സൂപ്പര് താരം സഞ്ജു സാംസണെ വൈകാതെ ഇന്ത്യന് ക്യാപ്റ്റനായി കാണാന് സാധിക്കുമെന്ന് വെസ്റ്റ് ഇന്ഡീസ് വെടിക്കെട്ട് വീരനും രാജസ്ഥാന് റോയല്സില് സഞ്ജുവിന്റെ സഹതാരവുമായ ഷിംറോണ് ഹെറ്റ്മെയര്. ക്യാപ്റ്റന് എന്ന നിലയില് സഞ്ജു വളരെ മികച്ചതാണെന്നും കരിയറിലെ ഏതെങ്കിലും ഒരു പോയിന്റില് താരം ഇന്ത്യയെ നയിക്കുമെന്നും ഹെറ്റ്മെയര് പറഞ്ഞു.
ക്രിക്കറ്റ് ഡോട്ട് കോമിന് നല്കിയ പ്രത്യേക അഭിമുഖത്തിലാണ് ഹെറ്റ്മെയര് ‘തന്റെ’ ക്യാപ്റ്റനെ കുറിച്ച് സംസാരിച്ചത്.
‘ക്യാപ്റ്റനെന്ന നിലയില് ഞാന് സഞ്ജുവിനെ വളരെ മികച്ചതായി തന്നെ റേറ്റ് ചെയ്യും. കരിയറില് അദ്ദേഹത്തിന് ഇന്ത്യയെ നയിക്കാന് അവസരം ലഭിക്കുമെന്നാണ് ഞാന് വിശ്വസിക്കുന്നത് കാരണം കളിക്കളത്തിനകത്തും പുറത്തും ശാന്തനായി തുടരുന്ന സഞ്ജു തന്റെ ടീമിനെയും സഹതാരങ്ങളെയും എല്ലായ്പ്പോഴും ശ്രദ്ധിക്കുകയും ചെയ്യുന്നു,’ ഹെറ്റ്മെയര് പറഞ്ഞു.
അതേസമയം, ഏഷ്യാ കപ്പിനുള്ള ഇന്ത്യന് സ്ക്വാഡില് സഞ്ജു സാംസണ് ഇടം പിടിക്കുമെന്നാണ് റിപ്പോര്ട്ടുകള് സൂചിപ്പിക്കുന്നത്. അഭിഷേക് ശര്മയ്ക്കൊപ്പം സഞ്ജു തന്നെ ഇന്ത്യയ്ക്കായി ഇന്നിങ്സ് ഓപ്പണ് ചെയ്യുമെന്നാണ് ക്രിക്ബസ്സ് റിപ്പോര്ട്ട് ചെയ്യുന്നത്.
ടീമിന്റെ വിക്കറ്റ് കീപ്പറും സഞ്ജു തന്നെയായിരിക്കും. ഐ.പി.എല്ലില് റോയല് ചലഞ്ചേഴ്സ് ബെംഗളൂരുവിനായി തിളങ്ങിയ ജിതേഷ് ശര്മ ബാക്ക് അപ്പ് വിക്കറ്റ് കീപ്പറായി ടീമിനൊപ്പം ചേരുമെന്നും റിപ്പോര്ട്ട് സൂചിപ്പിക്കുന്നു.
എന്നാല് സൂപ്പര് പേസര് മുഹമ്മദ് സിറാജ് ഏഷ്യാ കപ്പില് ഇന്ത്യയ്ക്കൊപ്പമുണ്ടാകാന് സാധ്യതയില്ല. ഇംഗ്ലണ്ട് പര്യടനത്തിലെ താരത്തിന്റെ വര്ക്ക് ലോഡും ഏഷ്യാ കപ്പിന് പിന്നാലെയെത്തുന്ന ഇന്ത്യ – വെസ്റ്റ് ഇന്ഡീസ് ടെസ്റ്റ് പരമ്പരയും മുമ്പില് കണ്ടാണ് ഈ നീക്കമെന്നാണ് കരുതപ്പെടുന്നത്. സ്റ്റാര് പേസര് മുഹമ്മദ് ഷമിക്കും സ്ക്വാഡില് ഇടമുണ്ടാകില്ല എന്നാണ് റിപ്പോര്ട്ട്.
ഏഷ്യാ കപ്പില് ശുഭ്മന് ഗില്ലിന്റെ എന്ട്രി പരിശീലകന്റെ തീരുമാനമനുസരിച്ചിരിക്കും. വെസ്റ്റ് ഇന്ഡീസ് പരമ്പര മുമ്പില് കണ്ട് സിറാജിനെ പോലെ ക്യാപ്റ്റന് ഗില്ലിനും വിശ്രമം അനുവദിച്ചേക്കും.
ഏഷ്യാ കപ്പില് ഗ്രൂപ്പ് എ-യിലാണ് ഇന്ത്യയുടെ സ്ഥാനം. പാകിസ്ഥാന്, യു.എ.ഇ, ഒമാന് എന്നിവരാണ് ഗ്രൂപ്പിലെ മറ്റ് ടീമുകള്.
സെപ്റ്റംബര് പത്തിനാണ് ഇന്ത്യയുടെ ആദ്യ മത്സരം. യു.എ.ഇയാണ് എതിരാളികള്. സെപ്റ്റംബര് 14ന് പാകിസ്ഥാനെതിരെയും 19ന് ഒമാനെതിരെയും ഇന്ത്യ കളത്തിലിറങ്ങും.
ഗ്രൂപ്പ് എ
ഗ്രൂപ്പ് ബി
സെപ്റ്റംബര് 9 – അഫ്ഗാനിസ്ഥാന് vs ഹോങ് കോങ് – അബുദാബി
സെപ്റ്റംബര് 10 – ഇന്ത്യ vs യു.എ.ഇ- ദുബായ്
സെപ്റ്റംബര് 11 – ഹോങ് കോങ് vs ബംഗ്ലാദേശ് – അബുദാബി
സെപ്റ്റംബര് 12 – പാകിസ്ഥാന് vs ഒമാന് – ദുബായ്
സെപ്റ്റംബര് 13 – ബംഗ്ലാദേശ് vs ശ്രീലങ്ക – അബു ദാബി
സെപ്റ്റംബര് 14 – ഇന്ത്യ vs പാകിസ്ഥാന് – ദുബായ്
സെപ്റ്റംബര് 15 – യു.എ.ഇ vs ഒമാന് – അബുദാബി
സെപ്റ്റംബര് 15 – ശ്രീലങ്ക vs ഹോങ് കോങ് – ദുബായ്
സെപ്റ്റംബര് 16 – ബംഗ്ലാദേശ് vs അഫ്ഗാനിസ്ഥാന് – അബുദാബി
സെപ്റ്റംബര് 17 – പാകിസ്ഥാന് vs യു.എ.ഇ – ദുബായ്
സെപ്റ്റംബര് 18 – ശ്രീലങ്ക vs അഫ്ഗാനിസ്ഥാന് – അബുദാബി
സെപ്റ്റംബര് 19 – ഇന്ത്യ vs ഒമാന് – അബുദാബി
Content Highlight: Shimron Hetmyer says Sanju Samson will captain India at some point