എനിക്ക് ആ ബോളിവുഡ് നടൻ്റെ കൂടെ അഭിനയിക്കണമെന്ന ആഗ്രഹമുണ്ട്: അപർണ ബാലമുരളി

ഒരു സെക്കൻഡ് ക്ലാസ് യാത്ര എന്ന ചിത്രത്തിലൂടെ മലയാള സിനിമയിലേക്ക് കടന്നുവന്ന നടിയാണ് അപർണ ബാലമുരളി. ദിലീഷ് പോത്തൻ സംവിധാനം ചെയ്ത മഹേഷിൻ്റെ പ്രതികാരം എന്ന സിനിമയിലെ ജിംസി എന്ന കഥാപാത്രത്തിലൂടെ അപർണ പ്രേക്ഷകപ്രിയങ്കരിയായി. പിന്നീട് നിരവധി സിനിമകളിൽ അഭിനയിക്കുകയും പാട്ട് പാടുകയും ചെയ്തു.

മലയാളത്തിന് പുറമേ തമിഴിലേക്കും ചേക്കേറിയ അപർണയെ കാത്തിരുന്നത് ദേശീയ പുരസ്കാരമാണ്. സൂരറൈ പോട്ര്‌ എന്ന ചിത്രത്തിലെ അഭിനയത്തിനാണ് അപർണക്ക് മികച്ച നടിക്കുള്ള ദേശീയ ചലച്ചിത്ര അവാർഡ് ലഭിച്ചത്. രുധിരം എന്ന സിനിമയാണ് അപർണയുടേതായി പുറത്തിറങ്ങിയ അവസാന ചിത്രം. ഇപ്പോൾ ഇഷ്ടതാരത്തെക്കുറിച്ച് സംസാരിക്കുകയാണ് അപർണ ബാലമുരളി.

ഫഹദ് ഫാസിലിൻ്റെ കൂടെ അഭിനയിക്കണമെന്നത് വലിയ ആഗ്രഹമായിരുന്നെന്നും അത് തുടക്കത്തിൽ തന്നെ നടന്നുവെന്നും അപർണ പറയുന്നു. ഉർവശിയെ ഇഷ്ടമായിരുന്നെന്നും അവരുടെ കൂടെ അഭിനയിക്കണമെന്ന ആഗ്രഹമുണ്ടായിരുന്നെന്നും അതും നടന്നുവെന്ന് അപർണ പറയുന്നു. ഉർവശിയോടൊപ്പം സൂരറൈ പോട്ര് എന്ന ചിത്രത്തിലാണ് അപർണ ഒന്നിച്ച് അഭിനയിച്ചത്.

ഇനി അമിതാഭ് ബച്ചൻ്റെ കൂടെ അഭിനയിക്കണമെന്നാണ് തൻ്റെ ആഗ്രഹമെന്നും അദ്ദേഹത്തിൻ്റെ ഇഷ്ടപ്പെട്ട സിനിമ പികു ആണെന്നും അവർ കൂട്ടിച്ചേർത്തു. ഗൃഹലക്ഷ്മിയോട് സംസാരിക്കുകയായിരുന്നു അവർ.

‘ഫഹദ് ഇക്കയുടെ കൂടെ അഭിനയിക്കണം എന്ന് വലിയ ആഗ്രഹം ഉണ്ടായിരുന്നു. അത് തുടക്കത്തിലേ നടന്നു. പിന്നെ, ഉർവശി ചേച്ചിയെ ഭയങ്കര ഇഷ്ടമായിരുന്നു. അതും സംഭവിച്ചു. അമിതാഭ് ബച്ചൻ സാറിന്റെ കൂടെ അഭിനയിക്കണം എന്ന വലിയൊരു ആഗ്രഹവുമുണ്ട്. അദ്ദേഹത്തിന്റെ എനിക്ക് ഇഷ്ടപ്പെട്ട സിനിമകളെ കുറിച്ച് ചോദിക്കുമ്പോൾ ആദ്യം ഓർമ വരുന്നത് ‘പികു’ ആണ്,’ അപർണ ബാലമുരളി പറയുന്നു.

Content Highlight: Aparna Balamurali Talking about her Favorite Actor