കേരള സ്റ്റേറ്റ് അവാര്ഡില് നിന്ന് വ്യത്യസ്തമാണ് തമിഴ്നാട് സര്ക്കാരിന്റെ സംസ്ഥാന പുരസ്കാരങ്ങള്. ഓരോ വര്ഷവും പ്രഖ്യാപിക്കാതെ നാലും അഞ്ചും വര്ഷം കൂടുമ്പോഴാണ് പുരസ്കാരങ്ങള് പ്രഖ്യാപിക്കാറുള്ളത്. 2016-2022 വരെയുള്ള പുരസ്കാരങ്ങള് ഇന്ന് സര്ക്കാര് പ്രഖ്യാപിച്ചിരിക്കുകയാണ്. ഇതില് മികച്ച നടിമാരുടെ ലിസ്റ്റാണ് ശ്രദ്ധേയമാകുന്നത്.
ഏഴ് വര്ഷത്തെ മികച്ച നടിമാരില് അഞ്ചും മലയാളി നടിമാരാണ്. 2016ല് കീര്ത്തി സുരേഷ് (പാമ്പു സട്ടൈ), 2017ല് നയന്താര (അറം), 2018ല് ജ്യോതിക (ചെക്ക ചിവന്ത വാനം), 2019ല് മഞ്ജു വാര്യര് (അസുരന്), 2020ല് അപര്ണ ബാലമുരളി (സൂരറൈ പോട്ര്), 2021ല് ലിജോമോള് (ജയ് ഭീം), 2022ല് സായ് പല്ലവി (ഗാര്ഗി) എന്നിങ്ങനെയാണ് പുരസ്കാര ജേതാക്കള്.
ഇതില് സായ് പല്ലവിയും ജ്യോതികയുമൊഴികെ ബാക്കിയെല്ലാം മലയാളി നടിമാരാണ്. തമിഴ് സിനിമാലോകത്ത് മലയാളി നടിമാരുടെ ആധിപത്യമാണ് ഇപ്പോള് സോഷ്യല് മീഡിയയിലെ പ്രധാന ചര്ച്ച. മികച്ച പെര്ഫോമന്സുകള് കൊണ്ട് നിരൂപക പ്രശംസയോടൊപ്പം പുരസ്കാര നേട്ടവും സ്വന്തമാക്കി മലയാളി താരങ്ങള് സിനിമാപ്രേമികളെ ഞെട്ടിച്ചിരിക്കുകയാണ്.
മികച്ച നടിമാരുടെ പുരസ്കാരത്തോടൊപ്പം സൂര്യ സ്വന്തമാക്കിയ പുരസ്കാരങ്ങളും ചര്ച്ചാവിഷയമായി. 2016ല് 24 എന്ന ചിത്രത്തിന് നാല് പുരസ്കാരമാണ് സൂര്യയുടെ ഉടമസ്ഥതയിലുള്ള 2ഡി പ്രൊഡക്ഷന്സ് സ്വന്തമാക്കിയത്. സൂരറൈ പോട്രിലൂടെ മികച്ച നടനുള്ള അവാര്ഡും സൂര്യ തന്റെ പേരിലാക്കി. കരിയറിലെ നാലാമത്തെ സ്റ്റേറ്റ് അവാര്ഡാണ് സൂര്യ സ്വന്തമാക്കിയത്.
2021ലെ പുരസ്കാരങ്ങളില് ജയ് ഭീമും തിളങ്ങി. മികച്ച ചിത്രം, നടി എന്നീ വിഭാഗങ്ങളിലാണ് ചിത്രം അവാര്ഡ് നേടിയത്. അവാര്ഡ് പ്രഖ്യാപിക്കുന്നതില് തമിഴ്നാട് സര്ക്കാര് നടത്തുന്ന കാലതാമസം സോഷ്യല് മീഡിയയില് വലിയ ട്രോളുകള്ക്കും വഴിവെക്കുന്നുണ്ട്. ഇത്രയും വൈകി അവാര്ഡ് നല്കുന്നതിലും ഭേദം കൊടുക്കാതിരിക്കുന്നതാണെന്ന് പലരും വിമര്ശിക്കുന്നു.
