2010ല് വിനീത് ശ്രീനിവാസന്റെ മലര്വാടി ആര്ട്സ് ക്ലബ്ബ് എന്ന ചിത്രത്തിലൂടെ സിനിമയില് എത്തിയവരാണ് അജു വര്ഗീസും നിവിന് പോളിയും. ആ സിനിമക്ക് ശേഷം ഇരുവരും ഒരുമിച്ച് നിരവധി സിനിമകളില് അഭിനയിച്ചിരുന്നു. ഇന്ന് മലയാള സിനിമയില് നിവിന് പോളി – അജു വര്ഗീസ് കൂട്ടുകെട്ടിന് ഒരു പ്രത്യേക ഫാന്ബേസ് തന്നെയുണ്ട്.
ഒരു സമയത്ത് ഇറങ്ങുന്ന ചിത്രങ്ങളെല്ലാം തുടര്ച്ചയായി ഹിറ്റ് ചാര്ട്ടില് കയറ്റിയിരുന്ന നടനായിരുന്നു നിവിന് പോളി. എന്നാല് കുറച്ചുകാലമായി അദ്ദേഹത്തിന്റെ സിനിമകള്ക്ക് പ്രതീക്ഷിച്ച വിജയം നേടാന് സാധിച്ചിരുന്നില്ല. ഇതിനിടയില് നടന് തുടര്ച്ചയായി ബോഡി ഷെയ്മിങ്ങും നേരിട്ടിരുന്നു.
ഈയിടെ ശരീരം ഭാരം കുറച്ച് പുതിയ മേക്കോവറില് എത്തിയ നിവിന് പോളിയുടെ ചിത്രങ്ങള് സോഷ്യല് മീഡിയയില് വൈറലായി മാറിയിരുന്നു. ഇപ്പോള് മൈല് സ്റ്റോണ് മേക്കേഴ്സിന് നല്കിയ അഭിമുഖത്തില് നിവിന് പോളിയുടെ മാറ്റത്തെ കുറിച്ചും അദ്ദേഹത്തിന്റെ സിനിമകളെ കുറിച്ചും പറയുകയാണ് അജു വര്ഗീസ്.
‘ഞാന് നിവിനെ വിളിച്ച് സംസാരിച്ചിരുന്നു. ‘ദയവ് ചെയ്ത് ഇനി തിരിച്ച് ഒരു പോക്ക് പോകരുത്. ഇപ്പോള് കിട്ടുന്ന റെസ്പെക്ട് ഇനി കിട്ടില്ല’ എന്നായിരുന്നു ഞാന് പറഞ്ഞത്. കാരണം ഇത് ഇവന്റെ സ്ഥിരം പരിപാടിയാണെന്ന് പറയും. ഇല്ലെന്ന് തന്നെയാണ് അവന് പറഞ്ഞത്. ഇപ്രാവശ്യം നിവിന് തീരുമാനിച്ച് ഉറപ്പിച്ചിട്ടാണ്. രണ്ടും കല്പിച്ച് തന്നെയാണ്.
അവന്റെ തിരിച്ചു വരവില് എല്ലാവരും ഹാപ്പിയാണ്. നിവിന് പോളി ഫാന്സ് അല്ലാത്തവര് പോലും സന്തോഷത്തിലാണ്. എല്ലാവരും അവനെ മിസ് ചെയ്തിരുന്നു. ചിലര് മറ്റ് താരങ്ങളുടെ ഫാന്സാകും. അപ്പോഴും നിവിന്റെ കാര്യത്തില് അവരൊക്കെ ഇപ്പോള് ഹാപ്പിയാണ്. ‘ആ നിവിന് ചേട്ടനെ കുറച്ച് നാളായി മിസ് ചെയ്യുന്നു. ഒന്ന് കാണാന് തോന്നുന്നു’ എന്നാണ് പലരും പറയുന്നത്.
നിവിന്റെ മുമ്പുള്ള സിനിമകളൊക്കെ ആളുകള് ഇപ്പോഴും കാണുന്നതാണ്. അവന് അങ്ങനെയൊരു അനുഗ്രഹമുണ്ട്. ഓം ശാന്തി ഓശാന, 1983, ആക്ഷന് ഹീറോ ബിജു, ഒരു വടക്കന് സെല്ഫി തുടങ്ങി കുറേ സിനിമകളുണ്ട്. ഏഴിനോ പത്തിനോ അടുത്തുള്ള സിനിമകള് ഹൈ റിപ്പീറ്റ് വാല്യുവുള്ളതാണ്. ആ സിനിമകള് അവന് വേണ്ടി സംസാരിക്കും,’ അജു വര്ഗീസ് പറയുന്നു.
Content Highlight: Aju Varghese Talks About Nivin Pauly’s Change