ടെന്ഡുല്ക്കര് – ആന്ഡേഴ്സണ് ട്രോഫിക്കായുള്ള ഇന്ത്യയുടെ ഇംഗ്ലണ്ട് പര്യടനത്തിലെ നാലാം മത്സരത്തില് ടോസ് വിജയിച്ച് ഇംഗ്ലണ്ട്. മാഞ്ചസ്റ്ററിലെ ഓള്ഡ് ട്രാഫോര്ഡ് ക്രിക്കറ്റ് ഗ്രൗണ്ടില് ടോസ് നേടിയ ആതിഥേയര് ഇന്ത്യയെ ബാറ്റിങ്ങിനയച്ചു.
അഞ്ച് മത്സരങ്ങളുടെ പരമ്പരയിലെ ആദ്യ മൂന്ന് ടെസ്റ്റുകള് അവസാനിക്കുമ്പോള് ഇംഗ്ലണ്ട് 2-1ന് മുമ്പിലാണ്. മൂന്നാം മത്സരത്തില് കണ്മുമ്പില് കണ്ട ജയം കൈവിട്ടുകളഞ്ഞാണ് ഇന്ത്യ മാഞ്ചസ്റ്ററിലേക്കിറങ്ങിയിരിക്കുന്നത്.
തങ്ങളുടെ ക്രിക്കറ്റ് ചരിത്രത്തില് ഒരിക്കല്പ്പോലും വിജയിക്കാന് സാധിക്കാത്ത ഓള്ഡ് ട്രാഫോര്ഡ് എന്ന രാവണന് കോട്ടയിലാണ് ഇന്ത്യ പരമ്പരയിലെ ഏറ്റവും നിര്ണായകമായ മത്സരം കളിക്കുന്നത്.
ജയത്തില് കുറഞ്ഞതൊന്നും ഇന്ത്യ മാഞ്ചസ്റ്ററില് ലക്ഷ്യമിടുന്നില്ല. മത്സരം സമനിലയില് അവസാനിച്ചാല് പോലും ഇന്ത്യയ്ക്ക് പരമ്പര നേടാന് സാധിക്കാതെ വരും. ഇത്തരമൊരു സാഹചര്യത്തിലാണ് ഇന്ത്യ ഓള്ഡ് ട്രാഫോര്ഡ് ടെസ്റ്റിനിറങ്ങുന്നത്.
ജയമില്ലാതെ ഇന്ത്യ ഏറ്റവുമധികം മത്സരം കളിച്ച വേദിയാണ് മാഞ്ചസ്റ്റര്. 1936 മുതല് ഇവിടെ ആകെ കളിച്ചത് ഒമ്പത് മത്സരം. നാലിലും തോറ്റു. ഒടുവില് കളിച്ച 2014ലെ ടെസ്റ്റില് ഇന്ത്യയ്ക്ക് പരാജയം രുചിക്കേണ്ടി വന്നത് ഇന്നിങ്സിനും 54 റണ്സിനും. ശേഷിച്ച അഞ്ച് മത്സരം സമനിലയില്.
ജയമില്ലാതെ ഇന്ത്യ ഏറ്റവുമധികം മത്സരം കളിച്ച വേദികള്
(വേദി – രാജ്യം – ആകെ കളിച്ച മത്സരം – തോല്വി – സമനില എന്നീ ക്രമത്തില്)
അതേസമയം, ആദ്യ ഇന്നിങ്സ് ബാറ്റിങ്ങിനിറങ്ങിയ ഇന്ത്യ ആദ്യ അഞ്ച് ഓവര് പിന്നിടുമ്പോള് വിക്കറ്റ് നഷ്ടപ്പെടാതെ 15 എന്ന നിലയിലാണ്. 16 പന്തില് അഞ്ച് റണ്സുമായി കെ.എല്. രാഹുലും 14 പന്തില് എട്ട് റണ്സുമായി യശസ്വി ജെയ്സ്വാളുമാണ് ക്രീസില്.
