എതിരാളികളുടെ കണ്ണില്‍ നോക്കി സമ്മര്‍ദത്തിലാക്കാന്‍ കഴിയണം, അവന് അത് സാധിക്കും; ടെസ്റ്റ് ക്യാപ്റ്റന്‍സിയില്‍ അഭിപ്രായവുമായി റെയ്‌ന

അപ്രതീക്ഷിതമായിട്ടായിരുന്നു ടെസ്റ്റ് ക്രിക്കറ്റില്‍ നിന്ന് സൂപ്പര്‍ താരങ്ങളായ രോഹിത് ശര്‍മയും വിരാട് കോഹ്‌ലിയും വിരമിക്കല്‍ പ്രഖ്യാപിച്ചത്. നിലവില്‍ സീനിയര്‍ താരങ്ങള്‍ മടങ്ങിയതോടെ ഇന്ത്യന്‍ ടെസ്റ്റ് ക്രിക്കറ്റിന്റെ നായകന്‍ ആരാകുമെന്ന ചോദ്യമാണ് നിലനില്‍ക്കുന്നത്.

നിലവിലെ വൈസ് ക്യാപ്റ്റന്‍ ശുഭ്മന്‍ ഗില്ലും റിഷബ് പന്തും ജസ്പ്രീത് ബുംറയുമാണ് ക്യാപ്റ്റന്‍ സ്ഥാനത്തേക്ക് പരിഗണിക്കപ്പെടാന്‍ സാധ്യതയുള്ളവര്‍. ഇതോടെ ടെസ്റ്റ് ക്രിക്കറ്റില്‍ ഇന്ത്യന്‍ ക്യാപ്റ്റന്‍ സ്ഥാനത്തേക്കെത്താന്‍ ഗില്ലിന് മുന്‍ഗണന നല്‍കി സംസാരിക്കുകയാണ് മുന്‍ ഇന്ത്യന്‍ താരം സുരേഷ് റെയ്‌ന.

ഐ.പി.എല്ലില്‍ ഗില്‍ കിരീടം നേടിയാല്‍ ടെസ്റ്റ് ക്രിക്കറ്റില്‍ ഇന്ത്യയെ നയിക്കുന്നതില്‍ അംഗീകരിക്കപ്പെടുമെന്നും മാത്രമല്ല ഡ്രസ്സിങ് റൂമില്‍ താരത്തിന് ബഹുമാനം ലഭിക്കുകയും ചെയ്യുമെന്ന് സുരേഷ് റെയ്‌ന പറഞ്ഞു.

വിരാടും രോഹിത്തും വിരമിച്ചതോടെ എതിരാളികളെ കണ്ണില്‍ നോക്കി സമ്മര്‍ദത്തില്‍ ആക്കാന്‍ കഴിയുന്ന ക്യാപ്റ്റനെ ആണ് ഇന്ത്യയ്ക്ക് ആവശ്യമെന്നും ഗില്ലിന് അത് സാധിക്കുമെന്നും റെയ്‌ന പറഞ്ഞു.

‘ശുഭ്മന്‍ ഗില്‍ ഐ.പി.എല്‍ ട്രോഫി നേടാന്‍ ആഗ്രഹിക്കുകയാണ്. ഐ.പി.എല്‍ ജയിച്ചതിന് ശേഷം ടെസ്റ്റുകളില്‍ അദ്ദേഹം നയിച്ചാല്‍ അവന്‍ അംഗീകരിക്കപ്പെടും, മാത്രമല്ല ഡ്രസ്സിങ് റൂമില്‍ അദ്ദേഹത്തിന് വളരെയധികം ബഹുമാനം ലഭിക്കുകയും ചെയ്യും.

ഇപ്പോള്‍ വിരാടോ രോഹിത്തോ ഇല്ല, അവര്‍ എതിരാളികളെ കണ്ണില്‍ നോക്കി സമ്മര്‍ദത്തിലാക്കുമായിരുന്നു. അതിന് വലിയ ഊര്‍ജ്ജവും സ്വഭാവവും ശരീരഭാഷയും വേണം, ശുഭ്മന്‍ ഗില്ലിന് അതുണ്ട്,’ സുരേഷ് റെയ്‌ന പറഞ്ഞു.

2020ല്‍ ടെസ്റ്റ് ക്രിക്കറ്റില്‍ അരങ്ങേറ്റം നടത്തിയ ഗില്‍ 32 മത്സരങ്ങളിലെ 59 ഇന്നിങ്‌സില്‍ നിന്ന് 1893 റണ്‍സ് നേടിയിട്ടുണ്ട്. മാത്രമല്ല 128 റണ്‍സിന്റെ ഉയര്‍ന്ന സ്‌കോര്‍ ഉള്‍പ്പെടെ 35 ആവറേജിലാണ് താരം ബാറ്റ് വീശിയത്. അഞ്ച് സെഞ്ച്വറികളും ഏഴ് അര്‍ധ സെഞ്ച്വറികളും ഉള്‍പ്പെടെയാണ് താരത്തിന്റെ ടെസ്റ്റ് റണ്‍വേട്ട.

Content Highlight: Suresh Raina Shubhman Gill Is Fit For Receive Test Captaincy