യൂറോപ്പ് ഇനി നിന്ന് കത്തും; ലോകകപ്പ് ലക്ഷ്യമിട്ട് റൊണാള്‍ഡോ കളത്തിലേക്ക്

2026 ഫിഫ ലോകകപ്പിനുള്ള യൂറോപ്യന്‍ യോഗ്യതാ റൗണ്ടിന്റെ ഗ്രൂപ്പ് ഘട്ട മത്സരങ്ങള്‍ക്ക് കളമൊരുങ്ങുന്നു. 16 ടീമുകളാണ് യൂറോപ്പില്‍ നിന്നും ലോകകപ്പിനെത്തുക. 12 ഗ്രൂപ്പുകളിലായി 54 ടീമുകളാണ് ലോകകപ്പ് യോഗ്യതയ്ക്കായി മാറ്റുരയ്ക്കുന്നത്.

നാല് ടീമുകള്‍ വീതമുള്ള ആറ് ഗ്രൂപ്പുകളും (ഗ്രൂപ്പ് എ മുതല്‍ എഫ് വരെ) അഞ്ച് ടീമുകളുള്ള ആറ് ഗ്രൂപ്പുകളും (ഗ്രൂപ്പ് ജി മുതല്‍ എല്‍ വരെ) ആണ് കിരീടം തേടി കളത്തിലിറങ്ങുന്നത്. ഇതില്‍ ജി മുതല്‍ എല്‍ വരെയുള്ള ടീമുകളുടെ പോരാട്ടം ഇതിനോടകം ആരംഭിച്ചിട്ടുണ്ട്. എന്നാല്‍ ഇതുവരെ ഒരു ടീമിനും യോഗ്യതയുറപ്പിക്കാന്‍ സാധിച്ചിട്ടില്ല.

ഓരോ ഗ്രൂപ്പിലെയും ആദ്യ സ്ഥാനക്കാര്‍ നേരിട്ട് ലോകകപ്പിന് യോഗ്യത നേടും. രണ്ടാം സ്ഥാനത്തുള്ള ടീമുകള്‍ക്ക് യോഗ്യത ലഭിക്കണമെങ്കില്‍ പ്ലേ ഓഫ് മത്സരങ്ങള്‍ കളിക്കണം. ഇതുകൊണ്ടുതന്നെ ഓരോ മത്സരങ്ങളും ടീമുകളെ സംബന്ധിച്ച് അത്രത്തോളം വിലപ്പെട്ടതാണ്.

കരുത്തരായ ജര്‍മനി ഗ്രൂപ്പ് എ-യിലാണ്. ലക്‌സംബര്‍ഗ്, നോര്‍തേണ്‍ ഐലന്‍ഡ്, സ്ലോവാക്യ എന്നിവരാണ് ഗ്രൂപ്പിലെ മറ്റ് ടീമുകള്‍.

നിലവിലെ യുവേഫ നേഷന്‍സ് ലീഗ് ജേതാക്കളായ പോര്‍ച്ചുഗല്‍ ഗ്രൂപ്പ് എഫ്-ലാണ്. താരതമ്യേന കുഞ്ഞന്‍ ടീമുകളാണ് ഗ്രൂപ്പില്‍ പോര്‍ച്ചുഗലിനൊപ്പമുള്ളത്. ഇവരെ മറികടന്ന് ലോകകപ്പിനെത്തുകയെന്നത് റൊണാള്‍ഡോയെയും സംഘത്തെയും സംബന്ധിച്ച് എളുപ്പമാകും.