ബെംഗളൂരു: ലൈംഗികാതിക്രമക്കേസില് ജെ.ഡി.എസ് മുന് എം.പി പ്രജ്ജ്വല് രേവണ്ണയ്ക്ക് ജീവപര്യന്തം. ബെംഗളൂരിലെ പ്രത്യേക കോടതിയാണ് ശിക്ഷ വിധിച്ചിരിക്കുന്നത്. തടവിനൊപ്പം 20 ലക്ഷം രൂപ പിഴയൊടുക്കണമെന്നും കോടതി വിധിച്ചിട്ടുണ്ട്.
കഴിഞ്ഞ ദിവസം പ്രജ്ജ്വല് രേവണ്ണ കുറ്റക്കാരനാണെന്ന് ബെംഗളൂരുവിലെ പ്രത്യേക കോടതി കണ്ടെത്തിയിരുന്നു. മൈസൂരിലെ കെ.ആര്. നഗറില് നിന്നുള്ള വീട്ടുജോലിക്കാരി നല്കിയ ബലാത്സംഗ കേസിലാണ് പ്രജ്ജ്വല് രേവണ്ണയെ ശിക്ഷിച്ചുകൊണ്ട് കോടതി വിധി പ്രസ്താവിച്ചിരിക്കുന്നത്. കേസ് രജിസ്റ്റര് ചെയ്ത് 14 മാസങ്ങള്ക്ക് ശേഷമാണ് ഈ വിധി പ്രസ്താവം.
പ്രജ്ജ്വല് രേവണ്ണ തെറ്റുചെയ്തെന്ന് തെളിഞ്ഞാല് അവനെ തൂക്കിക്കൊല്ലട്ടെ എന്ന് ജെ.ഡി.എസ്. എം.എല്.എയും പ്രജ്വലിന്റെ അച്ഛനുമായ എച്ച്.ഡി. രേവണ്ണ കര്ണാടക നിയമസഭയില് ഈയിടെ പറഞ്ഞിരുന്നു.
ലോക്സഭാ തെരഞ്ഞെടുപ്പ് കാലത്ത് കര്ണാടക രാഷ്ട്രീയത്തെ പിടിച്ചുകുലുക്കിയ കേസാണ് പ്രജ്ജ്വല് രേവണ്ണക്കെതിരായ ലൈംഗികാതിക്രമക്കേസുകള്. നിരവധി പേരെ പ്രജ്വല് പീഡനത്തിന് ഇരയാക്കിയെന്നായിരുന്നു വെളിപ്പെടുത്തല്.
ഇത് സംബന്ധിച്ച തെളിവുകള് ഉള്പ്പെടുന്ന പെന്ഡ്രൈവുകള് കര്ണാടകയില് ഉടനീളം വിതരണം ചെയ്യപ്പെടുകയും ചെയ്തു. ഈ കേസ് കാരണം കര്ണാടകയില് ജെ.ഡി.എസിനും സംഖ്യകക്ഷിയായ ബി.ജെ.പിക്കും വലിയ തിരിച്ചടി സംഭവിക്കുകയും ചെയ്തു.
Content Highlight: Former JDS MP Prajwal Revanna sentenced to life in sexual assault case