കൊച്ചി: കണ്ണൂര് വിമാനത്താവളം വഴി സ്വര്ണം കടത്താന് സഹായിച്ച മൂന്ന് കസ്റ്റംസ് ഉദ്യോഗസ്ഥര് പിടിയില്. റവന്യൂ ഇന്റലിജന്സാണ് ഇവരെ അറസ്റ്റു ചെയ്തത്.
രോഹിത് ശര്മ, സകീന്ദ്ര പാസ്വാന്, കൃഷന് കുമാര് എന്നിവരാണ് അറസ്റ്റിലായത്. കഴിഞ്ഞ ദിവസം, സ്വര്ണക്കടത്തിന് സഹായിച്ച കോഴിക്കോട് വിമാനത്താവളത്തിലെ കസ്റ്റംസ് ഉദ്യോഗസ്ഥന് രാഹുല് പണ്ഡിറ്റ് അറസ്റ്റിലായിരുന്നു. പണ്ഡിറ്റിന്റെ കൂടെയുള്ളവരാണ് അറസ്റ്റിലായ ഈ മൂന്നുപേരും.
ആഗസ്റ്റ് 19ന് കണ്ണൂര് വിമാനത്താവളത്തില് എത്തിയ നാല് യാത്രക്കാരില് നിന്ന് 15 കിലോ സ്വര്ണം ഡയറക്ടറേറ്റ് ഓഫ് റവന്യൂ ഇന്റലിജന്സ് പിടികൂടിയിരുന്നു. ഇതുമായി ബന്ധപ്പെട്ട അന്വേഷണത്തിലാണ് കസ്റ്റംസ് ഉദ്യോഗസ്ഥര് സ്വര്ണക്കടത്തുകാര്ക്ക് സഹായം ചെയ്തതായി കണ്ടെത്തിയത്.
സ്വര്ണവുമായി വരുന്ന യാത്രക്കാരുടെ വിശദാംശങ്ങള് രാഹുല് പണ്ഡിറ്റ് വഴി കണ്ണൂര് വിമാനത്താളത്തിലെ കസ്റ്റംസ് ഉദ്യോഗസ്ഥര്ക്ക് ലഭിക്കും. ഈ യാത്രക്കാരെ എക്സ് റേ പരിശോധനയില്ലാതെ കടത്തിവിടുകയാണ് പതിവ്. കള്ളക്കടത്ത് റാക്കറ്റില് നിന്ന് ലഭിക്കുന്ന പണം ഉദ്യോഗസ്ഥര്ക്ക് വീതിച്ചു നല്കിയിരുന്നതും രാഹുലായിരുന്നു.
കസ്റ്റംസ് ഉദ്യോഗസ്ഥറുടെ അറസ്റ്റോടെ കേസില് പിടിയിലായവരുടെ എണ്ണം 16 ആയി. കോടതിയില് ഹാജരാക്കിയ പ്രതികളെ 14 ദിവസത്തേക്ക് റിമാന്ഡ് ചെയ്തു.