വോട്ടർപട്ടിക ക്രമക്കേടിനെതിരായ ഇന്ത്യ മുന്നണിയുടെ മഹാറാലി; രാംലീല മൈതാനത്ത് അനുമതി നൽകി ദൽഹി പൊലീസ്

ന്യൂദൽഹി: കേന്ദ്ര തെരഞ്ഞെടുപ്പ് കമ്മീഷൻ നടത്തിയ വോട്ടർപട്ടികയിലെ പ്രത്യേക തീവ്ര പരിഷ്കരണ പ്രക്രിയയിലെ (എസ്.ഐ.ആർ) വ്യാപക ക്രമക്കേടുകൾക്കെതിരെയും മുഖ്യ തെരഞ്ഞെടുപ്പ് കമ്മീഷണർ (സി.ഇ.സി) ഗ്യാനേഷ് കുമാറിന്റെ രാജി ആവശ്യപ്പെട്ടും കോൺഗ്രസ് നവംബർ ഒന്നിന് സംഘടിപ്പിക്കുന്ന മഹാറാലിക്ക് ദൽഹി പൊലീസ് അനുമതി നൽകി. ചരിത്രപ്രസിദ്ധമായ രാംലീലാ മൈതാനത്ത് ‘ഇന്ത്യ’ മുന്നണിയുടെ നേതൃത്വത്തിൽ ആണ് ഈ റാലി നടക്കുന്നത്.

തലസ്ഥാനത്തെ പ്രധാന പ്രതിഷേധ വേദിയെന്ന പദവിയിൽ നിന്ന് ഒക്ടോബർ 12-ന് ജന്തർ മന്തറിനെ ദൽഹി പൊലീസ് ഒഴിവാക്കിയിരുന്നു. തുടർന്ന് പ്രതിഷേധങ്ങൾക്കായി രാംലീലാ മൈതാനം, ബുരാരി ഗ്രൗണ്ട്, സി.ബി.ഡി ഗ്രൗണ്ട് എന്നീ മൂന്ന് ബദൽ വേദികൾ അനുവദിച്ചുകൊണ്ടുള്ള ഉത്തരവ് പുറത്തിറക്കി.

ഈ തീരുമാനത്തിന് പിന്നാലെയാണ് കോൺഗ്രസ് സമർപ്പിച്ച അപേക്ഷ പരിഗണിച്ച് രാംലീലാ മൈതാനം അനുവദിച്ചത്. ഒക്ടോബർ 25 മുതൽ നവംബർ മൂന്ന് വരെയുള്ള ദിവസങ്ങളിലേക്ക് റാലിയുമായി ബന്ധപ്പെട്ട ഒരുക്കങ്ങൾക്കായി നോ ഒബ്ജക്ഷൻ സർട്ടിഫിക്കറ്റ് (എൻ.ഒ.സി) നൽകിയിട്ടുണ്ടെന്ന് ദൽഹി പൊലീസ് ഔദ്യോഗിക വാർത്താക്കുറിപ്പിൽ വ്യക്തമാക്കി.

റാലി സുഗമമായി നടത്തുന്നതിനും ക്രമസമാധാനവും ഗതാഗത നിയന്ത്രണവും ഉറപ്പുവരുത്തുന്നതിനുമായി സംഘാടകരുമായും ട്രാഫിക് പൊലീസുമായും ബന്ധപ്പെട്ട മറ്റ് ഏജൻസികളുമായും നിരന്തരം ഏകോപനം നടത്തുന്നുണ്ടെന്നും പൊലീസ് അറിയിച്ചു.

ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെയും മറ്റ് പ്രമുഖ നേതാക്കളുടെയും നേതൃത്വത്തിൽ, തെരഞ്ഞെടുപ്പ് കമ്മീഷന്റെ നടപടികൾക്കെതിരെ പ്രതിപക്ഷ പാർട്ടികളും സിവിൽ സൊസൈറ്റി സംഘടനകളും ശക്തമായ പ്രക്ഷോഭം തുടരുന്നതിനിടെയാണ് റാലിക്ക് അനുമതി ലഭിച്ചിരിക്കുന്നത്.

