വേണു നാഗവള്ളിയുടെ രചനയിൽ സത്യൻ അന്തിക്കാട് സംവിധാനം ചെയ്ത സിനിമയാണ് അർത്ഥം. ഇപ്പോൾ ചിത്രത്തെക്കുറിച്ച് സംസാരിക്കുകയാണ് സംവിധായകൻ സത്യൻ അന്തിക്കാട്.
‘സാധാരണ ഒരു വിഷയമാണ് ആദ്യമുണ്ടാകുന്നത്. കുറുക്കന്റെ കല്ല്യാണം മുതൽ എന്റെ എല്ലാ സിനിമകളിലും ആദ്യം ഒരു സബ്ജക്ടാണ് ആദ്യമുണ്ടാകുന്നത്. അതിൽ നിന്നാണ് സിനിമ ഉണ്ടാകുന്നത്. തലയണമന്ത്രം, സന്മനസ്സുള്ളവർക്ക് സമാധാനം എന്ന സിനിമയെല്ലാം സബ്ജെക്ടിൽ നിന്നുണ്ടായതാണ്. ആ സബ്ജെക്ട് രൂപപ്പെടുമ്പോൾ മോഹൻലാൽ നമ്മുടെ കൂടെയുണ്ട്. അങ്ങനെ മോഹൻലാലായി ഹീറോ. അല്ലെങ്കിൽ ജയറാമാണ് കൂടെയുള്ളത് എങ്കിൽ ജയറാമാണ് ഹീറോ.
പക്ഷെ ഒരു നടന് വേണ്ടി ഒരു സിനിമ ചെയ്തത് ജീവിതത്തിൽ ഒരിക്കൽ മാത്രമാണ്. അത് അർത്ഥമാണ്. അത് മമ്മൂട്ടി എന്നെ വാശിപിടിപ്പിച്ചിട്ടാണ്. അതിന് മുമ്പ് ശ്രീധരന്റെ ഒന്നാം തിരുമുറിവ് എന്ന പടത്തിൽ മമ്മൂട്ടി എന്റെ കൂടെ വർക്ക് ചെയ്തിട്ടുണ്ട്. കിന്നാരത്തിലും ഗാന്ധിനഗർ സെക്കഡ് സ്ട്രീറ്റിലൊക്കെ അഭിനയിച്ചിട്ടുണ്ടെങ്കിലും ഒരു പ്രധാന കഥാപാത്രമായി എത്തിയത് ശ്രീധരന്റെ തിരുമുറിവ് ആണ്.
ആ സിനിമ നന്നായിരുന്നെങ്കിലും സന്മനസ് പോലെ അത് ഹിറ്റായില്ല. പക്ഷെ മമ്മൂട്ടി വളരെ രസകരമായി ചെയ്ത റോളാണ്. ശ്രീധരനായിട്ട് വളരെ സ്വാഭാവികമായി സാധാരണക്കാരനായി അഭിനിയിച്ചിട്ടുണ്ട്.
അപ്പോൾ അതുകഴിഞ്ഞിട്ട് മറ്റൊരു സെറ്റിൽ വെച്ച് മമ്മൂട്ടിയെ കണ്ടപ്പോൾ എന്റെ അടുത്ത് പറഞ്ഞു ‘നിങ്ങൾ വലിയ നാടോടിക്കാറ്റും വരവേൽപ്പ് ഒക്കെ എടുക്കുന്നുണ്ട്. മോഹൻലാലിനെ വെച്ച് ധാരാളം ഹിറ്റുകൾ ചെയ്യുന്നുണ്ട്. എനിക്കും ധാരാളം സൂപ്പർഹിറ്റുകൾ വേറെയുണ്ട്. നിങ്ങൾക്ക് എന്നെ വെച്ചിട്ട് ഒരു ഹിറ്റ് ഉണ്ടാക്കാൻ സാധിക്കുന്നില്ലെങ്കിൽ അത് നിങ്ങളുടെ ദോഷമാണ്. നിങ്ങളുടെ കുറ്റമാണ്’ എന്ന്. ആ പറഞ്ഞത് എനിക്ക് ഉള്ളിൽ കൊണ്ടു. മമ്മൂട്ടിയെ വെച്ചൊരു ഹിറ്റ്. മമ്മൂട്ടിയെ ഇഷ്ടപ്പെടുന്നവർക്ക് വേണ്ടിയൊരു പടം.
ആ സമയത്ത് ശ്രീനിവാസൻ വടക്കുനോക്കി യന്ത്രത്തിന്റെ തിരക്കുകളിലേക്ക് പോയി. അപ്പോൾ വേണു നാഗവള്ളിയെ വിളിച്ചിട്ട് ഒരു സബ്ജെക്ട് ആലോചിക്കണെമെന്ന് പറഞ്ഞു. ഞാൻ ആദ്യം പറഞ്ഞത് ഇതാണ്. ഒന്ന് മമ്മൂട്ടിയെ ആളുകൾക്ക് ഇഷ്ടപ്പെടുന്ന വിധത്തിലുള്ള ക്യാരക്ടർ ഉണ്ടാകണം. ആ സിനിമയിൽ ശ്രീനിവാസനും കോൺട്രിബ്യൂട്ട് ചെയ്തു. അങ്ങനെ വന്നുകഴിഞ്ഞപ്പോൾ അർത്ഥം പൂർണതയുള്ള സിനിമയായി മാറി. ആ സിനിമ വിചാരിച്ചതുപോലെ തന്നെ സൂപ്പർ ഡ്യൂപ്പർ ഹിറ്റായി മാറി. മമ്മൂട്ടിയുടെ മുന്നിൽ എന്റെ മാനം കാത്തു,’ സത്യൻ അന്തിക്കാട് പറയുന്നു.
Content Highlight: Sathyan Anthikkad talking about Artham Movie and Mammootty