മലയാള സിനിമയില് ചില താരതമ്യങ്ങള് അങ്ങനെയാണ്. ഒരു നടന്റെ പേര് പറയുമ്പോള് സ്വാഭാവികമായി മറ്റൊരു നടന്റെ പേരും ഒപ്പം വരും. മാത്യു തോമസിന്റെ കാര്യത്തില് അത്തരമൊരു താരതമ്യം ഏറെക്കാലമായി നടന് നസ്ലെനുമായാണ്.
‘തണ്ണീര്മത്തന് ദിനങ്ങള്’ മുതല് ഒരുമിച്ച് പ്രേക്ഷകശ്രദ്ധ നേടിയ ഇരുവരുടെയും കരിയര് പിന്നീട് വ്യത്യസ്ത വഴികളിലൂടെ മുന്നേറി. ഒരു ഘട്ടത്തില് നസ്ലെന്റെ കരിയര് ഗ്രാഫ് അതിവേഗം ഉയര്ന്നപ്പോള് മാത്യുവിന്റെ യാത്രയ്ക്ക് അതേ വേഗത ഉണ്ടായിരുന്നില്ല.
എന്നാല് ഒരു നടന്റെ വളര്ച്ച അളക്കേണ്ടത് മറ്റൊരാളുടെ വേഗത നോക്കിയല്ലെന്ന് ‘പ്രഥമദൃഷ്ട്യാ കുറ്റക്കാര്’ ഓര്മിപ്പിക്കുന്നു.
ഈ സിനിമ കണ്ടിറങ്ങുമ്പോള് മാത്യുവിനെക്കുറിച്ച് ആദ്യം തോന്നുന്ന കാര്യം, അയാള് ഇപ്പോള് സ്വന്തം ഇടം കണ്ടെത്തിക്കഴിഞ്ഞു എന്നതാണ്. കരിയറില് വലിയൊരു കുതിച്ചുചാട്ടം എല്ലായ്പ്പോഴും ഒരേ സമയത്ത് സംഭവിക്കണമെന്നില്ല. ചില കഥാപാത്രങ്ങള് ഒരു നടന്റെ അടുത്ത ഘട്ടത്തിലേക്കുള്ള വാതില് തുറക്കും. മാത്യുവിന് അത്തരമൊരു സിനിമയാകാന് സാധ്യതയുള്ള ചിത്രമാണ് ‘പ്രഥമദൃഷ്ട്യാ കുറ്റക്കാര്’.
ചിത്രത്തിലെ പ്രകടനത്തില് ഏറ്റവും ശ്രദ്ധേയമാകുന്നത് മാത്യു കഥാപാത്രത്തെ അവതരിപ്പിക്കുന്ന രീതി തന്നെയാണ്. അഭിനയിക്കുകയാണെന്ന് പ്രേക്ഷകനെ നിരന്തരം ഓര്മിപ്പിക്കുന്ന തരത്തിലുള്ള പ്രകടനമല്ല അത്. പകരം, കഥാപാത്രത്തിന്റെ സ്വഭാവത്തിലേക്ക് വളരെ സ്വാഭാവികമായി ലയിച്ചുപോകുകയാണ് മാത്യു. സംഭാഷണങ്ങളേക്കാള് കൂടുതല് പലപ്പോഴും ശരീരഭാഷയും മുഖഭാവങ്ങളുമാണ് കഥാപാത്രത്തെ മുന്നോട്ടുകൊണ്ടുപോകുന്നത്. അതില് കാണിക്കുന്ന നിയന്ത്രണവും കൃത്യതയും എടുത്തുപറയേണ്ടതാണ്.
‘തണ്ണീര്മത്തന് ദിനങ്ങള്’ കാലത്തെ മാത്യുവിനെയും ഇന്നത്തെ മാത്യുവിനെയും ഒരുമിച്ച് നോക്കുമ്പോള് ഈ മാറ്റം കൂടുതല് വ്യക്തമാകും. അന്ന് നമ്മള് കണ്ടത് തന്റേതായൊരു നിഷ്കളങ്കതയും സ്വാഭാവികതയുമുള്ള യുവതാരത്തെയായിരുന്നെങ്കില്, ‘പ്രഥമദൃഷ്ട്യാ കുറ്റക്കാര്’ എത്തുമ്പോള് കൂടുതല് പക്വതയുള്ള ഒരു പെര്ഫോമറെയാണ് കാണാന് കഴിയുന്നത്. പരിചിതമായ അഭിനയരീതികളില് ഒതുങ്ങാതെ, തന്റെ പരിധികള് കുറച്ചുകൂടി വിപുലപ്പെടുത്താനുള്ള ശ്രമം ഈ കഥാപാത്രത്തില് വ്യക്തമാണ്.
ഇവിടെയാണ് നസ്ലെനുമായുള്ള താരതമ്യം തന്നെ അപ്രസക്തമാകുന്നത്. നസ്ലെന് മികച്ച നടനാണെന്ന കാര്യത്തില് സംശയമില്ല. പക്ഷേ ഒരാളുടെ മികച്ച പ്രകടനം മറ്റൊരാളുടെ കഴിവിനെ ഇല്ലാതാക്കുന്നില്ല.
നസ്ലെന്റെ കരിയര് ഉയര്ന്നുവന്നതോടെ മാത്യുവിന്റെ സാധ്യതകള് അവസാനിച്ചു എന്നര്ഥമില്ല. ഒരു നടന്റെ യഥാര്ഥ വിജയം, മറ്റൊരാളേക്കാള് മുന്നിലെത്തുന്നതിലല്ല. തനിക്ക് ലഭിക്കുന്ന ഓരോ കഥാപാത്രത്തിലൂടെയും ‘ഇതാണ് എന്റെ സ്ഥാനം’ എന്ന് പ്രേക്ഷകരെ ബോധ്യപ്പെടുത്തുന്നതിലാണ്. ആ അര്ത്ഥത്തില് മാത്യുവിന് നിര്ണായകമായൊരു മുന്നേറ്റമാണ് ഈ സിനിമ.
ഇനി മാത്യുവിനെ വിലയിരുത്താന് നസ്ലെന്റെ പേര് കൂടെ പറയേണ്ട സാഹചര്യമില്ല. മാത്യു തോമസ് എന്ന നടനെ തന്നെ നോക്കിയാല് മതി.
‘പ്രഥമദൃഷ്ട്യാ കുറ്റക്കാര്’ ഒരുപക്ഷേ മാത്യു തോമസിന്റെ കരിയറിലെ വെറുമൊരു സിനിമ മാത്രമല്ല. സ്വന്തം പേരില്, സ്വന്തം അഭിനയത്തിന്റെ കരുത്തില് ഒരു സ്ഥാനം ഉറപ്പിക്കുന്ന ഘട്ടത്തിന്റെ തുടക്കംകൂടിയാണ്. മറ്റൊരാളുടെ പേരിനോട് ചേര്ത്തല്ലാതെ, സ്വന്തം പ്രകടനം മാത്രം മുന്നില്വെച്ച് സംസാരിക്കപ്പെടാനുള്ള കഴിവ് തനിക്കുണ്ടെന്ന് ഈ ചിത്രത്തിലൂടെ അയാള് തെളിയിച്ചിരിക്കുന്നു.
Content Highlight: There is no longer any need to compare Mathew with anyone