ഈ തീരുമാനത്തിന്റെ പിറകില്‍ എന്താണെന്ന് അവന് മാത്രമേ അറിയൂ; വിരാടിന്റെ വിരമിക്കലിനെക്കുറിച്ച് സെവാഗ്

അപ്രതീക്ഷിതമായിട്ടായിരുന്നു ഇന്ത്യന്‍ സൂപ്പര്‍ താരം വിരാട് കോഹ്‌ലി ടെസ്റ്റ് ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ചത്. നേരത്തെ രോഹിത് ശര്‍മ വിരമിച്ചതിന് പുറകെ വിരാടും തീരുമാനത്തിലെത്തിയത്. ക്രിക്കറ്റ് ആരാധകരെ ഏറെ നിരാശയിലാക്കിയിരുന്നു. ഇംഗ്ലണ്ടിനെതിരായ അഞ്ച് ടെസ്റ്റ് മത്സരങ്ങള്‍ക്ക് മുന്നോടിയായാണ് ഇരുവരും വിരമിക്കല്‍ പ്രഖ്യാപിച്ചത്.

ഇപ്പോള്‍ വിരാടിന്റെ വിരമിക്കലിനെക്കുറിച്ച് സംസാരിക്കുയാണ് മുന്‍ ഇന്ത്യന്‍ താരം വിരേന്ദര്‍ സെവാഗ്. ഒരു സംശയവുമില്ലാതെ വളരെ നേരത്തെയാണ് വിരാട് വിരമിച്ചതെന്നും ഫിറ്റ്‌നസ് കണക്കിലെടുക്കുമ്പോള്‍ രണ്ട് വര്‍ഷത്തോളം കളിക്കാന്‍ വിരാടിന് കഴിയുമായിരുന്നെന്നും സെവാഗ് പറഞ്ഞു. മാത്രമല്ല വിരമിക്കല്‍ വ്യക്തിപരമായ തീകുമാനമാണെന്നും അതിന് പിറകിലെ കാരണം വിരാടിന് മാത്രമേ അറിയുകയുള്ളൂ എന്നും മുന്‍ താരം കൂട്ടിച്ചേര്‍ത്തു.

‘ഒരു സംശയവുമില്ലാതെയാണ് അവന്‍ ടെസ്റ്റ് ക്രിക്കറ്റില്‍ നിന്ന് വളരെ വേഗം വിരമിക്കല്‍ പ്രഖ്യാപിച്ചത്. അവന്‍ അവന്റെ ഫിറ്റ്‌നസ് എത്ര നന്നായിട്ടാണ് കൈകാര്യ ചെയ്യുന്നത്. അത് കണക്കിലെടുത്താല്‍ അവന് രണ്ട് വര്‍ഷം കൂടി സുഖമായി തുടരാമായിരുന്നു. എന്തൊക്കെയായാലും ഈ തീരുമാനത്തിന്റെ പിറകില്‍ എന്താണെന്ന് അവന് മാത്രമേ അറിയൂ. വിരമിക്കല്‍ ഒരു പേഴ്‌സണല്‍ ചോയിസാണ്. അതിന് കാരണം എന്തുമാകട്ടെ. എന്റെ കാഴ്ചപ്പാടില്‍ അവന് രണ്ട് വര്‍ഷം കളിക്കാനുള്ള ഊര്‍ജവും അവനുണ്ട്,’ സെവാഗ് പറഞ്ഞു.

2014ല്‍ എം.എസ്. ധോണിയില്‍ നിന്ന് ടെസ്റ്റ് ക്യാപ്റ്റന്‍സി ഏറ്റെടുത്ത വിരാട് എട്ട് വര്‍ഷക്കാലം ഇന്ത്യയെ വിജയകരമായി നയിച്ചു. ഇന്ത്യയ്ക്ക് വേണ്ടി ടെസ്റ്റില്‍ ഏറ്റവും കൂടുതല്‍ വിജയം നേടിത്തന്ന നായകന്‍ കൂടിയാണ് വിരാട്.

ഇന്ത്യയ്ക്ക് വേണ്ടി 2011ല്‍ ടെസ്റ്റ് അരങ്ങേറ്റം നടത്തിയ വിരാട് 123 മത്സരങ്ങളിലെ 210 ഇന്നിങ്‌സില്‍ നിന്ന് 9230 റണ്‍സ് സ്വന്തമാക്കിയിട്ടുണ്ട്. 46.9 ആവറേജിലും 55.6 എന്ന സ്‌ട്രൈക്ക് റേറ്റിലുമാണ് താരം ബാറ്റ് വീശിയത്. 30 സെഞ്ച്വറികളും 31 അര്‍ധ സെഞ്ച്വറികളുമാണ് ഫോര്‍മാറ്റില്‍ വിരാട് നേടിയത്.

Content Highlight: Virendar Sehwag Talking About Virat Kohli