ഇന്ത്യയുടെ ഇംഗ്ലണ്ട് പര്യടനത്തിന് മുമ്പ് നടക്കുന്ന അണ്ഒഫീഷ്യല് ടെസ്റ്റില് സെഞ്ച്വറിയുമായി തിളങ്ങി കരുണ് നായര്. സെന്റ് ലോറന്സ്, കാന്റര്ബറിയിലെ സ്പിറ്റ്ഫയര് ഗ്രൗണ്ടില് ഇംഗ്ലണ്ട് ലയണ്സിനെതിരെയാണ് കരുണ് നായര് സെഞ്ച്വറിയുമായി തിളങ്ങിയത്.
നേരിട്ട 85ാം പന്തില് അര്ധ സെഞ്ച്വറി പൂര്ത്തിയാക്കിയ കരുണ് 155ാം പന്തിലാണ് ട്രിപ്പിള് ഡിജിറ്റ് തൊട്ടത്. കരിയറിലെ 24ാം ഫസ്റ്റ് ക്ലാസ് സെഞ്ച്വറിയാണ് താരം ഇംഗ്ലണ്ട് ലയണ്സിനെതിരെ അടിച്ചെടുത്തത്.
സെഞ്ച്വറിയിലും അവസാനിപ്പിക്കാതെ ഇരട്ട സെഞ്ച്വറി ലക്ഷ്യമിട്ടാണ് കരുണ് ബാറ്റ് വീശുന്നത്.
മത്സരത്തില് ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ എ-യ്ക്ക് തുടക്കത്തിലേ പാളിയിരുന്നു. ടീം സ്കോര് 12ല് നില്ക്കവെ ക്യാപ്റ്റന് അഭിമന്യു ഈശ്വരന് പുറത്തായി. 17 പന്തില് എട്ട് റണ്സാണ് താരം സ്വന്തമാക്കിയത്.
അധികം വൈകാതെ 55 പന്തില് 24 റണ്സടിച്ച യശസ്വി ജെയ്സ്വാളും മടങ്ങി. എഡ്ഡി ജാക്കിന്റെ പന്തില് വിക്കറ്റ് കീപ്പര് ജെയിംസ് റ്യൂവിന് ക്യാച്ച് നല്കിയായിരുന്നു താരത്തിന്റെ മടക്കം.
നാലാം വിക്കറ്റില് സര്ഫറാസ് ഖാനെത്തിയതോടെ ഇന്ത്യ സ്കോര് ഉയര്ത്തി. മൂന്നാം വിക്കറ്റില് 182 റണ്സ് കൂട്ടിച്ചേര്ത്ത് കരുണ് നായരും സര്ഫറാസ് ഖാനും ഇന്ത്യയ്ക്ക് തുണയായി.
ടീം സ്കോര് 223ല് നില്ക്കവെ മൂന്നാം വിക്കറ്റായി സര്ഫറാസ് മടങ്ങി. 119 പന്തില് 92 റണ്സടിച്ചാണ് താരം തിരിച്ചുനടന്നത്. പിന്നാലെയെത്തിയ ധ്രുവ് ജുറെലിനെ ഒപ്പം കൂട്ടി കരുണ് നായര് വീണ്ടും ഇന്ത്യയെ താങ്ങി നിര്ത്തുന്ന കൂട്ടുകെട്ട് പടുത്തുയര്ത്തുകയാണ്.
നിലവില് 85 ഓവര് പിന്നിടുമ്പോള് മൂന്ന് വിക്കറ്റ് നഷ്ടത്തില് 394 എന്ന നിലയിലാണ് ഇന്ത്യ എ ബാറ്റിങ് തുടരുന്നത്. 235 പന്തില് 181 റണ്സ് എന്ന നിലയില് കരുണ് നായര് ബാറ്റിങ് തുടരുകയാണ്. 85 പന്തില് 73 റണ്സുമായി ധ്രുവ് ജുറെലാണ് ക്രീസില് ഒപ്പമുള്ളത്.
