ചെറിയ റോൾ പറ്റില്ല, തരുമ്പോൾ വലുത് തന്നെ വേണം; ബേസിലിനോട് സഞ്ജു

ക്രിക്കറ്റ് പിച്ചിൽ സിക്സറുകൾ പായിച്ച് ആരാധകരെ വിസ്മയിപ്പിക്കുന്ന മലയാളി താരം സഞ്ജു സാംസൺ വെള്ളിത്തിരയിലേക്കും എത്തേണ്ടതായിരുന്നു! മലയാളത്തിൽ വലിയ തരംഗമായി മാറിക്കൊണ്ടിരിക്കുന്ന ‘അതിരടി’ എന്ന ചിത്രത്തിലൂടെ സഞ്ജുവിനെ ഒരു തകർപ്പൻ കാമിയോ റോളിൽ അഭിനയിപ്പിക്കാൻ ചിത്രത്തിന്റെ അണിയറപ്രവർത്തകർ ശ്രമിച്ചിരുന്നു എന്ന വിവരമാണ് ഇപ്പോൾ പുറത്തുവന്നിരിക്കുന്നത്. ചിത്രത്തിന്റെ തമിഴ് ട്രെയിലർ ലോഞ്ച് ചടങ്ങിൽ വെച്ച് നടനും സംവിധായകനുമായ ബേസിൽ ജോസഫ് തന്നെയാണ് ഈ രസകരമായ കാര്യം വെളിപ്പെടുത്തിയത്.

ബേസിൽ ജോസഫ് പ്രൊഡക്ഷൻസിന്റെ ആദ്യ നിർമ്മാണ സംരംഭമായ ‘അതിരടി’യിൽ ഒരു പ്രധാന കാമിയോ വേഷം ചെയ്യാൻ സഞ്ജുവിനെ ക്ഷണിച്ചിരുന്നു. എന്നാൽ ക്ഷണം ലഭിച്ച ഉടൻ തന്നെ സഞ്ജു അത് സ്‌നേഹപൂർവ്വം നിരസിക്കുകയായിരുന്നു എന്ന് ബേസിൽ പറഞ്ഞു.

ഐപിഎൽ തിരക്കുകൾക്കിടയിലും തന്റെ പ്രിയ സുഹൃത്തായ ബേസിലിന്റെ ചിത്രത്തിന് പിന്തുണയുമായി സഞ്ജുവും ട്രെയിലർ ലോഞ്ചിന് എത്തിയിരുന്നു. ബേസിലിന്റെ വെളിപ്പെടുത്തലിന് ചിരിയോടെ സഞ്ജു മറുപടി നൽകിയത് ഇങ്ങനെയായിരുന്നു:
‘ഒരു ചെറിയ റോൾ ചെയ്യാനാണ് എന്നെ വിളിച്ചത്. പക്ഷേ എനിക്ക് തരികയാണെങ്കിൽ നല്ലൊരു വലിയ റോൾ തന്നെ തരണം. ബേസിൽ മികച്ചൊരു സംവിധായകനാണ്, ആർക്ക് എന്ത് റോൾ നൽകണമെന്ന് അദ്ദേഹത്തിന് നന്നായി അറിയാം.’

വർഷങ്ങളായുള്ള തങ്ങളുടെ ആത്മബന്ധത്തെക്കുറിച്ചും സഞ്ജു വേദിയിൽ സംസാരിച്ചു. പുറമേ എപ്പോഴും ചിരിച്ചുല്ലസിച്ച് നടക്കുന്ന ആളാണെങ്കിലും ജോലിയുടെ കാര്യത്തിൽ ബേസിൽ അതീവ ഗൗരവക്കാരനാണെന്ന് സഞ്ജു ഓർമ്മിപ്പിച്ചു. സ്വന്തം നിർമ്മാണ കമ്പനിയുടെ ആദ്യ സിനിമയ്ക്കായി ബേസിൽ എത്രത്തോളം കഠിനാധ്വാനം ചെയ്തുവെന്ന് നേരിട്ടറിയാവുന്നതുകൊണ്ടാണ് ചെന്നൈയിലെ തിരക്കുകളിൽ നിന്നും ഈ ചടങ്ങിലേക്ക് താൻ ഓടിയെത്തിയതെന്നും താരം കൂട്ടിച്ചേർത്തു.

നിലവിൽ ഇന്ത്യൻ പ്രീമിയർ ലീഗിൽ ചെന്നൈ സൂപ്പർ കിങ്സിന് വേണ്ടിയാണ് സഞ്ജു സാംസൺ പാഡ് കെട്ടുന്നത്. സീസണിൽ ഉജ്ജ്വല ഫോമിലുള്ള താരം 12 മത്സരങ്ങളിൽ നിന്നായി രണ്ട് സെഞ്ചറികളും ഒരു അർധസെഞ്ചറിയുമടക്കം 450 റൺസ് അടിച്ചുകൂട്ടിയിട്ടുണ്ട്.

നിലവിൽ കളിച്ച 12 മത്സരങ്ങളിൽ ആറ് വിജയങ്ങളുമായി ചെന്നൈ പോയിന്റ് പട്ടികയിൽ അഞ്ചാം സ്ഥാനത്താണ്. പ്ലേ ഓഫ് യോഗ്യത ഉറപ്പാക്കാൻ വരാനിരിക്കുന്ന രണ്ട് മത്സരങ്ങളും ചെന്നൈയ്ക്ക് നിർണായകമാണ്. മൈതാനത്ത് സഞ്ജുവിന്റെ ബാറ്റ് വീണ്ടും ചെന്നൈയ്ക്കായി തിളങ്ങുമെന്ന പ്രതീക്ഷയിലാണ് ക്രിക്കറ്റ് പ്രേമികൾ.

Content Highlight: Sanju Samson talks About Athiradi movie