ഈ മാസം ആദ്യം പ്രതിപക്ഷ മുന്നണി തുടക്കം കുറിച്ച ‘വോട്ട് ബച്ചാവോ, ദേശ് ബച്ചാവോ’ (വോട്ട് സംരക്ഷിക്കൂ, രാജ്യത്തെ രക്ഷിക്കൂ) ക്യാമ്പയിന്റെ ഭാഗമായാണ് ഈ പരിപാടി സംഘടിപ്പിക്കുന്നത്. വരാനിരിക്കുന്ന പ്രതിഷേധം പ്രതിപക്ഷ ഐക്യത്തിന്റെ നിർണായക ശക്തിപ്രകടനമായി മാറും.

അതേസമയം, തെരഞ്ഞെടുപ്പിൽ മത്സരിച്ച് വിജയിക്കുന്നതിന് പകരം രാജ്യത്ത് ഭരണമാറ്റം ലക്ഷ്യമിട്ട് പ്രതിപക്ഷം നടത്തുന്ന തെരുവ് പ്രതിഷേധങ്ങൾ ജനാധിപത്യവിരുദ്ധവും അരാജകത്വവുമാണെന്നാണ് ബി.ജെ.പിയുടെ വിമർശനം.

എസ്.ഐ.ആർ നടപടികൾക്കെതിരെ ശക്തമായ രാജ്യവ്യാപക പ്രക്ഷോഭമാണ് ഇന്ത്യാ മുന്നണി ആസൂത്രണം ചെയ്തിട്ടുള്ളത്. വോട്ടർപട്ടികയിൽ നിന്ന് പേരുകൾ അകാരണമായി വെട്ടിമാറ്റപ്പെട്ട 13 കോടിയിലധികം പൗരന്മാരിലേക്ക് നേരിട്ടെത്തി അവരെ സഹായിക്കുകയാണ് ഈ നീക്കത്തിന്റെ മുഖ്യ ലക്ഷ്യം.

ഇതിന്റെ ഭാഗമായി ഒക്ടോബർ 10 മുതൽ ഒക്ടോബർ 20 വരെ രാജ്യത്തുടനീളം മാർച്ചുകളും പൊതുയോഗങ്ങളും നടത്തുമെന്ന് കോൺഗ്രസ് ജനറൽ സെക്രട്ടറി ജയറാം രമേശ് വ്യക്തമാക്കിയിരുന്നു.

വോട്ടർപട്ടികയിൽ നിന്ന് ഒഴിവാക്കപ്പെട്ടവരെ കണ്ട് വിവരങ്ങൾ ശേഖരിക്കുന്നതിനും അവരുടെ പേരുകൾ വീണ്ടും ചേർക്കുന്നതിനുമായി ജില്ലാ തലം മുതൽ ഗ്രാമീണ തലം വരെ നീളുന്ന വിപുലമായ ക്യാമ്പയിനാണ് പാർട്ടി നടത്തുന്നത്.

ഈ ക്യാമ്പയിനുകൾ പൂർത്തിയാകുന്നതോടെയാണ് എല്ലാ പ്രതിപക്ഷ പാർട്ടി നേതാക്കളെയും അണിനിരത്തി നവംബർ ഒന്നിന് ‘ഇന്ത്യ’ മുന്നണിയുടെ മഹാറാലി നടക്കുന്നത്.

ഇതിനുപുറമെ, വോട്ടർ അവകാശ സംരക്ഷണത്തിന്റെ ഭാഗമായി ‘ചലോ ദൽഹി’ എന്ന പരിപാടിയും ആസൂത്രണം ചെയ്തിട്ടുണ്ട്. നവംബർ 25, 26 തീയതികളിൽ ദൽഹിയുടെ സമീപ പ്രദേശങ്ങളിൽ നിന്ന് ആരംഭിക്കുന്ന ആറ് പ്രത്യേക യാത്രകൾ ഒടുവിൽ രാജ്യതലസ്ഥാനത്ത് സംഗമിക്കുമെന്നും ജയറാം രമേശ് അറിയിച്ചു.

Content Highlight:INDIA bloc’s mega rally against irregularities in the electoral roll; Delhi Police grants permission at Ramlila Maidan.