്കവെ സിക്സര് നേടി അര്ധ സെഞ്ച്വറി പൂര്ത്തിയാക്കിയതോടെ ഒരു റെക്കോഡും ഷെപ്പേര്ഡിന്റെ പേരില് കുറിക്കപ്പെട്ടു. ഐ.പി.എല് ചരിത്രത്തില് ഏറ്റവും വേഗതയേറിയ രണ്ടാമത് ഹാഫ് സെഞ്ച്വറിയുടെ റെക്കോഡാണ് കുറിക്കപ്പെട്ടത്.
(താരം – ടീം – എതിരാളികള് – അര്ധ സെഞ്ച്വറി പൂര്ത്തിയാക്കാന് നേരിട്ട പന്തുകള് – വര്ഷം എന്നീ ക്രമത്തില്)
യശസ്വി ജെയ്സ്വാള് – രാജസ്ഥാന് റോയല്സ് – കൊല്ക്കത്ത നൈറ്റ് റൈഡേഴ്സ് – 13 – 2023
റൊമാരിയോ ഷെപ്പേര്ഡ് – റോയല് ചലഞ്ചേഴ്സ് ബെംഗളൂരു – ചെന്നൈ സൂപ്പര് കിങ്സ് – 14 – 2025*
പാറ്റ് കമ്മിന്സ് – സണ്റൈസേഴ്സ് ഹൈദരാബാദ് – മുംബൈ ഇന്ത്യന്സ് – 14 – 2022
കെ.എല്. രാഹുല് – കിങ്സ് ഇലവന് പഞ്ചാബ് (പഞ്ചാബ് കിങ്സ്) – ദല്ഹി ഡെയര്ഡെവിള്സ് (ദല്ഹി ക്യാപ്പിറ്റല്സ്) – 14 – 2018
നേരത്തെ, മത്സരത്തില് ടോസ് നഷ്ടപ്പെട്ട് ബാറ്റിങ്ങിനിറങ്ങിയ ആര്.സി.ബിക്ക് മികച്ച തുടക്കമാണ് ലഭിച്ചത്. ആദ്യ വിക്കറ്റില് 97 റണ്സിന്റെ കൂട്ടുകെട്ടുമായി വിരാട് – ബേഥല് സഖ്യം തിളങ്ങി.
മികച്ച രീതിയില് ചെന്നൈ ബൗളര്മാരെ പഞ്ഞിക്കിട്ട് മുമ്പോട്ട് കുതിച്ച ഈ റണ്ണൊഴുക്കിന് തടയിട്ടത് മതീശ പതിരാനയാണ്. പത്താം ഓവറിലെ അഞ്ചാം പന്തില് ബേഥലിനെ പുറത്താക്കിയാണ് സൂപ്പര് കിങ്സ് ആദ്യ ബ്രേക് ത്രൂ നേടിയത്. യുവതാരം ഡെവാള്ഡ് ബ്രെവിസിന്റെ അവിശ്വസനീയമായ ക്യാച്ചിലൂടെയാണ് സൂപ്പര് കിങ്സ് ബേഥലിനെ മടക്കിയത്.
വണ് ഡൗണായെത്തിയ ദേവ്ദത്ത് പടിക്കലിനെ ഒപ്പം കൂട്ടി സ്കോര് ബോര്ഡ് ചലിപ്പിക്കവെ വിരാടിനെയും ടീമിന് നഷ്ടമായി. 33 പന്തില് 62 റണ്സാണ് വിരാട് സ്വന്തമാക്കിയത്. അഞ്ച് വീതം ഫോറും സിക്സറുകളും അടങ്ങുന്നതായിരുന്നു താരത്തിന്റെ ഇന്നിങ്സ്. സാം കറനാണ് വിക്കറ്റ്.
വിരാടും ബേഥലും ചേര്ന്ന് തുടക്കത്തില് സ്വന്തമാക്കിയ മൊമെന്റം പിന്നാലെയെത്തിയവര് കളഞ്ഞുകുളിച്ചു. ദേവ്ദത്ത് പടിക്കല് (15 പന്തില് 17), ജിതേഷ് ശര്മ (എട്ട് പന്തില് ഏഴ്), ക്യാപ്റ്റന് രജത് പാടിദാര് (15 പന്തില് 11) എന്നിവര് നിരാശപ്പെടുത്തി.
18ാം ഓവറിലെ അഞ്ചാം പന്തില് റൊമാരിയോ ഷെപ്പേര്ഡ് ക്രീസിലെത്തിയതോടെ സ്കോര് ബോര്ഡും അതിവേഗം ചലിച്ചു. 17.4 ഓവറില് 157/5 എന്ന നിലയില് നിന്നും 20.0 ഓവറില് 213/5 എന്ന നിലയിലേക്കാണ് ഷെപ്പേര്ഡ് ടീമിനെ നയിച്ചത്. ഷെപ്പേര്ഡ് ചിന്നസ്വാമിയില് കൊടുങ്കാറ്റഴിച്ചുവിടുമ്പോള് തന്റെ ബൗളര്മാര്ക്ക് നേരിടേണ്ടി വന്ന ദുര്ഗതിയോര്ത്ത് നിരാശയോടെ വിക്കറ്റിന് പിന്നില് നല്ക്കാന് മാത്രമാണ് ധോണിക്ക് സാധിച്ചത്.
സൂപ്പര് കിങ്സിനായി മതീശ പതിരാന മൂന്ന് വിക്കറ്റ് വീഴ്ത്തിയപ്പോള് നൂര് അഹമ്മദും സാം കറനും ഓരോ വിക്കറ്റും സ്വന്തമാക്കി.
മറുപടി ബാറ്റിങ്ങിനിറങ്ങിയ സൂപ്പര് കിങ്സ് നിലവില് ആദ്യ ഓവര് പിന്നിടുമ്പോള് വിക്കറ്റൊന്നും നഷ്ടപ്പെടാതെ ആറ് റണ്സ് എന്ന നിലയിലാണ്.
ചെന്നൈ സൂപ്പര് കിങ്സ് പ്ലെയിങ് ഇലവന്
ആയുഷ് മാഹ്ത്രെ, ഷെയ്ഖ് റഷീദ്, സാം കറന്, രവീന്ദ്ര ജഡേജ, ഡെവാള്ഡ് ബ്രെവിസ്, ദീപക് ഹൂഡ, എം.എസ്. ധോണി (ക്യാപ്റ്റന്, വിക്കറ്റ് കീപ്പര്), അന്ഷുല് കാംബോജ്, നൂര് അഹമ്മദ്, ഖലീല് അഹമ്മദ്, മതീശ പതിരാന.
റോയല് ചലഞ്ചേഴ്സ് ബെംഗളൂരു പ്ലെയിങ് ഇലവന്
വിരാട് കോഹ്ലി, ജേകബ് ബേഥല്, ദേവ്ദത്ത് പടിക്കല്, രജത് പാടിദാര് (ക്യാപ്റ്റന്), ജിതേഷ് ശര്മ (വിക്കറ്റ് കീപ്പര്), ടിം ഡേവിഡ്, ക്രുണാല് പാണ്ഡ്യ, റൊമാരിയോ ഷെപ്പേര്ഡ്, ഭുവനേശ്വര് കുമാര്, ലുങ്കി എന്ഗിഡി, യാഷ് ദയാല്.
Content Highlight: IPL 2025: CSK vs RCB: Romario Shepherd scored the second fastest 50 in IPL history