'ടൂര്‍ണമെന്റ് ഏതായാലും കുഴപ്പമില്ല, ഞങ്ങള്‍ക്ക് അഞ്ച് ഗോളടിച്ചാല്‍ മതി'; ചാമ്പ്യന്‍സ് ലീഗിലും ഗോളടിമേളം

യുവേഫ ചാമ്പ്യന്‍സ് ലീഗില്‍ വിജയത്തോടെ തുടങ്ങി എഫ്.സി ബാഴ്‌സലോണ. സ്വന്തം തട്ടകമായ ക്യാമ്പ് നൗവില്‍ ഫെയ്‌നൂര്‍ഡിനെതിരെയായിരുന്നു കറ്റാലന്‍മാരുടെ വിജയം. ഒന്നിനെതിരെ അഞ്ച് ഗോളിന് വിജയം സ്വന്തമാക്കിയാണ് ഹോം ടീം യു.സി.എല്‍ ക്യാമ്പെയ്ന്‍ ആരംഭിച്ചത്.

ലാ ലിഗയില്‍ തുടരുന്ന ഡോമിനന്‍സ് യു.സി.എല്ലിലും കാഴ്ചവെച്ചാണ് ബാഴ്‌സ ജയം പിടിച്ചടക്കിയത്. സ്പാനിഷ് ലീഗില്‍ കളിച്ച നാലില്‍ മൂന്ന് മത്സരത്തിലും അഞ്ച് ഗോള്‍ വീതം നേടിയ ബാഴ്‌സ, യു.സി.എല്ലിലും ആ പതിവ് തുടര്‍ന്നിരിക്കുകയാണ്.

4-3-3 എന്ന ഫോര്‍മേഷനിലാണ് ഹാന്‍സി ഫ്‌ളിക് തന്റെ കുട്ടികളെ കളത്തിലിറക്കിയത്. മറുവശത്ത് ഫെയ്‌നൂര്‍ഡും അതേ രീതി തന്നെ അവലംബിച്ചു.

ആദ്യ വിസില്‍ മുഴങ്ങി മൂന്നാം മിനിട്ടില്‍ തന്നെ റഫീന്യ ഹോം ടീമിനെ മുമ്പിലെത്തിച്ചു. ലാമിന്‍ യമാല്‍ ഒരുക്കി നല്‍കിയ ഗോളവസരം നായകന്‍ പിഴവേതും കൂടാതെ വലയിലെത്തിക്കുകയായിരുന്നു.

22ാം മിനിട്ടില്‍ ജര്‍മന്‍ വണ്ടര്‍ കിഡ് കരീം അദേയിമി ബാഴ്‌സയുടെ ലീഡ് ഇരട്ടിയാക്കി. ജാവോ കാന്‍സെലോയുടെ അസിസ്റ്റിലാണ് അദേയിമി ബാഴ്‌സയ്ക്കായുള്ള തന്റെ ആദ്യ ചാമ്പ്യന്‍സ് ലീഗ് ഗോള്‍ നേടിയത്.

തുടര്‍ന്നും പലകുറി ഗോളവസരങ്ങള്‍ സൃഷ്ടിക്കപ്പെട്ടെങ്കിലും ഗോള്‍ പിറക്കാതെ വന്നതോടെ ആദ്യ പകുതിയില്‍ ബാഴ്‌സ 2-0ന് ലീഡെടുത്തു.

രണ്ടാം പകുതിയുടെ തുടക്കത്തില്‍ തന്നെ ഫെയ്‌നൂര്‍ഡ് മാറ്റങ്ങള്‍ വരുത്തിയിരുന്നു. എങ്കിലും ബാഴ്‌സയെ പിടിച്ചുകെട്ടാന്‍ അവയൊന്നും പോരാതെ വരികയായിരുന്നു.

57ാം മിനിട്ടില്‍ മത്സരത്തിലെ മൂന്നാം ഗോളും തന്റെ രണ്ടാം ഗോളും നേടിയ ക്യാപ്റ്റന്‍ റഫീന്യ ക്യാമ്പ് നൗവിനെ വീണ്ടും ആവേശത്തിലാഴ്ത്തി. പെഡ്രിയാണ് ഗോളിന് വഴിയൊരുക്കിയത്.

61ാം മിനിട്ടില്‍ ഫെയ്‌നൂര്‍ഡ് ബാഴ്‌സയുടെ വലയില്‍ പന്തെത്തിച്ചെങ്കിലും വാറില്‍ കുടുങ്ങി ഗോള്‍ നിഷേധിക്കപ്പെട്ടു.

ക്യാപ്റ്റന്‍ റഫീന്യയെയടക്കം പിന്‍വലിച്ച് മൂന്ന് സുപ്രധാന മാറ്റങ്ങളുമായി പരിശീലകന്‍ ഹാന്‍സി ഫ്‌ളിക് തന്ത്രങ്ങള്‍ക്ക് മൂര്‍ച്ച നല്‍കി.

77ാം മിനിട്ടില്‍ ലാമിന്‍ യമാലും എതിരാളികളുടെ വലയില്‍ പന്തെത്തിച്ചു.

82ാം മിനിട്ടിലാണ് ഫെയ്‌നൂര്‍ഡിന്റെ ആശ്വാസ ഗോള്‍ പിറന്നത്. പകരക്കാരനായെത്തിയ ഗോണ്‍സാലോ ബോര്‍ഗെസിന്റെ അസിസ്റ്റില്‍ പകരക്കാരനായെത്തിയ സെം സ്റ്റെജനാണ് ഗോള്‍ നേടിയത്.

83ാം മിനിട്ടില്‍ ഡാനി ഓല്‍മോയെ പിന്‍വലിച്ച് ഗബ്രിയല്‍ ജീസിനെയും ഫ്‌ളിക് കളത്തിലിറക്കി. ഗ്രൗണ്ടിലിറങ്ങി രണ്ടാം മിനിട്ടില്‍ തന്നെ ജീസസ് ബാഴ്‌സ ജേഴ്‌സിയിലെ തന്റെ ആദ്യ ഗോള്‍ കണ്ടെത്തി.

ഒടുവില്‍ ഫൈനല്‍ വിസില്‍ മുഴങ്ങിയപ്പോള്‍ ബാഴ്‌സ 5-1ന് വിജയം സ്വന്തമാക്കി.

ഈ വിജയത്തിന് പിന്നാലെ യു.സി.എല്‍ പോയിന്റ് പട്ടികയില്‍ പി.എസ്.ജിക്ക് പിന്നാലെ രണ്ടാമതാണ് ബാഴ്‌സലോണ.

ചാമ്പ്യന്‍സ് ലീഗില്‍ ഒക്ടോബര്‍ 14നാണ് ബാഴ്‌സയുടെ അടുത്ത മത്സരം. റാംസ് പാര്‍ക്കില്‍ നടക്കുന്ന മത്സരത്തില്‍ ഹോം ടീമും ടര്‍ക്കിഷ് വമ്പന്‍മാരുമായ ഗളറ്റാസരേയാണ് എതിരാളികള്‍.

Content Highlight: UEFA Champions League: Barcelona defeated Feyenoord