ടെന്ഡുല്ക്കര് – ആന്ഡേഴ്സന് നാലാം ടെസ്റ്റ് മത്സരം സമനിലയില് അവസാനിച്ചിരിക്കുകയാണ്. മാഞ്ചസ്റ്ററിലെ ഓള്ഡ് ട്രാഫോര്ഡ് ക്രിക്കറ്റ് സ്റ്റേഡിയത്തില് നടന്ന മത്സരത്തിന്റെ അവസാന ദിവസം ഇന്ത്യയെ ഓള്ഔട്ട് ആക്കാന് സാധിക്കാതെ വന്നതോടെയാണ് ബെന് സ്റ്റോക്സിനും സംഘത്തിനും സമനില വഴങ്ങേണ്ടി വന്നത്.
ഇതോടെ ജൂലൈ 31 മുതല് ഓഗസ്റ്റ് നാല് വരെ നടക്കാനിരിക്കുന്ന പരമ്പരയിലെ അഞ്ചാമത്തെയും അവസാനത്തെയും മത്സരത്തിനായുള്ള കാത്തിരിപ്പിലാണ് ആരാധകര്. ദി ഓവലാണ് വേദി. മാത്രമല്ല അവസാന പോരാട്ടത്തിന് മുന്നോടിയായി ഇന്ത്യയും ഇംഗ്ലണ്ടും വലിയ തയ്യാറെടുപ്പിലാണ്. എന്നാല് മത്സരത്തിനൊരുങ്ങുന്ന ഇംഗ്ലണ്ട് ടീം തങ്ങളുടെ ടീമില് നിന്ന് സൂപ്പര് പേസര് ജോഫ്ര ആര്ച്ചറിനെ ഒഴിവാക്കണമെന്ന് പറയുകയാണ് മുന് ഇംഗ്ലണ്ട് താരം സ്റ്റുവര്ട്ട് ബ്രോഡ്.
ഏറെ കാലം പരിക്കിന്റെ പിടിയിലായിരുന്ന ആര്ച്ചര് നാല് വര്ഷത്തിന് ശേഷമായിരുന്നു ഇംഗ്ലണ്ടിന്റെ ടെസ്റ്റ് ടീമിലേക്ക് തിരിച്ചുവരവ് നടത്തിയത്. എന്നാല് ഇന്ത്യക്കെതിരെ തുടര്ച്ചയായി മൂന്ന് മത്സരം കളിക്കാന് ആര്ച്ചറിന് സാധിക്കില്ലെന്നും താരത്തിന്റെ ജോലി ഭാരം കുറക്കണമെന്നാണ് മുന് ഇംഗ്ലണ്ട് താരം ക്യാപ്റ്റന് ബെന് സ്റ്റോക്സിനും പരിശീലകന് ബ്രണ്ടന് മക്കെല്ലത്തോടും ആവശ്യപ്പെടുന്നത്. മാത്രമല്ല ഇനിയും നാല് വര്ഷം ആര്ച്ചറിനെ നഷ്ടപ്പെടുത്താന് കഴിയില്ലെന്ന് ബ്രോഡ് കൂട്ടിച്ചേര്ത്തു.
‘നാല് വര്ഷമായി ഞങ്ങള്ക്ക് അവന് ഇല്ലായിരുന്നു, ഇനി അതേ കാര്യം ആവര്ത്തിക്കാന് കഴിയില്ല. ഈ പരമ്പരയ്ക്കായാണ് നിങ്ങള് അവനെ കൊണ്ടുവന്നത്. ഗസ് ആറ്റ്കിന്സണ് കളിക്കാന് തയ്യാറാണ്. അവന് നിലവില് ജോലിഭാരം ഒരു പ്രശ്നമല്ല. ഗസ് ഒരു ഓപ്ഷനാണ്. ടെസ്റ്റ് ക്രിക്കറ്റിലെ ഉയര്ന്ന നിലവാരമുള്ള ഗസ് പരമ്പരയില് ഇതുവരെ കളിച്ചിട്ടില്ല,’ ബ്രോഡ് സ്കൈ സ്പോര്ട്സില് പറഞ്ഞു.
നിലവില് രണ്ട് മത്സരങ്ങളില് നിന്ന് എട്ട് വിക്കറ്റുകളാണ് ആര്ച്ചര് നേടിയത്. അതേസമയം ഇന്ത്യയുടെ സ്റ്റാര് പേസ് ബൗളര് ജസ്പ്രീത് ബുംറ അഞ്ചാം ടെസ്റ്റിനായി കളത്തിലിറങ്ങുമോ എന്നത് വലിയ ചോദ്യ ചിഹ്നമാണ്. ജോലി ഭാരം ക്രമീകരിക്കുന്നതിന്റെ ഭാഗമായി ഈ പരമ്പരയില് ബുംറ മൂന്ന് മത്സരങ്ങള് മാത്രമായിരിക്കും കളിക്കുക എന്ന് നേരത്തെ വ്യക്തമാക്കിയിരുന്നു.
ഈ മൂന്ന് മത്സരങ്ങള് ബുംറ കളിക്കുകയും ചെയ്തു. പരമ്പര സമനിലയില് അവസാനിപ്പിക്കാന് വിജയം അനിവാര്യമായ അഞ്ചാം ടെസ്റ്റില് ബുംറയുടെ സേവനം ലഭ്യമാകുമോ എന്നാണ് ആരാധകര് ഉറ്റുനോക്കുന്നത്. എന്നിരുന്നാലും ഇന്ത്യന് ബൗളര്മാര്ക്ക് നിലവില് പരിക്കുളൊന്നുമില്ലെന്ന് മുഖ്യ പരിശീലകന് ഗൗതം ഗംഭീര് പറഞ്ഞിരുന്നു. മാത്രമല്ല അഞ്ചാം ടെസ്റ്റിന് മുന്നോടിയായി ബുംറയുടെ ഫിറ്റ്നസ് പരിശോധിക്കുമെന്ന് ക്യാപ്റ്റന് ഗില്ലും പറഞ്ഞിരുന്നു.
Content Highlight: India VS England: Stuart Broad Talking About Jofra Archer
