2025ലെ ഏഷ്യാ കപ്പ് ഫൈനലില് പാകിസ്ഥാനെ പരാജയപ്പെടുത്തി ഇന്ത്യ ഒമ്പതാം തവണയും ഏഷ്യാ കപ്പ് സ്വന്തമാക്കിയിരിക്കുകയാണ്. ദുബായ് അന്താരാഷ്ട്ര സ്റ്റേഡിയത്തില് നടന്ന മത്സരത്തില് ആദ്യം ബാറ്റിങ്ങിനിറങ്ങിയ പാകിസ്ഥാന് 146 റണ്സിന് ഓള് ഔട്ടാവുകയായിരുന്നു. മറുപടി ബാറ്റിങ്ങില് 19.4 ഓവറില് ഇന്ത്യ 150 റണ്സ് നേടി വിജയം സ്വന്തമാക്കുകയായിരുന്നു.
വിജയത്തിന് പിന്നാലെ എ.സി.സി (ഏഷ്യന് ക്രിക്കറ്റ് കൗണ്സില്) സെക്രട്ടറിയും പാകിസ്ഥാന് ആഭ്യന്തര മന്ത്രിയുമായ മൊഹസിന് നഖ്വിയില് നിന്നും കിരീടം സ്വീകരിക്കില്ലെന്ന് ഇന്ത്യ അറിയിച്ചിരുന്നു. ഇതിന് പിന്നാലെ ട്രോഫിയുമായി നഖ്വി മടങ്ങുകയായിരുന്നു.
മാത്രമല്ല മാച്ച് പ്രസന്റേഷന് സമയത്ത് ഇന്ത്യന് ക്യാപ്റ്റന് സൂര്യകുമാര് യാദവ് ട്രോഫി കയ്യിലുള്ളതുപോലെ കാണിച്ച് നടന്ന് വന്നാണ് ടീമിനൊപ്പം വിജയം ആഘോഷിച്ചത്. മാത്രമല്ല പ്രസന്റേഷന് സമയത്ത് റണ്ണേഴ്സ് അപ്പിനുള്ള ചെക്ക് ഏറ്റവാങ്ങാന് വന്ന പാക് ക്യാപ്റ്റന് സല്മാന് അലി ആഘ ചെക്ക് സ്വീകരിച്ച് വലിച്ചെറിയുന്നത് ഏറെ ചര്ച്ച ചെയ്യപ്പെട്ടിരുന്നു.
മത്സര ശേഷം നടന്ന പത്രസമ്മേളനത്തില് വിവാദങ്ങളെക്കുറിച്ച് ഇന്ത്യന് ക്യാപ്റ്റന് സൂര്യകുമാര് യാദവ് സംസാരിച്ചിരുന്നു. രണ്ട് ടീമുകളും വ്യത്യസ്ഥരാണെന്നും ഇന്ത്യ ഒരിക്കലും ആംഗ്യങ്ങളോ കൈ ചലനങ്ങളോ നടത്താന് ആഗ്രഹിച്ചില്ലെന്നും സൂര്യ പറഞ്ഞു.
‘രണ്ട് ടീമുകളും തമ്മില് വ്യത്യാസമുണ്ടെന്ന് ഞാന് കരുതുന്നു. ഞങ്ങള് ഒരിക്കലും ആംഗ്യങ്ങളോ കൈ ചലനങ്ങളോ നടത്താന് ആഗ്രഹിച്ചില്ല. മാന്യതയോടെ കളിക്കുക എന്നതായിരുന്നു ഞങ്ങളുടെ ലക്ഷ്യം. എന്നാല് അവര് കളിക്കളത്തില് പ്രശ്നങ്ങള് ഉണ്ടാക്കാന് ശ്രമിച്ചു. അതിന്റെ ഫലം ഏത് വഴിക്കും പോകാം, എല്ലാം കഴിഞ്ഞ് തിരിച്ചെത്തുമ്പോള് കളിക്കാനെടുത്ത കഠിനാധ്വാനത്തില് നിങ്ങള് അഭിമാനിക്കണം,’ സൂര്യകുമാര് യാദവ് മത്സര ശേഷമുള്ള പത്രസമ്മേളനത്തില് പറഞ്ഞു.
Content Highlight: Suryakumar Yadav Talking About India VS Pakistan Match