സൗത്ത് ആഫ്രിക്കയ്ക്കെതിരായ ഏകദിന പരമ്പരയില് തകര്പ്പന് വിജയമാണ് ഇന്ത്യ സ്വന്തമാക്കിയത്. സീരീസ് ഡിസൈഡറില് പ്രോട്ടിയാസ് ഉയര്ത്തിയ 270 റണ്സിന്റെ വിജയലക്ഷ്യം 39.5 ഓവറില് ഇന്ത്യ മറികടക്കുകയായിരുന്നു.
ഇന്ത്യയ്ക്ക് വേണ്ടി മിന്നും പ്രകടനമാണ് ഓപ്പണറായ യശസ്വി ജെയ്സ്വാള് കാഴ്ചവെച്ചത്. ഏകദിനത്തില് കന്നി സെഞ്ച്വറി നേടിയാണ് താരം തകര്ത്താടിയത്. 121 പന്തില് 12 ഫോറും 2 സിക്സും ഉള്പ്പെടെ പുറത്താകാതെ 116 റണ്സാണ് ജെയ്സ്വാള് സ്വന്തമാക്കിയത്.
Virat Kohli
ജെയ്സ്വാളിന് പുറമെ രോഹിത് ശര്മയും വിരാട് കോഹ്ലിയും വെടിക്കെട്ട് പ്രകടനമായിരുന്നു ഇന്ത്യയ്ക്ക് വേണ്ടി കാഴ്ചവെച്ചത്. 73 പന്തില് മൂന്ന് സിക്സറും ഏഴ് ഫോറും ഉള്പ്പെടെ 75 റണ്സാണ് ഹിറ്റ്മാന് അടിച്ചെടുത്തത്. വിരാട് 45 പന്തില് മൂന്ന് സിക്സും ആറ് ഫോറും ഉള്പ്പെടെ 65 റണ്സും നേടി. ഇതോടെ ഒരു മിന്നും നേട്ടത്തിലെത്താനും വിരാടിന് സാധിച്ചിരിക്കുകയാണ്.
കഴിഞ്ഞ 10 ഏകദിന ഇന്നിങ്സില് ഇന്ത്യയ്ക്ക് വേണ്ടി ഏറ്റവും കൂടുതല് റണ്സ് നേടുന്ന താരമാകാനാണ് കിങ്ങിന് സാധിച്ചത്. ഈ നേട്ടത്തില് മറ്റൊരു ഇന്ത്യന് താരങ്ങള്ക്കും 500 റണ്സിന് മുകളില് നേടാന് സാധിക്കില്ലെന്നത് എടുത്തുപറയേണ്ടതാണ്. ഈ നേട്ടത്തില് രണ്ടാം സ്ഥാനത്തുള്ളത് ശ്രേയസ് അയ്യരാണ്.
വിരാട് കോഹ്ലി – 572
ശ്രേയസ് അയ്യര് – 496
രോഹിത് ശര്മ -487
ശുഭ്മന് ഗില് – 403
മത്സരത്തില് സൗത്ത് ആഫ്രിക്കയ്ക്ക് വേണ്ടി മിന്നും പ്രകടനം കാഴ്ചവെച്ചത് ഓപ്പണര് ക്വിന്റണ് ഡി കോക്കാണ്. 89 പന്തില് നിന്ന് ആറ് സിക്സും എട്ട് ഫോറും ഉള്പ്പെടെ 106 റണ്സ് നേടിയാണ് താരം പുറത്തായത്. ഇതോടെ ഏകദിന ക്രിക്കറ്റില് 23ാം സെഞ്ച്വറി പൂര്ത്തിയാക്കാനും താരത്തിന് സാധിച്ചു. പ്രസിദ്ധ് കൃഷ്ണയാണ് താരത്തെ പുറത്താക്കിയത്.
ഡി കോക്കിന് പുറമെ ടീമിന് വേണ്ടി 67 പന്തില് 48 റണ്സ് നേടി ക്യാപ്റ്റന് തെംബ ബാവുമ മിന്നും പ്രകടനം കാഴ്ചവെച്ചു. ഡെവാള്ഡ് ബ്രെവിസ് 29 റണ്സ് നേടിയപ്പോള് കേശവ് മഹാരാജ് 20* റണ്സുമായി മികവ് പുലര്ത്തി. മറ്റാര്ക്കും ടീമിന് വേണ്ടി വലിയ സ്കോര് ഉയര്ത്താന് സാധിച്ചില്ല.
അതേസമയം ഇന്ത്യയ്ക്ക് വേണ്ടി മികച്ച പ്രകടനം നടത്തിയത് കുല്ദീപ് യാദവും പ്രസിദ്ധ് കൃഷ്ണയുമാണ്. ഇരുവരും നാല് വിക്കറ്റാണ് വിഴ്ത്തിയത്. അര്ഷ്ദീപ് സിങ്, രവീന്ദ്ര ജഡേജ എന്നിവര് ഒരോ വിക്കറ്റും നേടി.
ഇനി ഇന്ത്യയുടെ മുന്നിലുള്ളത് പ്രോട്ടിയാസിനെതിരെയുള്ള അഞ്ച് മത്സരങ്ങള് അടങ്ങുന്ന പരമ്പരയാണ്. ഡിസംബര് ഒമ്പതിന് ഒഡീഷയിലെ ബരാബതി സ്റ്റേഡിയത്തിലാണ് ആദ്യ മത്സരം അരങ്ങേറുന്നത്.
Content Highlight: Virat Kohli In Great Record Achievement In ODI For India