![?php echo $post['title']; ?>](https://assets.doolnews.com/w/900x473/2025/11/rono.jpg)
സൗദി പ്രോ ലീഗില്‍ അല്‍ ഖലീജയ്‌ക്കെതിരെ തകര്‍പ്പന്‍ വിജയമാണ് ക്രിസ്റ്റിയാനോ റൊണാള്‍ഡോയുടെ അല്‍നസര്‍ സ്വന്തമാക്കിയത്. അല്‍ അവ്വാല്‍ പാര്‍ക്കില്‍ നടന്ന മത്സരത്തില്‍ ഒന്നിനെതിരെ നാല് ഗോളുകള്‍ക്കാണ് അല്‍ നസര്‍ വിജയിച്ചു കയറിയത്.
അല്‍ നസറിന് വേണ്ടി ആദ്യ ഗോള്‍ നേടിയത് ജാവോ ഫെലിക്‌സാണ്. 39ാം മിനിട്ടിലായിരുന്നു താരത്തിന്റെ സ്‌ട്രൈക്ക്. 42ാം മിനിട്ടില്‍ വെസ്‌ലിയും ടീമിന് ലീഡ് നേടിക്കൊടുത്തു. തുടര്‍ന്ന് ഖലീജക്ക് വേണ്ടി മുറാദ് അല്‍ അവ്‌സാവി 47ാം മിനിട്ടില്‍ അല്‍ നസറിനെ തിരിച്ചടിച്ചു.
ആദ്യ പകുതിക്ക് ശേഷം സാദിയോ മാനെ 77ാം മിനിട്ടില്‍ അല്‍ നസറിനായി ഗോള്‍ നേടി വീണ്ടും ലീഡ് ഉറപ്പിച്ചു. എന്നാല്‍ മത്സരത്തിലെ അവസാന വിസില്‍ മുഴങ്ങുന്നതിന് മിനിട്ടുകള്‍ക്ക് മുമ്പ് ഫുട്‌ബോള്‍ പ്രേമികളെ ആവേശത്തിലാക്കിയാണ് റോണോയുടെ ഗോള്‍ പിറന്നത്.
Call it skill, call it instinct… we call it Ronaldo 🐐💛 pic.twitter.com/diFN85oBCI
— AlNassr FC (@AlNassrFC_EN) November 23, 2025
96ാം മിനിട്ടില്‍ എതിരാളികളുടെ ബോക്‌സിനുള്ളിലേക്ക് നവാഫ് ബൗഷാല്‍ റൈറ്റ് വിങ്ങില്‍ നിന്ന് ബോള്‍ ഉയര്‍ത്തിയപ്പോള്‍ പ്രായത്തെ പോലും വെല്ലുവിളിച്ച് ബൈസിക്കിള്‍ കിക്കിലൂടെ റോണോ ടീമിനായി നാലാം ഗോള്‍ നേടിക്കൊടുക്കുകയായിരുന്നു.
40ാം വയസിലും റൊണാള്‍ഡോയുടെ പോരാട്ട വീര്യത്തെ വാഴ്ത്തുകയാണ് ഇപ്പോള്‍ ആരാധകരും. ഫുട്‌ബോള്‍ കരിയറില്‍ 954ാം ഗോളും ഇതോടെ റോണോ സ്വന്തമാക്കിയിരിക്കുകയാണ്. 1000 എന്ന റെക്കോഡ് ഗോള്‍നേട്ടത്തിലേക്ക് റോണോക്ക് വെറും 46 ഗോള്‍ കൂടെ സ്വന്തമാക്കിയാല്‍ മതി. വൈകാതെ റോണോ സൂപ്പര്‍ നേട്ടത്തിലെത്തുമെന്നാണ് ഏവരുടേയും പ്രതീക്ഷ.
Ronaldo doing Ronaldo things. 🐐 pic.twitter.com/v54nSQZPW9
— AlNassr FC (@AlNassrFC_EN) November 23, 2025
അതേസമയം അല്‍ നസറിന് വേണ്ടി 110 ഗോള്‍ പൂര്‍ത്തിയാക്കാനും സൂപ്പര്‍ താരത്തിന് സാധിച്ചു. 123 മത്സരങ്ങളില്‍ നിന്നാണ് റോണോ 110 ഗോളുകള്‍ നേടിയത്. നിലവില്‍ അല്‍ നസറിന് വേണ്ടി ഏറ്റവും കൂടുതല്‍ ഗോള്‍ നേടുന്ന മൂന്നാമത്തെ താരമാണ് റോണോ. 120 ഗോള്‍ നേടിയ അല്‍ സഹ്‌ലാവിയാണ് ആ നേട്ടത്തില്‍ മുന്നിലുള്ളത്.
മാത്രമല്ല സൗദി പ്രോ ലീഗിലെ പുതിയ സീസണില്‍ അല്‍ നസറിന് വേണ്ടി ഏറ്റവും കൂടുതല്‍ ഗോള്‍ നേടുന്ന രണ്ടാമത്തെ താരമാണ് റോണോ. 10 ഗോളുകളാണ് താരം നേടിയത്. ജോവോ ഫെലിക്‌സ് 11 ഗോളുമായി മുന്നിലാണ്.
അതേസമയം പോയിന്റ് പട്ടികയില്‍ ഒമ്പത് മത്സരങ്ങളില്‍ നിന്ന് ഒമ്പത് മത്സരങ്ങളും വിജയിച്ച് 27 പോയിന്റുകളും നേടി അല്‍ നസര്‍ ഒന്നാം സ്ഥാനത്താണ്.
Content Highlight: Cristiano Ronaldo In Great Performance In Saudi Pro League
