ടി.വി. ചന്ദ്രന്റെ സംവിധാനത്തില് 2004ല് പുറത്തിറങ്ങിയ ചിത്രമാണ് കഥാവശേഷന്. ടി.വി. ചന്ദ്രന് തന്നെ രചന നിര്വഹിച്ച ചിത്രത്തില് ദിലീപ്, ജ്യോതിര്മയി എന്നിവരാണ് കേന്ദ്ര കഥാപാത്രങ്ങളെ അവതരിപ്പിച്ചത്.
കഥാവശേഷനില് കള്ളന് വേഷത്തില് എത്തിയത് നടന് ഇന്ദ്രന്സാണ്. കഥാവശേഷന് മുതലാണ് തനിക്ക് നല്ല കഥാപാത്രങ്ങള് കിട്ടിത്തുടങ്ങിയതെന്ന് ഇന്ദ്രന്സ് പറയുന്നു. കഥാവശേഷനില് അഭിനയിക്കുമ്പോള് തനിക്ക് തീരെ ആത്മവിശ്വാസമുണ്ടായിരുന്നില്ലയെന്നും ക്ലൈമാക്സില് താന് വന്നാല് ആളുകള് ചിരിക്കുമോ എന്നായിരുന്നു ഭയമെന്നും അദ്ദേഹം പറഞ്ഞു.
‘ടി.വി. ചന്ദ്രന് സാറിന്റെ ‘കഥാവശേഷന്’ മുതലാണ് എനിക്ക് നല്ല കഥാപാത്രങ്ങള് കിട്ടിത്തുടങ്ങിയത്. അതിന് മുമ്പ് എം.പി. സുകുമാരന് നായരുടെ സിനിമകളില് അഭിനയിച്ചിട്ടുണ്ടെങ്കിലും കഥാവശേഷനിലെ കള്ളനാണ് ശ്രദ്ധിക്കപ്പെട്ടത്. കഥാവശേഷനില് അഭിനയിക്കുമ്പോള് എനിക്ക് തീരെ ആത്മവിശ്വാസമുണ്ടായിരുന്നില്ല. ക്ലൈമാക്സില് ഞാന് വന്നാല് ആളുകള് ചിരിക്കുമോ എന്നായിരുന്നു ഭയം.
അതുവരെ ക്ലൈമാക്സ് ഷോട്ട് വരുമ്പോള് സീരിയസാണ്. അതില് ഇന്ദ്രന്സ് വേണ്ട എന്നാണ് സംവിധായകന് പറഞ്ഞിരുന്നത്. ഞാനും ചോദിച്ചിട്ടുണ്ട്, ആ സീനില് ഞാന് വേണോ, ഗൗരവം പോകുകില്ലേ എന്ന്. ചന്ദ്രന് ചേട്ടനാണ് ആത്മവിശ്വാസം തന്നത്. ആ സീന് പറഞ്ഞുതരുമ്പോള് എനിക്ക് അദ്ദേഹത്തിന്റെ കണ്ണില് നോക്കാന് പോലും പറ്റിയില്ല. അത്രയേറെ ഇമോഷണലായാണ് അദ്ദേഹം അത് പറഞ്ഞു തന്നത്.
കിംസ് ആശുപതിക്ക് എതിരെ റോഡ് പണി നടക്കുമ്പോള് ട്രാന്സ്ഫോര്മര് വെക്കാന് വേണ്ടി ഒരു ചുറ്റുമതില് കെട്ടിയിരുന്നു. ആ തിട്ട മാത്രമേ അന്നുള്ളൂ. ട്രാന്സ്ഫോര്മര് ഇല്ല. ഞാന് ജനിച്ചു വളര്ന്ന പ്രദേശമാണ് അത്. പൂന്തിറോഡില്. എന്നെ അവിടെ പിടിച്ചിരുത്തി. ഞാന് ഇരുന്നുകരയുന്ന സീനാണു ഷൂട്ട് ചെയ്യുന്നത്.
അപ്പോള് അതുവഴി പോയ സ്ത്രീകള് പറഞ്ഞുകൊണ്ടുപോയി, ദേ കൊച്ചുവേലുവണ്ണന്റെ മോന് ആ കലുങ്കിലിരുന്നു കരയുന്നു എന്ന്. ‘കണ്ണുംനട്ടു കാത്തിരുന്നിട്ടും എന്റെ കരളിന്റെ കരിമ്പുതോട്ടം കട്ടെടുത്തതാരാണ് ‘ എന്ന് ഞാന് പാടി അഭിനയിച്ച പാട്ടൊക്കെ അവിടെയാണ് ഷൂട്ട് ചെയ്തത്,’ ഇന്ദ്രന്സ് പറയുന്നു.
Content highlight: Indrans talks about Kadhavaseshan movie