ഇന്ത്യയുടെ ശ്രീലങ്കന് പര്യടനത്തിലെ ആദ്യ മത്സരം ഗല്ലെയില് നടക്കുകയാണ്. മഴ രസംകൊല്ലിയായെത്തിയ മത്സരത്തിന്റെ രണ്ടാം ദിവസം ലഞ്ചിന് പിരിയുമ്പോള് രണ്ട് വിക്കറ്റ് നഷ്ടത്തില് 288 എന്ന നിലയില് സന്ദര്ശകര് ശക്തമായ നിലയില് ബാറ്റിങ് തുടരുകയാണ്.
യുവതാരം ദേവ്ദത്ത് പടിക്കലിന്റെ സെഞ്ച്വറി കരുത്തിലാണ് ഇന്ത്യ സ്കോര് ഉയര്ത്തുന്നത്. 178 പന്തില് 131 റണ്സുമായി പടിക്കല് ക്രീസില് തുടരുകയാണ്. 12 ഫോറും ഒരു സിക്സറും താരത്തിന്റെ ബാറ്റില് നിന്നും ഇതിനോടകം പിറവിയെടുത്തിട്ടുണ്ട്.
കരിയറിലെ മൂന്നാം ടെസ്റ്റ് മത്സരം കളിക്കുന്ന താരത്തിന്റെ ആദ്യ സെഞ്ച്വറിയാണിത്. അന്താരാഷ്ട്ര തലത്തിലും ഇതാദ്യമായാണ് താരം ട്രിപ്പിള് ഡിജിറ്റ് തൊടുന്നത്.
ഇതോടെ ഇന്ത്യയ്ക്കായി അന്താരാഷ്ട്ര സെഞ്ച്വറി നേടുന്ന താരങ്ങളുടെ എലീറ്റ് ലിസ്റ്റിലും പടിക്കല് ഇടം നേടി. ഈ ലിസ്റ്റില് ഇടം പിടിക്കുന്ന 113ാം താരമാണ് ദേവ്ദത്ത്.
32 റണ്സ് നേടിയ യശസ്വി ജെയ്സ്വാളിന്റെയും 16 റണ്സടിച്ച ക്യാപ്റ്റന് ശുഭ്മന് ഗില്ലിന്റെയും വിക്കറ്റുകളാണ് ഇന്ത്യയ്ക്ക് ഇതിനോടകം നഷ്ടമായത്. യശസ്വി ജെയ്സ്വാള് റണ് ഔട്ടായപ്പോള് പ്രഭാത് ജയസൂര്യയാണ് ക്യാപ്റ്റനെ പുറത്താക്കിയത്.
36 പന്തില് 27 റണ്സുമായി റിഷബ് പന്താണ് പടിക്കലിന് കൂട്ടായി ക്രീസിലുള്ളത്.
മികച്ച രീതിയില് ബാറ്റിങ് തുടരവെ റിട്ടയര്ഡ് ഹര്ട്ടായാണ് വൈസ് ക്യാപ്റ്റന് മടങ്ങിയത്. 162 പന്തില് 77 റണ്സ് നേടി നില്ക്കവെയായിരുന്നു താരത്തിന്റെ മടക്കം.
വേള്ഡ് ടെസ്റ്റ് ചാമ്പ്യന്ഷിപ്പിന്റെ ഫൈനല് ലക്ഷ്യമിടുന്ന ഇരു ടീമുകളും വിജയം മാത്രം ലക്ഷ്യമിട്ടാണ് കളി കളറാക്കുന്നത്.
ഇന്ത്യ പ്ലെയിങ് ഇലവന്
യശസ്വി ജെയ്സ്വാള്, കെ.എല് രാഹുല്, ശുഭ്മന് ഗില് (ക്യാപ്റ്റന്), ദേവദത്ത് പടിക്കല്, റിഷബ് പന്ത് (വിക്കറ്റ് കീപ്പര്), രവീന്ദ്ര ജഡേജ, ധ്രുവ് ജുറെല്, കുല്ദീപ് യാദവ്, മാനവ് സുതര്, മുഹമ്മദ് സിറാജ്, പ്രസിദ്ധ് കൃഷ്ണ.
ശ്രീലങ്ക പ്ലെയിങ് ഇലവന്
ലാഹിരു ഉദാര, നിഷാന് മധുഷ്ക, ദിനേശ് ചണ്ഡിമല്, കാമിന്ദു മെന്ഡിസ്, ധനഞ്ജയ ഡി സില്വ (ക്യാപ്റ്റന്), സോണാല് ദിനുഷ, നിരോഷന് ഡിക്കേ്വെല്ല (വിക്കറ്റ് കീപ്പര്), കേശാര നുവന്ത, പ്രഭാത് ജയസൂര്യ, ലാഹിരു കുമാര, അസിത ഫെര്ണാണ്ടോ.
Content Highlight: Devdutt Padikkal becomes the 113th batter to score international century for India