കോഴിക്കോട്: രണ്ട് പതിറ്റാണ്ടായി കോഴിക്കോട് ജില്ലയില് ഒറ്റ എം.എല്.എയെ പോലും വിജയിപ്പിച്ചെടുക്കാന് സാധിച്ചിട്ടില്ല എന്ന ചീത്തപ്പേര് മാറ്റിയെടുക്കാന് കോണ്ഗ്രസ്. 2001ന് ശേഷം ഇതാദ്യമായാണ് കോഴിക്കോട് കോണ്ഗ്രസ് എം.എല്.എമാര് വിജയിക്കുന്നത്. അന്ന് കൊയിലാണ്ടിയില് നിന്ന് അഡ്വ. പി. ശങ്കരനും കാലിക്കറ്റ്-Iല് നിന്നും അഡ്വ. എ. സുജനപാലുമാണ് കോണ്ഗ്രസ് ടിക്കറ്റില് വിജയിച്ചത്.
ശേഷം നടന്ന 2006, 2011, 2016, 2021 തെരഞ്ഞെടുപ്പുകളില് ജില്ലയില് യു.ഡി.എഫ് ചില സീറ്റുകളില് വിജയം സ്വന്തമാക്കുമ്പോഴും കോണ്ഗ്രസിന് വിജയിക്കാന് സാധിക്കാതെ പോയത് എന്നും നേതൃത്വത്തിന് തലവേദനയായിരുന്നു. എന്നാല് ഇത്തവണ മത്സരിച്ച അഞ്ചില് നാല് കോണ്ഗ്രസ് സ്ഥാനാര്ത്ഥികളും വിജയത്തിലേക്ക് നടന്നടുക്കുകയാണ്.
ഉറച്ച ഇടത് കോട്ടയായ ബാലുശ്ശേരിയില് സിറ്റിങ് എം.എല്.എയായ അഡ്വ. കെ.എം. സച്ചിന് ദേവിനെതിരെ നിലവില് പതിനായിരത്തോളം വോട്ടിന്റെ ഭൂരിപക്ഷത്തിലാണ് വി.ടി. സൂരജ് മുന്നിട്ട് നില്ക്കുന്നത്. നിലവില് 60,000+ വോട്ടുകള് വോട്ടുകള് സൂരജ് സ്വന്തമാക്കിയിട്ടുണ്ട്.
എലത്തൂര് മണ്ഡലത്തില് മന്ത്രി എ.കെ. ശശീന്ദ്രനെ പിന്നിലാക്കി അഡ്വ. വിദ്യ ബാലകൃഷ്ണന് 8,000 വോട്ടിന്റെ ലീഡ് സ്വന്തമാക്കിയാണ് വ്യക്തമായ മുന്നേറ്റമുണ്ടാക്കിയിരിക്കുന്നത്. നിലവില് 41,000+ വോട്ടുകള് വിദ്യ സ്വന്തമാക്കിയിട്ടുണ്ട്.
കോഴിക്കോട് ജില്ലയ്ക്ക് ഏറ്റവും പരിചിതമായ മുഖങ്ങളിലൊന്നായ യുവ നേതാവ് കെ.എം. അഭിജിത്തിനെയാണ് നാദാപുരത്ത് കോണ്ഗ്രസ് കളത്തിലിറക്കിയത്. കഴിഞ്ഞ തെരഞ്ഞെടുപ്പില് കോഴിക്കോട് നോര്ത്തില് തോട്ടത്തില് രവീന്ദ്രനോട് പരാജയപ്പെട്ട അഭിജിത്ത് ഇത്തവണ നാദാപുരത്തെ പ്രതിനിധീകരിച്ച് നിയമസഭയിലെത്തുമെന്ന് ഏതാണ്ട് ഉറപ്പായിരിക്കുകയാണ്.
സി.പി.ഐ.യുടെ അഡ്വ. പി. വസന്തത്തെ പിന്നിലാക്കിയാണ് അഭിജിത്ത് ലീഡ് നേടിയിരിക്കുന്നത്. നിലവില് 43,000ലധികം വോട്ട് നേടിയ അഭിജിത്ത് ഒമ്പതിനായിരത്തോളം വോട്ടിന്റെ ശക്തമായ ലീഡും സ്വന്തമാക്കുന്നു.
കോഴിക്കോട് ഡി.സി.സി. അധ്യക്ഷന് അഡ്വ. കെ പ്രവീണ് കുമാര് കൊയിലാണ്ടിയില് എതിര് സ്ഥാനാര്ത്ഥി കെ. ദാസനേക്കാള് 6,500+ വോട്ടുകള്ക്കും നിലവില് ലീഡ് ചെയ്യുന്നുണ്ട്.
കോഴിക്കോട് നോര്ത്തില് മാത്രമാണ് കോണ്ഗ്രസ് സ്ഥാനാര്ത്ഥിക്ക് ലീഡ് സ്വന്തമാക്കാന് സാധിക്കാതെ പോയത്. നിലവില് സിറ്റിങ് എം.എല്.എ തോട്ടത്തില് രവീന്ദ്രന് നേരിയ ലീഡുമായി മുന്നിട്ട് നില്ക്കുകയാണ്.
Content Highlight: Congress makes progress in Kozhikode district