കൊല്ലം: ശബരിമലയിലെ യുവതി പ്രവേശനവുമായി ബന്ധപ്പെട്ട് സി.പി.ഐ.എം നേതാവ് എം. സ്വരാജ് നടത്തിയ പ്രസംഗത്തില് റിപ്പോര്ട്ട് തേടി കോടതി. കൊല്ലം ജുഡിഷ്യല് ഫസ്റ്റ് ക്ലാസ് മജിസ്ട്രേറ്റാണ് പൊലീസിനോട് റിപ്പോര്ട്ട് തേടിയത്.
യൂത്ത് കോണ്ഗ്രസ് സംസ്ഥാന വൈസ് പ്രസിഡന്റ് വിഷ്ണു സുനില് നല്കിയ പരാതിയിന്മേലാണ് കോടതി നടപടി.
ശബരിമല സ്ത്രീ പ്രവേശന വിഷയത്തില് വിവാദപരവും അടിസ്ഥാന രഹിതവുമായ പ്രസ്താവന എം. സ്വരാജ് നടത്തിയെന്നാണ് യൂത്ത് കോണ്ഗ്രസ് സംസ്ഥാന വൈസ് പ്രസിഡന്റിന്റെ പരാതി.
2018ലെ സ്വരാജിന്റെ പ്രസംഗത്തിന്റെ വീഡിയോ സഹിതമായിരുന്നു പരാതി.
അയ്യപ്പന്റെ ബ്രഹ്മചര്യം അവസാനിച്ചു എന്നും മാളികപ്പുറത്തമ്മയുടെ കണ്ണീരാണ് പ്രളയമായി നദികളിലൂടെ ഒഴുകി വന്നതെന്നുമായിരുന്നു എം. സ്വരാജിന്റെ പ്രസംഗത്തില് പറഞ്ഞത്.
വിഷയത്തില് കൊല്ലം വെസ്റ്റ് എസ്.എച്ച്.ഒയ്ക്കും സിറ്റി പൊലീസ് കമ്മീഷണര്ക്കും വിഷ്ണു സുനില് നേരത്തെ പരാതി നല്കിയിരുന്നു. എന്നാല് നടപടിയുണ്ടാകാത്ത സാഹചര്യത്തിലാണ് കോടതിയെ സമീപിച്ചത്.
Content Highlight: The court sought a report on the speech made by M. Swaraj regarding the entry of women into Sabarimala.