സൂപ്പര്താരം ശ്രേയസ് അയ്യര് എന്ന് കളിക്കളത്തിലേക്ക് തിരിച്ച് വരുമെന്നാണ് ആരാധകര് ആകാംഷയോടെ കാത്തിരിക്കുന്നത്. ഗുരുതരമായി പരിക്കേറ്റ് രണ്ട് മാസത്തോളം പുറത്തായിരുന്നു താരത്തെ ഉടനെ തന്നെ ഇന്ത്യന് ജേഴ്സിയില് കാണാനാവുമെന്നാണ് പുതിയ റിപ്പോര്ട്ടുകള് സൂചിപ്പിക്കുന്നത്. ശ്രേയസിന്റെ കാര്യത്തില് പുതിയ അപ്ഡേഷന് നല്കുകയാണ് ടൈംസ് ഓഫ് ഇന്ത്യയുടെ റിപ്പോര്ട്ട്.
ഇന്ത്യന് ടീമിലേക്കുള്ള ശ്രേയസിന്റെ തിരിച്ചുവരവ് ന്യൂസിലാന്ഡിന് എതിരെയുള്ള പരമ്പരയിലൂടെ ആയേക്കുമെന്നാണ് സൂചന. ഇന്ത്യന് വൈസ് ക്യാപ്റ്റന് ജനുവരി 11 മുതല് ആരംഭിക്കുന്ന ന്യൂസിലാന്ഡ് പരമ്പരയില് കളത്തിലെത്തുമെന്നും അതിന് മുമ്പ് താരം ആഭ്യന്തര ക്രിക്കറ്റില് കളിക്കുമെന്നും റിപ്പോര്ട്ടില് പറയുന്നു. വിജയ് ഹസാരെ ട്രോഫിയില് രണ്ട് മത്സരങ്ങളിലാവും താരം ബാറ്റേന്തുക. ജനുവരി മൂന്നിനും ആറിനും നടക്കുന്ന മത്സരങ്ങളില് മുംബൈക്കായി ഇറങ്ങിയേക്കും എന്നും റിപ്പോര്ട്ടിലുണ്ട്.
ശ്രേയസ് അയ്യർ. Photo: BCCI/x.com
ഒക്ടോബര് മാസം നടന്ന ഇന്ത്യയുടെ ഓസ്ട്രേലിയന് പര്യടനത്തിലെ ഏകദിന പരമ്പരക്കിടെയാണ് ശ്രേയസിന് പരിക്കേറ്റത്.ഇടത് വാരിയെല്ലിനായിരുന്നു താരത്തിന്റെ പരിക്ക്. പരമ്പരയിലെ അവസാന ഏകദിനത്തിടെയായിരുന്നു സംഭവം. ഒക്ടോബര് 25ന് നടന്ന മത്സരത്തില് ഓസീസ് വിക്കറ്റ് കീപ്പര് അലക്സ് കാരിയെ പുറത്താക്കാന് ക്യാച്ച് എടുക്കുന്നതിടെയായിരുന്നു അയ്യര്ക്ക് പരിക്ക് പറ്റിയത്.
പിന്നാലെ പരിക്ക് ഗുരുതരമായതിനെ തുടര്ന്ന് ശ്രേയസിനെ സിഡിനിയിലെ ആശുപത്രിയിലെ ഐ.സി.യുവിയില് പ്രവേശിപ്പിക്കുകയും താരം ശസ്ത്രക്രിയക്ക് വിധേയമാകുകയും ചെയ്തു. ഇത് കാരണം താരത്തിന് കുറച്ച് കാലം കളിക്കളത്തില് നിന്ന് വിട്ടുനില്ക്കേണ്ടി വന്നു. ഇതിനിടയില് ഇന്ത്യന് വൈസ് ക്യാപ്റ്റന് ആഫ്രിക്കയ്ക്ക് എതിരെയുള്ള പരമ്പരയും ആഭ്യന്തര ടി – 20 ടൂര്ണമെന്റായ മുഷ്താഖ് അലി ട്രോഫിയും നഷ്ടമായിരുന്നു.
നേരത്തെ, ശ്രേയസ് റീഹാബിലിറ്റേഷനായി ബെംഗളൂരുവിലെ സെന്റര് ഓഫ് എക്സലന്സില് (സി.ഒ.ഇ) എത്തിയിട്ടുണ്ടെന്നും അവിടെ താരം ബാറ്റിംഗ് പരിശീലനം നടത്തിയെന്നും റിപ്പോര്ട്ടുകള് പുറത്ത് വന്നിരുന്നു. വേദനയോ അസ്വസ്ഥകളോ ഇല്ലാതെ താരം ഒരു മണിക്കൂറോളം ബാറ്റ് ചെയ്തുവെന്നായിരുന്നു റിപ്പോര്ട്ടില് സൂചിപ്പിച്ചിരുന്നത്.
സി.ഒ.ഇയില് ശ്രേയസ് അയ്യര് ഡിസംബര് 30 വരെ തുടരുമെന്നാണ് പുതിയ റിപ്പോര്ട്ടിലുള്ളത്. പിന്നാലെ, വിജയ് ഹസാരെയില് കളിക്കാന് മുംബൈ ടീമിന്റെ ഭാഗമാകും. നിലവില് ജയ്പ്പൂരുള്ള ടീമിനൊപ്പം താരം ജനുവരി രണ്ടിനാവും ചേരുക.
ആഭ്യന്തര ക്രിക്കറ്റില് കളിച്ചതിന് ശേഷം ന്യൂസിലാന്ഡ് പരമ്പരയ്ക്കുള്ള ഇന്ത്യന് ക്യാമ്പിലെത്തുമെന്നും റിപ്പോര്ട്ട് സൂചിപ്പിക്കുന്നു. ജനുവരി 11 മുതല് 18 വരെയാണ് ഏകദിന പരമ്പര. മൂന്ന് മത്സരങ്ങളാണ് പരമ്പരയില് ഷെഡ്യൂള് ചെയ്തിരിക്കുന്നത്.
Content Highlight: Shreyas Iyer likely to play Vijay Hazare Trophy ahead of India ODI return for New Zealand series: Report