'സാംസ്‌കാരികനായിക' എന്ന തെറിവാക്ക് വിളിക്കരുത്; ഞാന്‍ ഒരു എഴുത്തുകാരി മാത്രം: സാറ ജോസഫ്

തൃശൂര്‍: തന്നെ സാംസ്‌കാരികനായിക എന്ന പേര് ഉപയോഗിച്ച് വിശേഷിപ്പിക്കരുതെന്ന് എഴുത്തുകാരി സാറ ജോസഫ്. താന്‍ ഒരു എഴുത്തുകാരി മാത്രമാണെന്നും ഏതൊരു സമൂഹ ജീവിയേയും പോലെ തനിക്ക് ശരിയെന്നു തോന്നുന്ന കാര്യങ്ങള്‍ ഉറക്കെ പറഞ്ഞിട്ടുണ്ടെന്നും സാറ ജോസഫ് ഫേസ്ബുക്ക് പോസ്റ്റില്‍ പറഞ്ഞു.

തന്റെ മേല്‍ അടിച്ചേല്പിക്കപ്പെട്ടിട്ടുള്ളതും താന്‍ സ്വീകരിച്ചിട്ടില്ലാത്തതുമായ ഒരു പേരാണ് സാംസ്‌കാരിക നായിക എന്ന പേരെന്ന് അവര്‍ പറഞ്ഞു. ആ ‘പൊല്ലാപ്പില്‍’ നിന്ന് ഒഴിവാക്കണമെന്നും അവര്‍ ആവശ്യപ്പെട്ടു.

കൂട്ട ഒപ്പിടീക്കല്‍ പ്രസ്ഥാനക്കാര്‍ കൊണ്ടുവരുന്ന പ്രസ്താവനകള്‍ ബോധ്യപ്പെട്ടാല്‍ അവരോട് ഐക്യപ്പെട്ട് ഒപ്പിടാറുണ്ട്. മാധ്യമസുഹൃത്തുക്കളെങ്കിലും തന്നെ ‘സാംസ്‌കാരികനായിക’ എന്ന തെറിവാക്ക് വിളിയ്ക്കരുതെന്ന് അഭ്യര്‍ത്ഥിക്കുന്നു. താന്‍ ഒന്നിന്റെയും നായികയല്ലെന്നും അവര്‍ പറഞ്ഞു.

ഫേസ്ബുക്ക് പോസ്റ്റിന്റെ പൂര്‍ണരൂപം

പ്രിയരേ, പ്രിയ മാധ്യമസുഹൃത്തുക്കളേ,

എന്റെ മേല്‍ അടിച്ചേല്പിക്കപ്പെട്ടിട്ടുള്ളതും ഞാന്‍ സ്വീകരിച്ചിട്ടില്ലാത്തതുമായ ‘സാംസ്‌കാരിക നായിക’ എന്ന പൊല്ലാപ്പില്‍ നിന്ന് ദയവായി എന്നെ ഒഴിവാക്കണം. ഞാന്‍ ഒരു എഴുത്തുകാരി മാത്രമാണ്.

ഏതൊരു സമൂഹജീവിയെയും പോലെ എനിക്ക് ശരിയെന്നുതോന്നുന്ന കാര്യങ്ങള്‍ ഉറക്കെ പറഞ്ഞിട്ടുണ്ട്. കൂട്ടഒപ്പിടീക്കല്‍ പ്രസ്ഥാനക്കാര്‍ കൊണ്ടുവരുന്ന പ്രസ്താവനകള്‍ ബോധ്യപ്പെട്ടാല്‍ അവരോട് ഐക്യപ്പെട്ട് ഒപ്പിടാറുണ്ട്. (ശരിയെന്ന് തോന്നുന്നത് മാത്രം.ബോധ്യപ്പെടുന്ന ത് മാത്രം.)

മാധ്യമസുഹൃത്തുക്കളെങ്കിലും എന്നെ’സാംസ്‌കാരികനായിക’ എന്ന തെറിവാക്ക് (ഇന്ന് അത് അങ്ങനെയാണ് ഉപയോഗിക്കപ്പെടുന്നത് എന്നറിയാമല്ലോ.) വിളിയ്ക്കരുതെന്ന് അഭ്യര്‍ത്ഥിക്കുന്നു.

Content Highlight: Sarah Jopseph About Calling Herself Social Leader