റായ്പൂര്: ഛത്തീസ്ഗഡിലെ കോര്ബ ടൗണില് 40 വര്ഷത്തെ പഴക്കമുളളതും 70 അടി നീളമുള്ളതുമായ ഇരുമ്പുപാലം മോഷണം പോയി.
ഞായറാഴ്ച്ച പുലര്ച്ചയോടെയാണ് സംഭവം. ജനുവരി 16 വരെ പ്രദേശവാസികള് സഞ്ചരിച്ച പാലം പിറ്റേന്ന് കാണാതാവുകയായിരുന്നു. വാര്ഡ് 17 ലെ പ്രദേശവാസികള് 40 വര്ഷമായി കാല്നടയ്ക്ക് ഉപയോഗിക്കുന്ന പാലമാണിത്.
പ്രദേശവാസികള് കൗണ്സിലറെ വിവരമറിയിച്ചതിനെ തുടര്ന്ന് കൗണ്സിലര് പൊലീസിന് പരാതി നല്കുകയായിരുന്നു.
മോഷ്ടിച്ച് കനാലില് സൂക്ഷിച്ച ഏഴ് ടണ് ഇരുമ്പും മോഷ്ടിച്ച വസ്തുക്കള് കൊണ്ട് പോവാന് ഉപയോഗിച്ച വാഹനവും പിടിച്ചെടുത്തതായി ചൗക്കി പൊലീസ് ഇന് ചാര്ജ് ഭീംസെന് യാദവ് പറഞ്ഞു.
ബാക്കി ഇരുമ്പ് എവിടെയാണെന്ന് അന്വേഷിച്ച് വരികയാണെന്നും അദ്ദേഹം കൂട്ടിച്ചേര്ത്തു. എല്ലാ ആക്രി കച്ചവട സ്ഥാപനങ്ങളും പരിശോധിക്കാനുള്ള ശ്രമങ്ങളും നടക്കുന്നുണ്ട്.
മോഷ്ടിച്ച് കൊണ്ട് പോവുന്നതിനിടെ വീണ് പോയ പാലത്തിന്റെ ചില കഷ്ണങ്ങള് സംഭവ സ്ഥലത്ത് നിന്നുതന്നെ കണ്ടെത്തിയിരുന്നു.
ഡൂള്ന്യൂസില് സബ് എഡിറ്റര് ട്രെയ്നി. വാദി ഹുദ കോളേജില് നിന്നും ബി.എ ഇംഗ്ലീഷില് ബിരുദം. കാലിക്കറ്റ് പ്രസ് ക്ലബ്ബില് നിന്നും ജേണലിസത്തില് പി.ജി ഡിപ്ലോമ.
