ഇന്ത്യക്ക് ഇന്ന് കായിക തിരക്ക്;വിജയ പ്രതീക്ഷകളോടെ രാജ്യം മൈതാനത്തേക്ക്

ഇന്ത്യൻ കായികപ്രേമികൾക്ക് ഇന്ന് ഏറെ പ്രതീക്ഷകളും ആവേശവും നിറഞ്ഞ ഒരു തിരക്കുപിടിച്ച ദിവസമാണ്. അവിസ്മരണീയമായ നിരവധി ചരിത്രമുഹൂർത്തങ്ങൾക്കാണ് ഇന്ന് രാജ്യം സാക്ഷ്യം വഹിക്കാൻ പോകുന്നത്. വ്യത്യസ്ത വേദികളിലും കായിക ഇനങ്ങളിലുമായി പോരാട്ടങ്ങൾ നടക്കുമ്പോഴും, ഏവരുടെയും മനസ്സിൽ ഉയർന്നുകേൾക്കുന്ന ഒരേയൊരു പേര് ഇന്ത്യ.

ഏഷ്യൻ ഗെയിംസിൽ സ്വർണ മെഡൽ ലക്ഷ്യമിട്ട് ക്രിക്കറ്റിൽ പാകിസ്ഥാനെയും ഹോക്കിയിൽ മലേഷ്യയെയും ഇന്ത്യ നേരിടുമ്പോൾ, സ്വന്തം മണ്ണിൽ വെസ്റ്റ് ഇൻഡീസിനെതിരായ ഏകദിന പരമ്പരയിലെ അവസാന മത്സരത്തിനും ഇന്ത്യൻ സംഘം ഇറങ്ങും. ഇതിനുപുറമെ, ഫുട്ബോളിൽ ലോക ഫുട്ബോളിലെ വമ്പന്മാരായ ബ്രസീലാണ് ഇന്ത്യയുടെ എതിരാളികൾ. അതിനാൽ തന്നെ ഇന്ത്യൻ കായികപ്രേമികൾക്ക് ഇന്ന് ഒരുപോലെ ക്രിക്കറ്റും ഹോക്കിയും ഫുട്ബോളും കലർന്ന ദിവസമാണ്.

ഏഷ്യൻ ഗെയിംസിലെ പുരുഷ ക്രിക്കറ്റ് ഫൈനലിലാണ് ഇന്നത്തെ ആദ്യ പ്രധാന പോരാട്ടം. രാവിലെ 10 മണിക്ക് ജപ്പാനിലെ കൊരോഗി സ്പോർട്സ് പാർക്കിൽ വെച്ചാണ് ഇന്ത്യയും പാകിസ്ഥാനും സ്വർണ മെഡലിനായി നേർക്കുനേർ എത്തുന്നത്. സെമിഫൈനലിൽ ശ്രീലങ്കയെ 124 റൺസിന് തോൽപ്പിച്ചാണ് ഇന്ത്യ ഫൈനലിലെത്തിയത്. ആദ്യം ബാറ്റ് ചെയ്ത ഇന്ത്യ ഏഴ് വിക്കറ്റ് നഷ്ടത്തിൽ 169 റൺസ് നേടി.

ഇഷാൻ കിഷന്റെ വെടിക്കെട്ട് ബാറ്റിങ്ങാണ് ഈ ഒരു സ്കോറിലേക്ക് ഇന്ത്യ എത്തിയത്. 46 പന്തിൽ 80 റൺസാണ് കിഷൻ സ്വന്തമാക്കിയത്. മറുപടി ബാറ്റിങ്ങിനിറങ്ങിയ ശ്രീലങ്ക 45 റൺസിന് പുറത്തായി. മറുവശത്ത് ബംഗ്ലാദേശിനെ ആറ് വിക്കറ്റിന് തോൽപ്പിച്ചാണ് പാകിസ്ഥാൻ ഫൈനലിലെത്തിയത്. ഏഷ്യൻ ഗെയിംസിലെ സ്വർണത്തിനായി ഇന്ത്യ–പാകിസ്ഥാൻ പോരാട്ടത്തിന് കളമൊരുങ്ങുമ്പോൾ ഏറെ പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്.

അതേസമയം, ഇന്ത്യയുടെ മറ്റൊരു പ്രധാന ക്രിക്കറ്റ് പോരാട്ടം വെസ്റ്റ് ഇൻഡീസിനെതിരായ മൂന്നാം ഏകദിനമാണ്. മൂന്ന് മത്സര പരമ്പരയിലെ ആദ്യ രണ്ട് മത്സരങ്ങളും വിജയിച്ച ഇന്ത്യ ഇതിനകം പരമ്പര സ്വന്തമാക്കിയിട്ടുണ്ട്. ആദ്യ ഏകദിനത്തിൽ തിരുവനന്തപുരം വേദിയായപ്പോൾ ഇന്ത്യ എട്ട് വിക്കറ്റിന് വിജയിച്ചു. രണ്ടാം ഏകദിനത്തിൽ ഗുവാഹത്തിയിലും ഇന്ത്യ എട്ട് വിക്കറ്റിന്റെ വിജയം സ്വന്തമാക്കി.

