ലഖ്നൗ: അയോധ്യ രാമക്ഷേത്രത്തിലെ സംഭാവന മോഷണവുമായി ബന്ധപ്പെട്ട് സി.സി.ടി.വിയില് 105 തവണ മോഷണം പതിഞ്ഞെന്ന് സുപ്രീം കോടതിയെ അറിയിച്ച് യു.പി സര്ക്കാര്. അന്വേഷണ സംഘം സെപ്റ്റംബര് 25നകം ആദ്യ കുറ്റപത്രം സമര്പ്പിക്കുമെന്നും കോടതിയില് പറഞ്ഞു.
കേസിലെ അന്വേഷണ പുരോഗതി സംബന്ധിച്ച വിശദമായ റിപ്പോര്ട്ട് സീല് ചെയ്ത കവറില് എസ്.ഐ.ടി സുപ്രീം കോടതിയില് സമര്പ്പിച്ചു. ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ചാണ് കേസ് പരിഗണിച്ചത്.
കേസില് ആദ്യ അറസ്റ്റ് നടന്നിട്ട് സെപ്റ്റംബര് 25ന് 90 ദിവസം പൂര്ത്തിയാകുമെന്ന് സോളിസിറ്റര് ജനറല് തുഷാര് മേത്ത കോടതിയില് പറഞ്ഞു. അതിനകം കുറ്റപത്രം സമര്പ്പിച്ചില്ലെങ്കില് പ്രതികള്ക്ക് നിയമപ്രകാരം സ്വാഭാവിക ജാമ്യത്തിന് അര്ഹത ലഭിക്കാമെന്നും അദ്ദേഹം കൂട്ടിച്ചേര്ത്തു. ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവര് ഉള്പ്പെട്ട ബെഞ്ചാണ് വാദം കേട്ടത്.
സംഭാവനകളുടെ നടത്തിപ്പില് ക്രമക്കേടുണ്ടെന്ന ആരോപണങ്ങള് ഉയര്ന്നതിനെ തുടര്ന്നാണ് അന്വേഷണം ശക്തമാക്കിയത്.
കേസില് എട്ട് പേരെ ജൂണില് അറസ്റ്റ് ചെയ്തിരുന്നു. തുടര്ന്ന് സുപ്രീം കോടതി അന്വേഷണത്തിന് വേഗം കൂട്ടാനും അന്വേഷണം അന്തിമഘട്ടത്തിലെത്തിക്കാനും നിര്ദേശം നല്കിയിരുന്നു. അന്വേഷണത്തില് ഫോറന്സിക് ഓഡിറ്ററെയും ഉള്പ്പെടുത്താന് കോടതി നിര്ദേശിച്ചിരുന്നു.
ക്ഷേത്രത്തിന്റെ സംഭാവനകള് കൈകാര്യം ചെയ്യുന്നതില് കൂടുതല് സുതാര്യത ഉറപ്പാക്കേണ്ടതുണ്ടെന്നും സുപ്രീം കോടതി നേരത്തെ വ്യക്തമാക്കിയിരുന്നു.
സംഭാവനകളുടെ വിശദാംശങ്ങള് പരസ്യമാക്കണമെന്നാവശ്യപ്പെട്ടുള്ള ഹരജികളും കോടതി പരിഗണിക്കുന്നുണ്ട്. ക്ഷേത്ര ട്രസ്റ്റിന് കീഴിലല്ല അന്വേഷണ സംഘം പ്രവര്ത്തിക്കുന്നതെന്നും കോടതിയോടാണ് ഉത്തരവാദിത്തപ്പെട്ടിരിക്കുന്നതെന്നും മുന് വാദത്തിനിടെ ബെഞ്ച് പറഞ്ഞിരുന്നു.
Content Highlights: Theft of donations at the Ayodhya Ram Temple: Theft caught on CCTV 105 times; UP government informs the Supreme Court.