അഫ്ഗാനിസ്ഥാനെതിരായ ടി-20 പരമ്പരയിലെ മൂന്നാം മത്സരത്തിലും വിജയം സ്വന്തമാക്കിയ ഇന്ത്യ പരമ്പര തൂത്തുവാരിയിരിക്കുകയാണ്. ദല്ഹി അരുണ് ജെയ്റ്റ്ലി സ്റ്റേഡിയത്തില് നടന്ന മത്സരത്തില് 127 റണ്സിന്റെ വിജയമാണ് ഇന്ത്യ സ്വന്തമാക്കിയത്. ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഇന്ത്യ 222 റണ്സിന്റെ കൂറ്റന് സ്കോറാണ് അടിച്ചെടുത്തത്. വിജയലക്ഷ്യം പിന്തുടര്ന്നിറങ്ങിയ അഫ്ഗാനിസ്ഥാന് 94 റണ്സിന് പുറത്താവുകയായിരുന്നു.
ഇതോടെ ഒരു ചരിത്ര നേട്ടം സ്വന്തമാക്കാനും ഇന്ത്യയ്ക്ക് സാധിച്ചിരിക്കുകയാണ്. അന്താരാഷ്ട്ര ടി-20 ലോകചരിത്രത്തില് ഏറ്റവും കൂടുതല് തവണ 100+ റണ്സിന് വിജയിക്കുന്ന ടീമാകാനാണ് ഇന്ത്യയ്ക്ക് സാധിച്ചത്. ഈ നേട്ടത്തില് കാനഡയും ഇന്ത്യയ്ക്കൊപ്പമുണ്ട്.
ഇന്ത്യ – 10
കാനഡ – 10
ഓസ്ട്രിയ – 9
സിംബാബ്വേ – 8
നേപ്പാള് – 8
ജപ്പാന് – 8
മലേഷ്യ – 8
ഉഗാണ്ട – 8
സ്പെയ്ന് – 6
ടാന്സാനിയ – 6
പാകിസ്ഥാന് – 6
ഇംഗ്ലണ്ട് – 6
ഡെന്മാര്ക്ക് – 6
പാപുവ ന്യൂ ഗ്വിനിയ – 5
സൂപ്പര് താരം അഭിഷേക് ശര്മയുടെ സെഞ്ച്വറി കരുത്തിലാണ് ഇന്ത്യ മികച്ച സ്കോറിലെത്തിയത്. നേരിട്ട 30ാം പന്തില് സെഞ്ച്വറി നേടിയ താരം 34 പന്തില് 108 റണ്സുമായാണ് കളം വിട്ടത്. 11 സിക്സറും ഒമ്പത് ഫോറും അടക്കം 317.65 എന്ന വെടിക്കെട്ട് സ്ട്രൈക് റേറ്റിലാണ് സ്കോര് ഉയര്ത്തിയത്.
അഭിഷേകിന് പുറമെ സൂപ്പര് താരം സഞ്ജു സാംസണും തിളങ്ങിയിരുന്നു. രണ്ട് ഫോറും നാല് സിക്സറും അടക്കം 35 പന്തില് 50 റണ്സുമായാണ് താരം പുറത്തായത്.
ശ്രേയസ് അയ്യര് (20 പന്തില് 29), ശിവം ദുബെ (പത്ത് പന്തില് 14), ഇഷാന് കിഷന് (എട്ട് പന്തില് പത്ത്) എന്നിവരാണ് ഇന്ത്യന് നിരയില് ഇരട്ടയക്കം കണ്ട മറ്റ് താരങ്ങള്.
ഇന്ത്യയ്ക്കായി നിതീഷ് കുമാര് റെഡ്ഡിയും രവി ബിഷ്ണോയിയും മൂന്ന് വിക്കറ്റ് വീതം വീഴ്ത്തി. അക്സര് പട്ടേല് രണ്ട് അഫ്ഗാന് താരങ്ങളെ മടക്കിയപ്പോള് ജസ്പ്രീത് ബുംറയും യാഷ് താക്കൂറും ഓരോ വിക്കറ്റ് വീതവും വീഴ്ത്തി.
16 പന്തില് 25 റണ്സ് നേടിയ ക്യാപ്റ്റന് ഇബ്രാഹിം സദ്രാനാണ് അഫ്ഗാനിസ്ഥാന്റെ ടോപ്പ് സ്കോറര്. അഫ്ഗാനിസ്ഥാനായി അസ്മത്തുള്ള ഒമര്സായ് രണ്ട് വിക്കറ്റും അബ്ദുള്ള അഹമ്മദ്സായ്, റാഷിദ് ഖാന് എന്നിവര് ഓരോ വിക്കറ്റ് വീതവും സ്വന്തമാക്കി.
Content Highlight: Team India Achieve Great Record In International T20 Cricket