സെപ്റ്റംബര് ഒമ്പതിനാണ് ക്രിക്കറ്റ് ലോകം കാത്തിരിക്കുന്ന ഏഷ്യാ കപ്പ് ആരംഭിക്കുന്നത്. ടൂര്ണമെന്റിനായുള്ള തയ്യാറെടുപ്പിലാണ് ഇന്ത്യയും. ഇതോടെ കഴിഞ്ഞദിവസം (ചൊവ്വ) നടന്ന പത്രസമ്മേളനത്തില് 15 അംഗങ്ങളുടെ ഇന്ത്യന് സ്ക്വാഡും പ്രഖ്യാപിച്ചിരുന്നു.
സൂര്യകുമാര് യാദവിനെ ക്യാപ്റ്റന് ആയും ശുഭ്മന് ഗില്ലിനെ വൈസ് ക്യാപ്റ്റനായുമാണ് നിയമിച്ചാണ് ഇന്ത്യ സ്ക്വാഡ് പുറത്ത് വിട്ടത്. പ്രതീക്ഷിച്ചപോലെ മലയാളി താരം സഞ്ജു സാംസന് സ്ക്വാഡില് ഇടം നേടിയിട്ടുണ്ട്. ഫസ്റ്റ് ചോയ്സ് വിക്കറ്റ് കീപ്പറും ഓപ്പണറും ആയിട്ടായിരിക്കും സഞ്ജു ടീമിനൊപ്പം ചേരുക.
മത്സരത്തില് ഇന്ത്യ എത്തരത്തിലുള്ള ഇലവനുമായിട്ടാണ് കളത്തിലിറങ്ങുകയെന്ന് പറയുകയാണ് മുന് ഇന്ത്യന് താരവും ക്രിക്കറ്റ് കമന്റേറ്ററുമായ സുനില് ഗവാസ്കര്. സ്ക്വാഡില് ഇടം നേടിയ റിങ്കു സിങ്, വിക്കറ്റ് കീപ്പര് ജിതേഷ് ശര്മ, ശിവം ദുബെ, ഹര്ഷിത് റാണ എന്നിവരെയാണ് ഗവാസ്കര് തന്റെ ഇലവനില് നിന്ന് മാറ്റിയത്.
അതേസമയം ഇന്ത്യയും പാകിസ്ഥാനും ടൂര്ണമെന്റില് ഒരേ ഗ്രൂപ്പില് തന്നെയാണെന്നതും ആരാധകര്ക്ക് ആവേശം സൃഷ്ടിക്കുന്ന ഒന്നാണ്. ഗ്രൂപ്പ് ഘട്ടവും ഫൈനലുമടക്കം മൂന്ന് തവണ ഇന്ത്യയും പാകിസ്ഥാനും നേര്ക്കുനേര് വരാനുള്ള സാധ്യതകളുമുണ്ട്.
