'സഞ്ജുവിന്റെ തിരക്കഥയിൽ നായകനായി അയ്യർ' ദി റിയൽ ഇന്ത്യൻ സ്റ്റോറി...

അഫ്ഗാനിസ്ഥാനെതിരെയുള്ള മൂന്ന് ടി-20 മത്സരങ്ങളുടെ പരമ്പര തൂത്തുവാരിയിരിക്കുകയാണ് ഇന്ത്യ. ദൽഹി അരുൺ ജെയ്റ്റ്‌ലി സ്റ്റേഡിയത്തിൽ നടന്ന മത്സരത്തിൽ 127 റൺസിന്റെ കൂറ്റൻ വിജയമാണ് ഇന്ത്യ സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത ഇന്ത്യ ഉയർത്തിയ 222 റൺസിന്റെ വിജയലക്ഷ്യം പിന്തുടർന്നിറങ്ങിയ അഫ്ഗാനിസ്ഥാൻ 94 റൺസിന് പുറത്താവുകയായിരുന്നു.

മത്സരശേഷം അഫ്ഗാൻ നായകൻ ഇബ്രാഹിം സദ്രാൻ ഇന്ത്യക്കൊപ്പം പരമ്പര വിജയത്തിൽ പങ്കാളിയായി. തോൽ‌വിയിൽ നിരാശരായ എതിർ ടീം ക്യാപ്റ്റനെ ചേർത്തുപിടിച്ച ഇന്ത്യൻ ടീമിന്റെ ഈ പ്രവർത്തിക്ക് വലിയ പ്രശംസയാണ് ലഭിച്ചത്.

ഇന്ത്യൻ ടീമിനൊപ്പം ട്രോഫിക്കൊപ്പം ഫോട്ടോയെടുക്കാനായി അഫ്ഗാൻ നായകൻ ഇബ്രാഹിം സദ്രാനെ ഇന്ത്യൻ ക്യാപ്റ്റൻ ശ്രേയസ് അയ്യർ ശ്രേയസ് അയ്യർ ക്ഷണിക്കുകയായിരുന്നു. ഈ അവിസ്മരണീയ നിമിഷത്തിന് പിന്നിൽ മലയാളി താരം സഞ്ജു സാംസണിന്റെ പങ്കും എടുത്തുപറയണം.

ട്രോഫി നേടി ഫോട്ടോക്ക് തയ്യാറെടുക്കുന്നതിനിടെ സഞ്ജുവിന്റെ നിർദേശ പ്രകാരമായിരുന്നു അയ്യർ അഫ്ഗാൻ ക്യാപ്റ്റനെ ഫോട്ടോയെടുക്കാൻ വിളിച്ചത്. സംഭവത്തിന്റെ വീഡിയോ സോഷ്യൽ മീഡിയയിൽ തരംഗമായതോടെ സഞ്ജുവിന്റേയും അയ്യരിന്റെയും ഈ മാതൃകാപരമായ പ്രവർത്തിക്ക് വലിയ കയ്യടികളാണ് ലഭിച്ചത്.

ഇതാദ്യമായല്ല ഇന്ത്യൻ ടീം അഫ്ഗാനിസ്ഥാനെ തങ്ങളുടെ വിജയത്തിൽ പങ്കാളികളാക്കുന്നത്. ഇന്ത്യൻ ഇതിഹാസം അജിൻക്യ രഹാനെയും ഇത്തരത്തിൽ അഫ്ഗാൻ ടീമിനെ ചേർത്തുപിടിച്ചിരുന്നു.

2018ൽ ബെംഗളൂരു ചിന്നസ്വാമി സ്റ്റേഡിയത്തിൽ നടന്ന ടെസ്റ്റ് മത്സരത്തിന് ശേഷമായിരുന്നു രഹാനെ കയ്യടി നേടിയിരുന്നത്. അഫ്ഗാനെതിരെയുള്ള ടെസ്റ്റ് പരമ്പര വിജയിച്ചതിന് ശേഷം രഹാനെ ടീം ഫോട്ടോ എടുക്കാൻ അഫ്ഗാൻ താരങ്ങളെ മുഴുവൻ വിളിച്ചിരുന്നു.

അതേസമയം മത്സരത്തിൽ സൂപ്പർ താരം അഭിഷേക് ശർമയുടെ സെഞ്ച്വറി കരുത്തിലാണ് ഇന്ത്യ മികച്ച സ്‌കോറിലെത്തിയത്. 34 പന്തിൽ 108 റൺസുമായാണ് അഭിഷേക് തിളങ്ങിയത്. 11 കൂറ്റൻ സിക്സുകളും ഒമ്പത് ഫോറുകളും ആണ് താരം നേടിയത്. രണ്ട് ഫോറും നാല് സിക്‌സറും അടക്കം 35 പന്തിൽ 50 റൺസ് നേടി സഞ്ജുവും തിളങ്ങി.

ബൗളിങ്ങിൽ ഇന്ത്യയ്ക്കായി നിതീഷ് കുമാർ റെഡ്ഡി, രവി ബിഷ്‌ണോയ് എന്നിവർ മൂന്ന് വിക്കറ്റ് വീതം വീഴ്ത്തി. അക്‌സർ പട്ടേൽ രണ്ട് അഫ്ഗാൻ താരങ്ങളെ മടക്കിയപ്പോൾ ജസ്പ്രീത് ബുംറയും യാഷ് താക്കൂറും ഓരോ വിക്കറ്റ് വീതവും വീഴ്ത്തി.

ഇനി ശ്രേയസ് അയ്യരുടെയും സംഘത്തിന്റെയും മുന്നിലുള്ളത് ഏഷ്യൻ ഗെയിംസാണ്. ഏഷ്യൻ ഗെയിംസിൽ സ്വർണമണിയാൻ ഇന്ത്യ ജപ്പാനിലേക്ക് പറക്കും. ഇതിന് മുമ്പായി സെപ്റ്റംബർ 22ന് ഇന്ത്യ ജപ്പാനെതിരെ ഒരു ടി-20 മത്സരം കളിക്കും.

Content Highlight: Sanju Samson and Shreyas Iyer conduct towards the Afghanistan team is earning praise