ജറുസലേം: വെസ്റ്റ് ബാങ്കില് ഗസയിലേതിന് സമാനമായ സൈനിക നടപടി നടത്തണമെന്ന് ഇസ്രഈല് ധനമന്ത്രി ബോസലേല് സ്മോട്രിച്ച്. ലെബനനിലെയും ഗസമുനമ്പിലെയും ഇസ്രഈല് അധീനതയിലുള്ള പ്രദേശങ്ങള് രാജ്യത്തോട് കൂട്ടിച്ചേര്ക്കണമെന്നും സ്മോട്രിച്ച് ആഹ്വാനം ചെയ്തു.
ഈസ്രഈലി മാധ്യമമായ വൈനെറ്റിന് നല്കിയ അഭിമുഖത്തിലാണ് അദ്ദേഹത്തിന്റെ പരാമര്ശം.
‘വെസ്റ്റ് ബാങ്കില് യുദ്ധത്തിന് പോകണം. ഗസയില് ചെയ്തതുപോലെ നടപടികള് സ്വീകരിക്കണം. ഫലസ്തീന് അതോറിറ്റിയെ പിരിച്ചുവിടണം,’ സ്മോട്രിച്ച് പറഞ്ഞു.
വെസ്റ്റ് ബാങ്കിലെ സുരക്ഷാ സാഹചര്യം സംബന്ധിച്ച ചോദ്യത്തിനായിരുന്നു സ്മോട്രിച്ചിന്റെ പ്രതികരണം. ഗസയില് ഹമാസിനെതിരെ നടത്തിയ സൈനിക നടപടിക്ക് സമാനമായി വെസ്റ്റ് ബാങ്കിലും നടപടി സ്വീകരിക്കണമെന്നാണ് അദ്ദേഹത്തിന്റെ വാദം.
1967 മുതല് ഇസ്രഈല് കൈവശംവച്ചിരിക്കുന്ന വെസ്റ്റ് ബാങ്ക് മുഴുവനായും രാജ്യത്തോട് കൂട്ടിച്ചേര്ക്കണമെന്ന് വാദിക്കുന്ന തീവ്ര വലതുപക്ഷ പാര്ട്ടിയുടെ നേതാവാണ് സ്മോട്രിച്ച്.
വെസ്റ്റ് ബാങ്കില് ഭീകരവാദത്തിനുള്ള അടിസ്ഥാന സൗകര്യങ്ങള് ഇല്ലാതാക്കണമെന്നും ആയുധങ്ങളും തുരങ്കങ്ങളും ഉള്പ്പെടെയുള്ളവ ഇല്ലാതാക്കണമെന്നും അദ്ദേഹം ആരോപിച്ചു.
ഇതിനിടെ വെസ്റ്റ് ബാങ്കില് ഇസ്രഈല് കുടിയേറ്റക്കാരുടെ ആക്രമണങ്ങള് വര്ധിച്ചുവരുന്നതായാണ് യു.എന് കണക്കുകള് വ്യക്തമാക്കുന്നത്.
ജനുവരി മുതല് ജൂലൈ അവസാനം വരെ ഫലസ്തീനികള്ക്കെതിരെ 1,330-ലേറെ ആക്രമണങ്ങള് രേഖപ്പെടുത്തിയതായി യു.എന് മാനവികകാര്യ ഏകോപന ഓഫീസ് അറിയിച്ചു. പ്രതിദിനം ശരാശരി ആറ് ആക്രമണങ്ങളാണ് രേഖപ്പെടുത്തിയിരിക്കുന്നത്.
വെസ്റ്റ് ബാങ്കില് സൈനിക നടപടി ശക്തമാക്കണമെന്ന സ്മോട്രിച്ചിന്റെ പ്രസ്താവനയ്ക്കെതിരെ ഫലസ്തീന് വിദേശകാര്യ മന്ത്രാലയവും രംഗത്തെത്തിയിട്ടുണ്ട്.
മന്ത്രിയുടെ പ്രസ്താവന ഫലസ്തീന് രാഷ്ട്ര രൂപീകരണത്തിനുള്ള സാധ്യതകള് തകര്ക്കാനും പ്രദേശങ്ങളില് പുതിയ സാഹചര്യം ബലമായി സൃഷ്ടിക്കാനുമുള്ള പദ്ധതികളുടെ സൂചനയാണെന്ന് മന്ത്രാലയം പറഞ്ഞു.
Content Highlights: ‘What was done in Gaza must be done in the West Bank too’; Israeli Finance Minister calls for all-out war.