രണ്ടാം മത്സരത്തിൽ വെസ്റ്റ് ഇൻഡീസ് ഉയർത്തിയ 406 റൺസ് വിജയലക്ഷ്യം ഇന്ത്യ അനായാസമാണ് മറികടന്നത്. പരമ്പര തൂത്തുവാരുകയെന്ന ലക്ഷ്യത്തോടെയാണ് ക്യാപ്റ്റൻ ശുഭ്‌മൻ ഗില്ലിന്റെ മെൻ ഇൻ ബ്ലൂ മൂന്നാം ഏകദിനത്തിനിറങ്ങുന്നത്. 2 മണിക്ക് പഞ്ചാബ് ക്രിക്കറ്റ് അസോസിയേഷൻ സ്റ്റേഡിയത്തിലാണ് മത്സരം നടക്കുന്നത്.

ക്രിക്കറ്റിന് പിന്നാലെ ഹോക്കി വേദിയിലും ഇന്ത്യ സ്വർണത്തിനായുള്ള പോരാട്ടത്തിലാണ്. പുരുഷ ഹോക്കി ഫൈനലിൽ മലേഷ്യയാണ് ഇന്ത്യയുടെ എതിരാളികൾ. സെമിഫൈനലിൽ പാകിസ്ഥാനെ 4–3ന് തോൽപ്പിച്ചാണ് ഇന്ത്യൻ ടീം ഫൈനലിലേക്ക് മുന്നേറിയത്. നിലവിലെ ഏഷ്യൻ ഗെയിംസ് ചാമ്പ്യന്മാരായ ഇന്ത്യയ്ക്ക് തുടർച്ചയായ രണ്ടാം സ്വർണം ലക്ഷ്യമിടാനുള്ള അവസരമാണിത്. മലേഷ്യയും മികച്ച പ്രകടനവുമായാണ് ഫൈനലിലെത്തിയത്. മത്സരത്തിൽ വിജയിക്കുന്ന ടീമിന് സ്വർണ മെഡലിനൊപ്പം 2028 ലോസ് ആഞ്ചലസ് ഒളിമ്പിക്സിലേക്കുള്ള നേരിട്ടുള്ള യോഗ്യതയും ലഭിക്കും.

വൈകുന്നേരം ഫുട്ബോൾ ആവേശത്തിനാണ് ഇന്ത്യ ഒരുങ്ങുന്നത്. അന്താരാഷ്ട്ര സൗഹൃദ മത്സരത്തിൽ ഇന്ത്യ ലോക ഫുട്ബോളിലെ വമ്പൻ ടീമായ ബ്രസീലിനെ നേരിടും. വൈകുന്നേരം 7 മണിക്ക് കൊൽക്കത്തയിലെ വിവേകാനന്ദ യുബ ഭാരതി ക്രീരംഗനിലാണ് മത്സരം. കാർലോ ആൻചലോട്ടിയുടെ നേതൃത്വത്തിലുള്ള ബ്രസീൽ ടീമിനെതിരെ കളിക്കാനുള്ള അവസരം ഇന്ത്യൻ താരങ്ങൾക്ക് ലഭിക്കുന്നത് മത്സരത്തിന്റെ പ്രധാന ആകർഷണമാണ്. വിനീഷ്യസ് ജൂനിയർ, എൻഡ്രിക്, മാർക്വിനോസ്, ബ്രൂണോ ഗിമറായസ് തുടങ്ങിയ താരങ്ങൾ ഉൾപ്പെടുന്ന ബ്രസീൽ ടീമിനെതിരെ ഇന്ത്യൻ പട ഇറങ്ങുന്നത്.

വിവിധ മൈതാനങ്ങളിൽ വിജയവും കായികമികവും ലക്ഷ്യമിട്ട് ഇന്ത്യ കളത്തിലിറങ്ങുമ്പോൾ, പുതിയ ചരിത്രമുഹൂർത്തങ്ങൾക്കായി രാജ്യം ഒന്നടങ്കം കാത്തിരിക്കുകയാണ്. ജയപരാജയങ്ങൾക്കപ്പുറം മികച്ചൊരു മത്സരം കാണാൻ സാധിക്കുമെന്ന പ്രതീക്ഷയിലാണ് കായിക പ്രേമികൾ.

Content Highlights : There is 4 major games for India today