ആഷിക് അബു സംവിധാനം ചെയ്ത ഗ്യാങ്സ്റ്റര് എന്ന ചിത്രത്തിലൂടെ അഭിനയലോകത്തേക്ക് കടന്നുവന്ന നടനാണ് ബിനു പപ്പു. പിന്നീട് നിരവധി ചിത്രങ്ങളില് ചെറുതും വലുതുമായ വേഷങ്ങള് ചെയ്ത് ബിനു പപ്പു ശ്രദ്ധേയനായി. വൈറസ്, പുഴു, സൗദി വെള്ളക്ക തുടങ്ങിയ ചിത്രങ്ങളില് അസിസ്റ്റന്റ് ഡയറക്ടറായും ബിനു പപ്പു പ്രവര്ത്തിച്ചിട്ടുണ്ട്.
മലയാളസിനിമയിലെ ചരിത്രവിജയമായി മാറിയ തുടരും സിനിമയില് ബിനു പപ്പു ഭാഗമായിട്ടുണ്ട്. കോ ഡയറക്ടറായി ക്യാമറക്ക് പിന്നിലും എസ്.ഐ. ബെന്നിയായി ക്യാമറയുടെ മുന്നിലും ബിനു പപ്പു പ്രവര്ത്തിച്ചു. മോഹന്ലാലിനെക്കുറിച്ച് സംസാരിക്കുകയാണ് ബിനു പപ്പു. കുട്ടിക്കാലം മുതല്ക്ക് താനടക്കമുള്ള പലരും കാണുന്ന മുഖമാണ് മോഹന്ലാലിന്റേതെന്ന് ബിനു പപ്പു പറഞ്ഞു.
ചിരിപ്പിച്ചും കരയിപ്പിച്ചും കോരിത്തരിപ്പിച്ചും ഒട്ടനവധി സിനിമകള് മോഹന്ലാല് സമ്മാനിച്ചിട്ടുണ്ടെന്നും അതെല്ലാം ഹൃദയത്തോട് ചേര്ന്ന് നില്ക്കുന്നവയാണെന്നും അദ്ദേഹം കൂട്ടിച്ചേര്ത്തു. തുടരും എന്ന സിനിമ കണ്ട് പലരും അത് മോഹന്ലാലിന്റെ തിരിച്ചുവരവാണെന്ന് പലരും പറയുന്നത് കേള്ക്കാമെന്നും എന്നാല് മോഹന്ലാല് എവിടെയും പോയിട്ടില്ലെന്നും ബിനു പപ്പു പറയുന്നു. സൈന സൗത്ത് പ്ലസിനോട് സംസാരിക്കുകയായിരുന്നു അദ്ദേഹം.
‘ലാലേട്ടന്റെ സിനിമകള് കണ്ടാണ് ഞാനടക്കമുള്ള പലരും വളര്ന്നത്. ചിരിപ്പിച്ചും കരയിപ്പിച്ചും കോരിത്തരിപ്പിച്ചും ഒരുപാട് സിനിമകള് അദ്ദേഹം സമ്മാനിച്ചിട്ടുണ്ട്. അതില് ചില സിനിമകള് എനിക്ക് കണ്ട് മുഴുവനാക്കാന് സാധിക്കില്ല. അതിലൊന്നാണ് വന്ദനം. ആ സിനിമയുടെ അവസാനമാകുമ്പോള് ഞാന് ഇപ്പോഴും എഴുന്നേറ്റ് പോകും.
ഒന്ന് തിരിഞ്ഞുനോക്കിയിരുന്നെങ്കില് നമുക്കും സന്തോഷമാകും. സിനിമയാണെന്ന് അറിയാമെങ്കിലും അങ്ങനെ ചിന്തിക്കും. ആ സിനിമയില് അച്ഛനും ഒരു പ്രധാനവേഷത്തിലുണ്ടായിരുന്നു. അങ്ങനെ ഒരുപാട് സിനിമകളില് നമ്മളെ വല്ലാതെ പിടിച്ചിരുത്തിയയാളാണ് അദ്ദേഹം. അങ്ങനെയുള്ള ലാലേട്ടനെ തിരിച്ചുകൊണ്ടുവന്നതല്ല തുടരും എന്ന സിനിമ. ഒരുപാട് പേര് സിനിമ കണ്ടിട്ട് ‘ലാലേട്ടന് തിരിച്ചുവന്നു’ എന്നൊക്കെ പറയുന്നത് കണ്ടു. തിരിച്ചുവരാന് അദ്ദേഹം എങ്ങും പോയിട്ടില്ല,’ ബിനു പപ്പു പറഞ്ഞു.
ഓപ്പറേഷന് ജാവ, സൗദി വെള്ളക്ക എന്നീ സിനിമകള്ക്ക് ശേഷം തരുണ് മൂര്ത്തി അണിയിച്ചൊരുക്കിയ ചിത്രമാണ് തുടരും. മോഹന്ലാല് എന്ന നടനെയും താരത്തെയും ഒരുപോലെ ഉപയോഗിച്ച ചിത്രം ബോക്സ് ഓഫീസിലെ പല റെക്കോഡുകളും തകര്ത്തെറിഞ്ഞു. കേരളത്തില് നിന്ന് മാത്രം 100 കോടി കളക്ഷന് സ്വന്തമാക്കിയ ആദ്യചിത്രമായി തുടരും മാറി.
Content Highlight: Binu Pappu about Mohanlal and Thudarum movie