![?php echo $post['title']; ?>](https://assets.doolnews.com/w/900x473/2025/07/vaibhav-1.jpg)
ഇന്ത്യ അണ്ടര്‍ 19 ടീമിന്റെ ഇംഗ്ലണ്ട് പര്യടനത്തിലെ മൂന്നാം മത്സരത്തിലും വിജയം സ്വന്തമാക്കി ഇന്ത്യ. ഇതോടെ അഞ്ച് മത്സരങ്ങളുടെ പരമ്പരയിലെ മൂന്ന് മത്സരങ്ങള്‍ അവസാനിക്കുമ്പോള്‍ ഇന്ത്യ 2-1 എന്ന നിലയില്‍ മുമ്പിലാണ്.
കഴിഞ്ഞ ദിവസം നോര്‍താംപ്ടണില്‍ നടന്ന മത്സരത്തില്‍ നാല് വിക്കറ്റിന്റെ വിജയമാണ് ഇന്ത്യ സ്വന്തമാക്കിയത്. ഇംഗ്ലണ്ട് ഉയര്‍ത്തിയ 269 റണ്‍സിന്റെ വിജയലക്ഷ്യം 33 പന്ത് ശേഷിക്കെ ഇന്ത്യ മറികടന്നു.
വൈഭവ് സൂര്യവംശിയുടെ വെടിക്കെട്ടിന്റെ കരുത്തിലാണ് ഇന്ത്യ വിജയം സ്വന്തമാക്കിയത്. 31 പന്ത് നേരിട്ട താരം 86 റണ്‍സടിച്ചാണ് മടങ്ങിയത്. ഒമ്പത് സിക്‌സറും ആറ് ഫോറും അടക്കം 277.42 സ്‌ട്രൈക്ക് റേറ്റിലാണ് വൈഭവ് റണ്ണടിച്ചത്.
View this post on Instagram
ഈ ഇന്നിങ്‌സിന് പിന്നാലെ ഒരു റെക്കോഡും സൂര്യവംശി സ്വന്തമാക്കിയത്. ഒരു അണ്ടര്‍ 19 ഏകദിന ഇന്നിങ്‌സില്‍ ഏറ്റവുമധികം സിക്‌സര്‍ നേടിയ ഇന്ത്യന്‍ താരമെന്ന നേട്ടത്തിലാണ് വൈഭവ് തന്റെ പേരെഴുതിച്ചേര്‍ത്തത്.
ഒരു U19 ഏകദിന ഇന്നിങ്‌സില്‍ ഏറ്റവുമധികം സിക്‌സര്‍ നേടിയ ഇന്ത്യന്‍ താരം
(താരം – എതിരാളികള്‍ – സിക്‌സര്‍ – വേദി – വര്‍ഷം എന്നീ ക്രമത്തില്‍)
വൈഭവ് സൂര്യവംശി – ഇംഗ്ലണ്ട് – 9 – നോര്‍താംപ്ടണ്‍ – 2025*
രാജ് ബാവ – ഉഗാണ്ട – 8 – തരൗബ – 2022
മന്‍ദീപ് സിങ് – ഓസ്‌ട്രേലിയ – 8 – ഹൊബാര്‍ട്ട് – 2009
അങ്കുശ് ബെയ്ന്‍സ് – സിംബാബ്‌വേ – 7 – വിശാഖപട്ടണം – 2013
View this post on Instagram
മത്സരത്തില്‍ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇംഗ്ലണ്ടിനായി ക്യാപ്റ്റന്‍ തോമസ് റ്യൂ മികച്ച പ്രകടനം കാഴ്ചവെച്ചു. 44 പന്തില്‍ പുറത്താകാതെ 76 റണ്‍സാണ് റ്യൂ അടിച്ചെടുത്തു. 61 പന്തില്‍ 62 റണ്‍സ് നേടിയ ബി.ജെ. ഡോവ്കിന്‍സും 43 പന്തില്‍ 41 റണ്‍സ് നേടിയ ഐസാക് മുഹമ്മദും ഇംഗ്ലണ്ടിനായി തിളങ്ങി.
ഒടുവില്‍ നിശ്ചിത ഓവറില്‍ (40) ആറ് വിക്കറ്റ് നഷ്ടത്തില്‍ ഇംഗ്ലണ്ട് 268 റണ്‍സ് നേടി.
ഇന്ത്യയ്ക്കായി കനിഷ്‌ക് ചൗഹാന്‍ മൂന്ന് വിക്കറ്റ് നേടിയപ്പോള്‍ നമന്‍ പുഷ്പക്, വിഹാന്‍ മല്‍ഹോത്ര, ദീപേഷ് ദേവേന്ദ്രന്‍ എന്നിവര്‍ ഓരോ വിക്കറ്റ് വീതവും സ്വന്തമാക്കി.
മറുപടി ബാറ്റിങ്ങിനിറങ്ങിയ ഇന്ത്യയ്ക്ക് അഭിജ്ഞാന്‍ കുണ്ഡുവിന്റെ വിക്കറ്റ് തുടക്കത്തിലേ നഷ്ടമായെങ്കിലും രണ്ടാം വിക്കറ്റില്‍ വൈഭവ് സൂര്യവംശിയും വിഹാല്‍ മല്‍ഹോത്രയും മികച്ച പ്രകടനം കാഴ്ചവെച്ചു.
എട്ടാം ഓവറില്‍ ടീം സ്‌കോര്‍ 111ല്‍ നില്‍ക്കവെ രണ്ടാം വിക്കറ്റായി വൈഭവ് മടങ്ങി. പിന്നാലെയെത്തിയ മൗല്യരാജ് സിങ് ഛാവ്ദ പൂജ്യത്തിന് മടങ്ങി.
രാഹുല്‍ കുമാര്‍ (35 പന്തില്‍ 27), ഹര്‍വംശ് പങ്കാലിയ (23 പന്തില്‍ 11) എന്നിവരുടെ വിക്കറ്റും ഇന്ത്യയ്ക്ക് നഷ്ടമായി.
എന്നാല്‍ ഏഴാം വിക്കറ്റില്‍ കനിഷ്‌ക് ചൗഹാനും (42 പന്തില്‍ 43), ആര്‍. എസ്. അംബരീഷും മികച്ച പ്രകടനം കാഴ്ചവെച്ചതോടെ ഇന്ത്യ വിജയം പിടിച്ചടക്കി.
Content Highlight: IND U19 vs ENG U19: Vaibhav Suryavashi set the record of most 6s for India in an U19 ODI
